Тэр 2025 оныг дэлхийн хэмжээний тэмцээн “Дакар Ралли”-аар эхлүүлнэ. Мото спорт сонирхогчдын хувьд олимптой адил хэмжээнд үнэлэгддэг энэхүү тэмцээнд Монгол Улс анх удаа алдраа дуудуулж, тугаа мандуулан оролцох гэж буй нь энэ. Энэхүү эрхэм үүргийг хүлээсэн ОУХМ П.Мөрөн бага наснаасаа мото спортод дурлаж, оролцсон уралдаан бүрдээ амжилт үзүүлдэг байжээ. “Silk Way Rally” уралдааны мөнгөн медальт, Барын цомын эзэн П.Мөрөнтэй ярилцлаа.

-Танд энэ өдрийн мэнд хүргэе. Тус спорттой анх хэрхэн холбогдсон юм бэ?

-Сайн байна уу, багаасаа л мотоциклийн утаа, тосны хажууд өссөн хүүхэд. Ер нь спортод их сонирхолтой усанд сэлэлт, бокс, дугуйн спортоор хичээллэсэн. Гэхдээ мотоцикл л надад хамгийн сайн тохирсон. Гэр бүлийнхэн минь дэмжиж, аавтайгаа хамт бэлтгэл хийсээр өнөөдрийг хүрсэн дээ.

-Аавтайгаа хамт мотоцикл унаж, уралдаанд бэлддэг байсан талаараа ярихгүй юу?

-2004 онд аав “Storm Riders” клубтэй байсан. Тухайн үед ижил сонирхолтой залуусыг цуглуулж туршлага солилцохоос гадна хол, ойрын аялалд явдаг байсан юм. Тэр бүрд нь аавтайгаа хамт явна. Аав минь намайг дасгалжуулж улсын аварга шалгаруулах тэмцээнд оруулдаг байсан. Өглөөнөөс эхлээд аав хүү хоёрын бэлтгэл эхэлдэг байлаа. Бэлтгэлийг үнэхээр шаргуу хийдэг байсан.

-“Silk way rally” тэмцээний талаар ярихгүй юу, 11 өдөр үргэлжилсэн гэсэн. Урт хугацаанд уралдах амаргүй байдаг байх даа?

- "Silk way" буюу Торгоны замын уралдаан олон жилийн түүхтэй. Монголд анх 2019 онд зохион байгуулагдаж байсан. Миний хувьд 2021 онд оролцож, өсвөр насны ангилалдаа тэргүүлсэн. Дэлхийн шилдэг тамирчидтай өрсөлдсөн энэхүү тэмцээний шилдэг аравт багтсан. Энэ жилийн уралдааны онцлох зүйл нь Монголд тэмцээний зам дуусаж, ялагчаа тодруулж, шагнал гардуулсан нь байлаа. Нийт 11 өдөрт 5500 километр замыг туулсан. Урт хугацаанд бартаат замаар уралддаг энэ спортод хамгийн их дуртай. Энэ төрлийн уралдаан хамгийн багадаа гурван хоног үргэлжилдэг. Мото спорт сонирхогч нарын хувьд олимп гэгддэг "Дакар Ралли" уралдаан 14 хоног үргэлжилнэ. 14 хоногийн турш өөрт байх бүх л хүчээ гаргаж, бартаат замыг мотоциклоор туулна гэдэг амаргүй. Гэхдээ өөрийгөө сорьсон сайхан үйл явдал. Эх орноо төлөөлж олон улсын тэмцээнд орох хамгийн сайхан мөч. Намайг өөртөө хамгийн ихээр татдаг спортоороо амжилттай хичээллэж байгаа.

-Экстрим спортод дурлах шалтгаан юу байв?

-Спортын төрөл бүрд хүнийг татсан нэг амт байдаг. Мото спорт бол хүний тархи, булчин, мэдрэмжийг ажиллуулдаг. Би хурдлах дуртай, хүнтэй өрсөлдөх, намайг сорьсон зүйлд дуртай учраас экстрим спортод илүү дурласан байх.

ХҮНИЙ ТАРХИ, БУЛЧИН, МЭДРЭМЖИЙГ ХӨГЛӨДӨГ УЧРААС МОТО СПОРТОД ДУРТАЙ

-Тамирчид олон саад бэрхшээлийг даван туулсан байдаг. Тус спортын тамирчин болсноор ямар бэрхшээлийг даван туулсан гэж боддог вэ?

-Техникийн спортод санхүү зарим тохиолдолд бэрхшээл болох нь бий. Гэр бүл, дэмжигч байгууллагагүйгээр гадаадын тэмцээнд оролцоход хүндрэл учирдаг. Байнгын бэлтгэл сургуулилалттай байдаг учраас чөлөөт цаг гарах нь бага. Зарим тохиолдолд хүнд гэмтэх ч эрсдэлтэй. Бэртэл гэдэг тамирчин хүнд хамгийн том бэрхшээл шүү дээ.

-“Дакар Ралли” уралдаан таны урт хугацааны зорилго, мөрөөдөл байж иржээ. Тус тэмцээнд оролцох болсон сэтгэгдлээсээ хуваалцахгүй юу?

-Дакар Ралли миний бага насны мөрөөдөл төдий байсан зүйл. Хэзээ нэгэн өдөр Дакарт уралдана гэж ярьдаг л байлаа. Гэтэл тэр холын мөрөөдөл биелэх гэж байна. Би сүүлийн гурван жил тус уралдаанд оролцох гэж материалаа өгч, хүсэлтээ илгээсэн. Тус уралдаанд 1000 гаруй тамирчнаас сонгогдсон 150 тамирчин уралддаг.

-Бэлтгэлээ хэрхэн хийж байна?

-"Дакар Ралли" тэмцээний бэлтгэл есдүгээр сарын дундаас эхэлнэ.

-Тэмцээнд мөнгөн хураамж өгдөг юм билээ. Тус төлбөрийг бүрэн өөрөө төлдөг үү. Улсаас дэмжлэг үзүүлдэг үү?

-Спонсорууд болон энэ спортыг ойлгодог ах нар, гэр бүлийнхэн маань дэмжлэг үзүүлдэг. Одоогийн байдлаар улсаас ямар нэгэн дэмжлэг байдаггүй. Дуртай, сонирхсон спорт минь учраас тал зардлаа өөрөө, үлдсэн хувийг нь намайг болон энэ спортыг дэмждэг хүмүүс гаргадаг.

-Элсэн манхан дунд зөв замаа олж уралдана гэдэг тамирчнаас тэвчээр, ухаан шаарддаг байх даа?

-Саяхан л элсэн манхан дунд хүмүүс замаа яаж олдгийг нь гайхаж байсан. Абу-Дабид очиж уралдахдаа хүртэл тэднийг хэрхэн замаа олж уралдаад байгааг нь гайхсан. Гэхдээ хүн учраас олчихдог юм билээ. Тэр дундаа монголчууд аливаа зүйлийн учрыг хурдан олж, дасдаг. Элсэн цөлийн 40 хэмийн халуунд, халуун мотоцикл унаад уралдах зүүд шиг байлаа. Элсэн дунд замаа олж уралдах боломжтой гэдгийг ойлгосон.

-Гэр бүлийнхэн нь экстрим спортоор хичээллэдгийг нь хэрхэн хүлээж авдаг вэ?

-Гэр бүлийнхэн минь намайг бүх талаас нь дэмждэг. Унасан ч, боссон ч хажууд минь байдаг. Гэр бүлийнхэн нь дэмжихгүй бол аливаа спортоор хичээллэх амаргүй гэж боддог.

-Таны анхны тэмцээн, анхны шагнал хэзээ байсан бэ. Тэр үеийн талаар дурсвал?

-2011 оны улсын чанартай уралдаанд гутгаар байрт шалгарсан. Тухайн үед 30 мянган төгрөгөөр шагнуулчихаад баярлаж байснаа мартдаггүй юм. Гэр бүлийнхэндээ шагналаа үзүүлж байсан мөч хамгийн дурсамжтай.

-Одоогоор хэдэн мото вэ. Мөрөөдлийн мото бий юү?

-Надад хоёр мотоцикл байна. Нэг нь уралдаанд зориулагдсан нөгөөг өдөр тутамдаа унадаг. Эхнэр маань заримдаа миний мотоциклийг унадаг. Түгжрэл ихтэй үед унахад хамгийн тохиромжтой. Мөрөөдлийн мотоцикл олон бий. Уралдааны төрөл бүрдээ тохирсон мотоциклтой болохыг хүсдэг.

-Монголд тус спорт хэр хөгжиж байгаа вэ, хөгжилд нь бэрхшээл болж буй зүйл бий юү?

-Сүүлийн таван жил энэхүү спорт хурдацтай хөгжиж байна. Суррон, электрон дугуй хэрэглэгчид насанд хүрээд мотоцикл унаж эхэлдэг. Мэргэжлийн тамирчин болохоор бэлдэж буй хүүхдүүд ч бий.

-Таны дараагийн зорилго төлөвлөгөө юу вэ?

 -Мөрөөдөл байсан "Дакар Ралли" ойрын зорилго болсон байна. Уралдаандаа амжилттай оролцож, дараа дараагийн жилүүдэд гаргасан амжилтаа ахиулах хүсэлтэй байгаа. Мөн олон залуу тамирчныг бэлдэх хүсэлтэй байгаа.

     Монгол Улсынхаа нэрийг экстрим спортоор дэлхийн тавцанд гаргаж буй тамирчин П.Мөрөнгийн "Дакар Ралли"-гийн шаргал элсэн дээр уралдах зам нь дардан байх болтугай.