“TAG Entertainment”-ийн залуус СУИС-ийн оюутнуудтай хамтран хүүхдүүдийг гэмт хэргээс урьдчилан сэргийлэх “Алладин” хүүхдийн жүжгээ тавих гэж байгаа билээ. Тэгвэл тус жүжигтэй холбогдуулан богино дүрс бичлэгээрээ алдартай “TAG Entertainment”-ийн залуу жүжигчин Б.Билгүүнжаргалтай ярилцлаа.

-Танд энэ өдрийн мэнд хүргэе. Удахгүй тоглогдох “Алладин” хүүхдийн жүжгийнхээ талаар ярихгүй юу?

-Сайн байна уу. Есдүгээр сарын 29 болон аравдугаар сарын 6-нд “Алладин” жүжгээ хүүхэд, багачууддаа хүргэхээр бэлдэж байна.

-“Алладин” хүүхэд хамгааллын жүжиг гэсэн тодотголтой байсан. Энэ талаар ярихгүй юу. Яагаад хүүхэд хамгааллын жүжиг гэсэн юм бэ?

-Тус жүжиг бага насны хүүхдүүдийг гэмт хэргээс урьдчилан сэргийлэх санааг илэрхийлсэн уран бүтээл л дээ. Бага насны хүүхдүүд мэдэхгүйгээсээ болж гэмт хэргийн золиос болж байгаа харамсалтай мэдээлэл гарсаар байна шүү дээ. Тиймээс тэдэнд хамгийн сайн хүрэх хүүхдийн жүжгээр дамжуулж мэдээлэл өгөх, сэрэмжлүүлэх гэж тус жүжгийг тоглож байгаа.

-Тус жүжгээр дамжуулж юу илэрхийлэхийг хүссэн бэ?

-Эцэг эхчүүд хүүхдүүддээ хэрэгтэй зүйлийг нь төдийлөн үзүүлж чаддаггүй юм шиг санагддаг. Хүүхдүүд эрсдэлтэй үед өөрийгөө хэрхэн хамгаалахыг болон тэдний хийдэг аль үйлдэл нь зөв, аль нь бурууг харуулах болно. Нийгэмд байгаа сөрөг хүмүүсийг хэрхэн таньж мэдэх, найзтайгаа хэрхэн зөв нөхөрлөх, хэл, уран зохиолын хичээл ямар ач тустай болохыг бага насны хүүхдүүдэд ойлгуулна.

-Хүүхдийн жүжигт тоглоход хүндрэлтэй зүйл гарч байна уу?

-Миний хувьд тус жүжигт продюсерын үүрэгтэй ажиллаж байна. СУИС-ийн Театр, урлагийн сургуулийн 2а ангийн оюутнууд энэхүү жүжгийг хүүхдүүдэд хүргэхээр бэлдэж байгаа. Жүжиг тавина гэдэг том ажил, арын албанд ажиллана гэдэг тэрнээс ч илүү хариуцлагатай ажил юм билээ. Тайз, жүжигчдийн хувцас, хүмүүст хүргэх гээд бүх зүйлд гар бие оролцон хариуцаж байна. Өмнө нь “101 гөлөг” хүүхэд хамгааллын жүжигт ажилласан. Энэ удаа арай илүү туршлагатай ажиллаж, илүү олон хүнд хүргэхийг зорьж байна.

-Яагаад жүжигчин болохоор шийдсэн бэ. Багаасаа урлагт дуртай хүүхэд байв уу?

-Бүх төрлийн мэргэжлээр ажиллаж, хувирч чадах цор ганц мэргэжил нь жүжигчин шүү дээ. Өгөгдсөн дүрээс шалтгаалж эмч, цагдаа ч болж үзнэ. Бүх мэргэжлийн онцлогийг судална. Жишээ нь, нарийн бичгийн дүрд ажиллахаар болбол энэ мэргэжлийг эзэмшсэн хүн юу хийдэг талаар судална, өөрийгөө дадлагажуулна. Үргэлж шинийг сурч, өөрийгөө сорих боломж олгодог учраас энэ салбарыг сонгосон.

-Анх бичлэг хийж эхлэхэд хүмүүсийн хандлага ямар байсан бэ. Сөрөг сэтгэгдэл авахаар сэтгэлээр унадаг уу?

-Дүрс бичлэг хийж эхэлснийхээ дараа ирсэн сөрөг сэтгэгдлүүдийг уншаад жаахан хэцүү байсан. Тэгээд яваандаа дасчихдаг юм билээ. Гэхдээ манайх тэр бүр сөрөг сэтгэгдэл аваад байдаггүй ээ.

-Жүжигчин мэргэжлийг сонгоогүй байсан бол өөр ямар ажил хийх байсан бэ. Энэ талаар бодож байв уу?

-Жүжигчин болоогүй бол дуучин болох байсан байх. Би Багануурын хүүхэд, дүүргийнхээ тэмцээн уралдаанд оролцдог авьяаслаг сурагч байлаа.

-Кино уран бүтээлд ажилласан уу. Ямар жүжигчин байхыг хүсдэг вэ?

-Кинонд ажилладаг шүү, нэгдүгээр найруулагчаар ажиллаж байсан. Киноны зураг авалтыг саадгүй үргэлжлүүлэхийн тулд хамгийн сүүлд унтаж, хамгийн эхэнд сэрдэг нэгдүгээр найруулагчаар ажилладаг. Мөн “Зүүдний кафе”, “№1”, “Хоёр шөнө” тэргүүтэй уран бүтээлд ажилласан. Одоогоор гол дүрд ажиллаагүй ч залуу жүжигчнийхээ хувиар ах, эгч нарынхаа кинонд тусалж, олон зүйл сурсаар байгаа.

-Таны болон багийнхных нь дараагийн зорилго, төлөвлөгөө юу вэ?

-Ирээдүйд хийхийг хүссэн олон төлөвлөгөө байна. Тэр бүрийгээ биелүүлчихээд эргээд уулзъя.