Удахгүй нээлтээ хийх “Өв залгамжлагч” олон ангит киноны Заяагийн дүрд ажилласан залуу жүжигчин Ц.Буянхишигтэй ярилцлаа. Тэрбээр өмнө нь "Яаралтай тусламжийн тасгийнхан", "Гарааны тав", "Тойрог" тэргүүтэй уран бүтээлд тоглож байсан билээ. 

-Сайн байна уу, шинэ уран бүтээл “Өв залгамжлагч” олон ангит кино нь удахгүй нээлтээ хийх гэж байна. Сэтгэгдлээсээ хуваалцахгүй юу?

-“Өв залгамжлагч” киноны Заяагийн дүрд ажиллаа. Киноны голлох дүр учраас олон зураг авалттай байж, өмнөх уран бүтээлүүдээсээ илүү туршлага хуримтлууллаа. Намайг сорьсон уран бүтээл байсан учраас өөрийгөө дэлгэцээр үзнэ гэхээр их сонирхолтой санагдаж байна.

-Гол дүрүүд нь бүгд залуу уран бүтээлчид байсан. Залуустай хамтарч ажиллах ямар байв?

-Долоон гол дүрүүд олон насны зөрүүгүй, нэг үеийн залуу уран бүтээлчид байлаа. Хамтарч ажиллахад тухтай, нэгнээсээ суралцаж, гар нийлэн ажиллаа.

-Уран бүтээлчид “Өв залгамжлагч” киногоороо үзэгчдэд юу хүргэхийг хүсэж байгаа вэ?

 -Буруу зам, худал хуурмагийн төгсгөлд нь бүтэлгүйтэл хүлээж байдгийг харуулна. Харин шударгаар хөдөлмөрлөсөн нэгэнд юу тохиолддогийг “Өв залгамжлаг” киноноос үзээрэй. Амьдралынхаа гараан дээр байгаа залуус, ямар нэгэн сорилттой нүүр тулсан нэгэн "Өв залгамжлагч" киног заавал үзээсэй гэж хүсэж байна. 

-Тус уран бүтээл бусад олон ангит киноноос юугаараа онцлог байх бол?

-“Өв залгамжлагч” олон ангит кино долоон гол дүртэй. Залуус гарааны бизнес эхэлж байгаа талаар өгүүлэх уран бүтээл учраас энэ төрлийн сэдэвт дуртай хүмүүст илүү таалагдах болов уу.

-Ажилласан анхны уран бүтээл нь "Яаралтай тусламжийн тасгийнхан" байв уу. Тус уран бүтээлд хэрхэн ажиллахаар болсон бэ?

-"Яаралтай тусламжийн тасгийнхан" бол миний анхны гол дүрд ажилласан тохиолдол байсан. Өмнө нь “Single ladies 4” киноны олны хэсэгт тоглосон юм. "Яаралтай тусламжийн тасгийнхан" кинонд хамтарч ажиллах санал тавихад дуртай хүлээн авч тоглосон.

-Эмнэлгийн байгууллагын ажилтны дүр дээр ажиллах ямар байсан бэ?

-Кино маань хүмүүст эрүүл мэндийн анхан шатны тусламж үзүүлэх үзэгдэл олонтой, эмч нарын хэрэглэдэг өвчин, эмнэлгийн хэрэгслийн нэршил нь өөр учраас тэр бүрд суралцах сонирхолтой байсан.

-Үзэгчид таныг “Тойрог” киноных нь дүрээр сайн таньдаг болсон шүү дээ. Аймшгийн кинонд ажиллах ямар байв?

-Аймшгийн кинонд тоглоход энгийн уран бүтээлд ажиллахаас огт өөр, өвөрмөц санагдсан. Учир нь миний дүр амьд бус биетийн дүр байсан учраас ажиллахад илүү сонирхолтой байсан л даа. Үүлэнгийн дүр надад сайн тохирсон юм шиг санагддаг учраас миний хамгийн их хайрладаг дүр.

-Ажилласан уран бүтээлүүдээс нь таныг хамгийн их сорьсон үе бий юү?

-“Тойрог” уран сайхны киноны Үүлэнгийн дүр намайг хамгийн их сорьсон уран бүтээл. Бид зураг авалтаа Хөвсгөл аймагт очиж хийсэн болохоор их даарсан. Аймшгийн кино учраас санаад оромгүй, сонин зүйлс хийлгэсэн нь их сонирхолтой байсан. “Өв залгамжлагч” киноны хамгийн их үгтэй нь би учраас олон юм цээжилж өөрийгөө дахин сорилоо.

-Ямар зарим баримталдаг уран бүтээлч байхыг эрмэлздэг вэ?

-Бусдын хараагүй өнцгийг харуулсан, өвөрмөц содон уран бүтээлд ажиллахыг эрмэлздэг.

-Яагаад жүжигчин болохоор шийдсэн юм бэ. Энэ мэргэжилд дуртай болсон шалтгаан нь юу байв?

-Багадаа Хүүхдийн ордны драмын дугуйланд сурдаг байсан юм. Сонгоны ангийн хүүхдүүдийн шүлэг уншиж, жүжиглэж байгааг хараад  жүжигчин болох талаар анх бодсон. Мөрөөдөл, хүсэл гэх мэт хийсвэр зүйл дээр тулгуурлаж энэ мэргэжлийг сонгоогүй ээ. Өөрт байгаа төрх, ур чадвараа дайчилж үзэхийг хүссэн учраас жүжигчнээр сурсан.

-Та ямар үед өөртөө хамгийн итгэлтэй байдаг вэ?

-Хүн өөртөө итгэсэн үедээ хамгийн хүчтэй нь байдаг гэж боддог.

-Цаашдын зорилго, ажиллахыг хүссэн дүр бий юү?

-Би хувцас загварын салбарт өөрийгөө сорихыг хүсдэг. Тиймээс энэ чиглэлээр сурахаар бэлдэж байгаа. Гэхдээ жүжигчнээр үргэлжлүүлэн ажиллана, өвөрмөц хэн нэгний санаад буухааргүй дүрд ажиллахыг хүсдэг.