Сэтгэл шимшрүүлэм хэрнээ “Ийм сонголт хийхээс өөр аргагүй байж дээ” гэж өмөөрмөөр уран бүтээл бол “Баяртай ээжээ” кино. Маралаа охинд хорвоо хэтэрхий дэндүү харгис, хэрцгий хандсан ч энгэртээ тэвэрсэн үрийнхээ төлөө тэр урагшилсаар байсан. Ийм нэгэн ганц бие ээжийн дүр бүтээсэн жүжигчин Г.Дөлгөөнтэй ярилцлаа. Зүрх эмзэглүүлсэн энэ уран бүтээлийг бодит түүхээс сэдэвлэсэн гэдгийг дурдах нь зүйтэй болов уу.

Г.Дөлгөөн цэцэрлэгийн дуу хөгжмийн багшаар ажилладаг. Өмнө нь “Зоорь-2”, “Хонх”, “Admin Z”, “Бужо” тэргүүтэй уран бүтээлд ажиллаж байжээ.

МАРАЛАА ОХИНЫ АМЬДРАЛААР “АМЬДАРСАН” ХЭСЭГХЭН ХУГАЦАА ЗҮРХ ХӨНДҮҮРЛЭМ БАЙЛАА 

-Танд энэ өдрийн мэнд хүргэе. “Баяртай ээжээ” кинонд тоглохоор болсон үеэс нь яриагаа эхлэх үү?

-Сайн байна уу, танил эгч маань санал тавьснаар “Баяртай ээжээ” киноны дүрийн сонгон шалгаруулалтад орсон. Орой нь найруулагчаасаа тэнцсэнээ мэдсэнээр тус уран бүтээлийн гол дүрд ажилласан.

-Маралаа охины дүрд ажиллах ямар байв. Өмнө нь ажилласан уран бүтээлүүдээс өөр жанрын кино байлаа шүү дээ?

-Драм төрлийн, мөн бодит явдлаас сэдэвлэсэн кино учраас зохиолоо уншаад хоёр хоног гол дүрийнхээ охиныг өрөвдөж, сэтгэл хөндүүрлэсэн. Зураг авалт дуустал сэтгэлд уяатай, хөндүүр байлаа.

-Кинонд тоглохдоо бодит амьдралаас сэдэвлэсэн гэдгийг нь мэдэж байв уу?

-Анх мэдээгүй. "Ийм зохиолтой кино, би ингэж тоглох юм байна" гэсэн л бодолтой байсан. Бодит түүхээс сэдэвлэсэн гэж мэдээгүй байхдаа хамаагүй хөнгөн хүлээж авсан байх. Харин жинхэнэ түүхийг сонссоны дараа үнэхээр цочирдсон. Нэг эмэгтэйн түүх, нэг охины туулаад гарсан бодит түүх гэдгийг мэдсэнийхээ дараа сэтгэл үнэхээр хөндүүрлэсэн. Тиймээс дүрээ дутуу гаргачихгүй юмсан гэж хичээж бүтээлээ.

-Үзэгчдийн сэтгэгдлийг хэр хүлээж авсан бэ?

-Үзэгчдийн 80 хувь нь эергээр хүлээж авсан. Амьдралаас тасарсан уран бүтээл биш шүү дээ. Бидний эргэн тойронд байгаа, болдог, бидний таслан зогсоож чадахгүй байгаа зүйл. "Үсээ самнаагүй байна, халтар харагдаж байна" гэсэн үзэгч байсан. Хэцүүхэн амьдралтай, охиноо сүүтэй хонуулахын тулд гуйлга гуйж, хог түүж байгаа хүнд үсээ самнаж, брэндийн хувцас өмсөх боломж байхгүй шүү дээ. Би үсээ цэмбийтэл нь самнаж, брэндийн гял цал болсон хувцас өмссөн байсан бол харин ч бодит амьдралаас тасарсан уран бүтээл болох байсан байх.

-Кино багийнхан уран бүтээлээрээ дамжуулж үзэгчдэд хүргэх гэсэн санаагаа хүргэж чадсан болов уу?

-Уран бүтээлчид киногоороо дамжуулж нийгэмд болж буй болохгүй зүйлийг харуулах, түүнээс сэргийлэхийг сануулах гэж оролддог байх. Сэтгэгдэл, хүмүүсийн хандлагыг хараад бид хүргэх гэсэн санаагаа хүмүүст хүргэж чадсан гэж бодож байгаа. Зарим хүн киноны трейлерийг үзээд их хүнд кино гэж ойлгосон байсан. Трейлер дээрээ хүнд харагдаж байж болох ч заавал нэг удаа үзэх хэрэгтэй уран бүтээл гэж бодож байна. 

-Өмнө нь аймшгийн хэд хэдэн уран бүтээлд тоглож байсан шүү дээ. Тоглосон анхны киноныхоо талаар ярихгүй юу?

-“Зоорь-2” миний тоглосон анхны кино, дүрийн шалгаруулалтад ороод Сувдын дүрд тэнцэж байлаа. Дараа нь “Хонх”, “Admin Z”, “Бужо” кинонд ажилласан. Анхны бүтээсэн дүр маань аймшгийн кино байсан учраас ийм киноны саналууд ирсэн байх. Гэхдээ өөрийгөө арай өөрөөр харуулах дүрд ажиллаж үзэхийг хүсдэг.

-Цэцэрлэгийн багшаар ажилладаг гэсэн. Жүжигчин мэргэжлээр сурч байв уу?

-СУИС-д хоёр жил сурсан, тэгээд мэргэжлээ хөврүүлэх шаардлагатай болсон учраас дуу хөгжмийн багшаар төгссөн. Одоо цэцэрлэгийн дуу хөгжмийн багшаар ажилладаг. Манай гэр бүлд киноны салбарт ажиллаж байсан хүмүүс бий. Хөгшин эмээг маань Шархүүхэн гэдэг, 1935 оноос хойш Кино үйлдвэрт эвлүүлэгчээр ажилладаг байсан. “Норжмаагийн зам”, “Монгол хүү”, “Цогт тайж” тэргүүтэй кинонд ажилласан. Мөн эмээ Т.Нарантуяа маань ч тус ажлыг өвлөн авч, 1976 оноос хойш Кино үйлдвэрт ажилласан.

-СУИС-д ороход эмээ нарынх нь энэ салбарт ажиллаж байсан нь нөлөөсөн үү?

-Би багаасаа л нийгмийн идэвхтэй, дуулж, бүжиглэх дуртай хүүхэд байсан. Эмээ минь кино үзэх дуртай, дээр үеийн киног хамтдаа суугаад үзнэ, ажлынхаа талаар ярьж өгнө. “Эмээ эвлүүлэг хийнэ гэж юу юм, жүжигчид нь яаж ажилладаг юм” гээд ам хуурайгүй асуудаг хүүхэд байлаа.

-Цэцэрлэгийн багшаар ажилладаг талаараа ярихгүй юу?

-Улсын цэцэрлэгийн дуу хөгжмийн багшаар ажилладаг. Хүүхэдтэй ажиллах хамгийн сайхан. Тэдний гэнэн цайлган зан, халуун дулаан уур амьсгал, инээд хөөр дунд ажиллана, тэдэнд юм заана гэдэг хамгийн сайхан. Сурсан зүйлээ гэр бүлийнхэндээ харуулж, тэдэнд зааж өгч байгааг харах багшаар ажиллахын хамгийн сайхан нь байдаг даа.

-Гэр бүлийнхэн нь киног нь үзсэн үү?

-Үзээд “Ямар мундаг юм бэ, баяр хүргэе. Үнэхээр Дөлгөөн харагдсангүй ээ, Маралаа гэх охины амьдралыг л үзлээ” гэсэн. Би чинь амьдрал дээрээ огт өөр хүн шүү дээ. Аливаа зүйлийг эергээр харах дуртай хүн. Сайхан бодлоор эхэлсэн өдөр ажил бүтсэн сайхан өдөр болдог учраас “Бодол биеллээ олдог” гэдэг үгэнд дуртай. Мөн хүн амаараа юу тарина, түүнийгээ хураана гэдэгт итгэдэг учраас сайхан бүхнийг ярьж, эерэг байх дуртай.

-Таны хувьд киноны хамгийн хүнд үзэгдэл аль нь байсан бэ?

-Бүх үзэгдэл  л нэг хүн туулахад хэтэрхий хэцүү. Гэхдээ үнэхээр нэг хүн туулаад, даваад гарсан бодит амьдрал дээр цөөнгүй байдаг асуудлууд учраас тэр бүрд зүрх хөндүүрлэсэн. Би тэр хүний оронд байсан бол яах байсан бол гэж их бодогдсон. Төрөөд удаагүй нялх биетэй эмэгтэй хүн нэг сар ч гам барьж чадахгүй ус зөөж, түлээ хаглана. Сүү нь татарчихсан учраас сүүний мөнгө олох гэж хичээж байгаа нь ч үнэхээр хэцүү шүү дээ..