“Гарц” олон ангит киноны ах дүүс төрсөн биш ч хувь тавилангаар нэгэнтэйгээ учирч, нэгнийгээ дэмнэсээр өдийг хүрсэн гэр бүл. Тэдэнд сайхан амьдрах эрмүүн их хүсэл, нэгнийгээ гэсэн ундарсан их сэтгэл, хайр байсан. Байсан гэдэг нь хэн нэгний шунал тэднээс хамгийн бага дүүг салгаж, ах дүүсийг ёроолгүй их гуниг харуусал, уур хилэнд унагасантай холбоотой. Одоо тэдэнд үлдсэн гэр бүлээ хамгаалж, дүүгийнхээ үхлийн жинхэнэ буруутанд хариуцлага тооцох үлдсэн.

                Хуягаа хатуу, ширүүн зантай гэр бүлийнхээ хүч нь. Хорвоо дээрх цорын ганц төрсөн дүүгээ алдчихаад Содоогоос өшөө авч, түүнийг гэмтээхийг хүсэхдээ, Бархаст “Санчир үхсэн бол чи тайван байж чадах уу” гэж хэлэхдээ дүүгээ алдсан ахын төрхийг сэтгэл шимширтэл харуулсан. Хуягаа зорилгодоо хүрэхийн тулд эрсдэлтэй зүйлс олныг төлөвлөдөг ч зөв бүхэн рүү чиглүүлэх Бархас, хорвоогийн бүхэл зовлонг зөөллөж, уяраах Уярал, амьдралыг хар барааныг бүтэлгүй төлөвлөгөө, хөгжилтэй инээдээрээ гэрэлтүүлэх Санчир дүү нь байгаа учраас тэр үргэлж гэрэлтэй замаар алхдаг байх.

                Ингээд “Гарц” олон ангит киноны Хуягаагийн дүрд ажилласан залуу жүжигчин Т.Оюунболдтой ярилцсанаа хүргэж байна.

Үнэт зүйлтэй хүмүүс бууж өгдөггүй юм

-“Гарц” олон ангит киноны Хуягийн дүрд тоглохоор болсон үеэс нь яриагаа эхлэх үү?

                -2023 оны долдугаар сарын сүүлээр найруулагч маань яриад, киноныхоо зохиолыг өгсөн. Эхнээс нь дуустал ганц ч таслалгүй уншсан. Уг нь ганцхан Хуягийн дүрийг унших бодолтой байсан ч зохиолдоо хөтлөгдөөд бүгдийг нь уншсан. Тэгж л сонирхолтой санагдсан кинондоо ажиллах болсон доо. 

-Таны хувьд Хуяг ямар хүн бэ?

                -Хайртай хүмүүсийнхээ төлөө юу ч хамаагүй хийхийг эрмэлздэг. Гэхдээ асуудлыг хүчээр шийдчих гээд байдаг нэгэн. Асрамжийн газраас нийлсэн ч нэг гэр бүл болоод амьдралын хатуу, хүндийг хамтдаа туулж байгаа ах дүүстэй. Гэхдээ төрсөн дүүгээ алдана гэдэг хорвоогийн хамгийн хэцүү зүйл. Тиймээс ч Хуягаа өшөөгөө авахыг хүсэж, өөрийгөө алдах зүйлгүй гэж бодож байгаа. Гэхдээ түүнийг тогтоож, барьж байгаа ганц зүйл нь багаасаа хоолоо хувааж идэж өдийг хүрсэн Бархас, Санчир, Уярал гурав. Миний хувьд Хуяг их зүйл бодуулсан, хэцүү дүр байсан.

-Амьдрал дээр Хуягаатай хэр төстэй зантай вэ?

                -Ер нь зан ааш нэлээн төстэй шүү. Багаасаа жаахан сахилгагүй, хөдөлгөөнтэй хүүхэд байсан.

-Киноныхоо дараагийн ангийг үзэх гэж тав дахь өдрийг хүлээдэг үнэнч үзэгч олон бий. Үзэгчдийн таашаалд нийцсэн киноны уран бүтээлч байх ямар байна?

                -Сэтгэгдэл үнэхээр өндөр, хөөрсөн, жаргалтай өдрүүдийг өнгөрүүлж байна. Бидний сэтгэлээ шингээж хийсэн уран бүтээлийг үзэгчид сайнаар хүлээж авах сайхан байна. Шүүмжлэл ч ирж байгаа, тэр бүрийн хүлээн авч дараагийнхаа кинонд хэрэгжүүлнэ ээ. Манай киноны гол дүрүүдийн дийлэнх нь залуу жүжигчид байлаа. Бидний хувьд үзэгчид “Яаж хүлээж авах бол” гэдэг айдас их байсан. Б.Саруулбуян найруулагч сцен бүр дээр сэтгэл зүрхээ шингээж, жижиг зүйлсэд хүртэл анхаарч ажилласан. Сэтгэлээ шингээсэн учраас хүмүүст хүрч байгаа байх. Нийт уран бүтээлчдийнхээ өмнөөс үзэгчдэдээ баярлаж байгаагаа хэлмээр байна.

-Бархасын дүрд ажилласан Ц.Давааням жүжигчинтэй найзууд юм билээ. Найзтайгаа хамт кинонд тоглох ямар байв?

                -Бид хоёр чинь багаасаа найзалсан. Нэг ерөнхий боловсролын сургуулийн хоёр өөр анги байлаа, СУИС-ийг ч хамтдаа төгссөн. Бүх зүйлд хамт явж байдаг хүүхдүүд байлаа. Цаанаасаа л нэг холбоотой, найзууд болох гэж учирсан хоёр. Ц.Давааням бид хоёр хамт уран бүтээлд тоглох юм сан гэж их ярьдаг байсан. Найзтайгаа хамт кинонд тоглох болсноо мэдээд найруулагчдаа их баярласан. Найзтайгаа хамт байна гэдэг чинь их түшиг тулгуур юм билээ. Уулзах бүрдээ, машиндаа хүртэл үгээ бэлдсэн.

-“Гарц” олон ангит кинонд ахын дүрд ажиллаа. Амьдрал дээр айлын хэд дэх хүүхэд вэ?

                -Би чинь амьдрал дээрээ “санаа, санаа” байхгүй юу. Айлын бага, хоёр ахтай. Хоёр ахтай өссөн хүн томоотой байх үндэслэлгүй шүү дээ.

-Айлын бага хүүхэд, асарч, халамжлах дүүтэй ахын дүрд ажиллах ямар байв?

                -Эвгүй юм билээ. Хамгийн эхэнд хоёр ахыгаа бодсон. “Хэрвээ миний ах нар ийм байдалд орсон бол яах байсан бол” гэж их бодсон. Ах гэдэг чинь ямар ч нөхцөлд дүүгээ хамгийн эхэнд боддог хүн юм билээ.

-Гэрийнхэн нь уран бүтээлийг нь үзээд юу гэж байна?

                -Манай хоёр ах их хүлээлттэй үзэж байгаа. “Дараагийн анги дээр яах вэ, арын хаалга байхгүй юу” гэдэг.

-Яагаад жүжигчин болохоор шийдсэн юм бэ?

                -Ц.Давааням бид хоёр Ардын жүжигчин Г.Гомбосүрэн гуайн нэрэмжит “Халзан тавхай” хүүхдийн урлагийн наадамд сургуулиа төлөөлөөд байнга ордог байсан. Тэр үеэс жүжигчин болох сонирхол төрсөн дөө. Өвөө минь хөдөө, орон нутгаар явж тоглолт хийдэг, найруулагч хүн байсан юм билээ. Энэ талаар сонсоод сонгосон мэргэжилдээ илүү итгэлтэй болсон.

-Киноноос нь таны сэтгэлд хамгийн их хүрсэн, сэтгэлд үлдсэн хэсэг аль нь вэ?

                -Содоогийн гэрээс хардаа аваад ирсэн Уярал, тэр үед уйлаад үлддэг Бархасын хэсэг л хамгийн хэцүү нь байсан даа. Хуягаагийн зүгээс ахын хувьд гаргаж болохгүй шийдвэр гаргасан. Гэхдээ арга ядсан үед хүний эцсийн найдвар гэж байдаг шүү дээ. Тэр найдвар нь Уярал байсан байх. Миний хувьд дүүгээ үхэл рүү нь түлхчихэж байгаа юм шиг санагдсан. Баригдсан бол юу болохыг мэдэхгүй. Уяралтай уулздаг хэсэг бид дөрвийн хувьд хамгийн хэцүү нь байсан. Алдчихлаа гэж айж байсан дүүгээ эсэн мэнд харж байгаа Бархас, дүүтэйгээ хуйвалдаж, ямар буруу шийдвэр гаргаснаа ухаараад уулзаж Хуягаа, өмнөөс нь ч хамгаагүй үхэхийг хүсдэг, юу ч байсан хамаагүй үсрээд орж чадах Санчир ахын сэтгэл тэнд харагдсан байх.

-Киноных нь төгсгөлийн анги энэ долоо хоногт цацагдана. Сэтгэгдэл ямар байна?

                -Нэг талаараа үнэхээр их баяртай байна. Гэхдээ ингээд л дуусчихна гэхээр хөнгөн гунигтай. “Хэзээ гарах билээ, хүмүүс яаж хүлээж авах бол” гэсэн бодолтой өдрүүд дахиж байхгүй гэхээр жаахан сонин санагдаж байна.

-Тэгвэл эхний гурван анги цацагдсан өдрийн мэдрэмжийг эргэж дурсвал?

                -Үнэхээр догдолсон, айсан. Эхний анги ах дүүсийн талаар гарсан шүү дээ. Тиймээс “Хүмүүс яаж хүлээж авах бол” гэж бодсон, өөрийн эрхгүй л тэгж бодогдоод байдаг юм билээ. Гэрийнхэн үзэж байхад би хажууд нь байгаагүй ээ, хэцүү санагдаад байсан юм. Эхний ангиуд гарч байхад кино багаараа уулзаад “яаж байгаа бол” гэж их ярьсан даа.

-Ажиллахыг хүсэж байгаа дүр бий юү?

                -Залуу насны дүр төрхөө түүхэн кинонд үлдээхийг хүсдэг дээ. Түүхэн уран бүтээлийн дүр жүжигчдийг хамгийн их сорьдог гэж боддог.

-“Гарц” олон ангит киног үзэгчдэд хүргэсэн багийнхныхаа талаар ярихгүй юу?

                -Б.Саруулбуян найруулагч 2020 онд “Гарц”-ыг бүрэн хэмжээний кино болгож бичсэн юм билээ. Тэгээд гурван жил бодож, төлөвлөсний эцэст олон ангит кино болгосон. Жүжигчидтэйгээ зөөлөн харьцаж, бүх зүйлд хөшүүрэг, түшиг болдог хүн. Б.Одончимэг эгч зураг авалтын турш зааж, зөвлөсөн. Нийт кино багийнхандаа баярлалаа, баяр хүргэе.

-Ярилцлага өгсөн танд баярлалаа.

                -Баярлалаа.

        Түүнтэй ярилцаж байхдаа тэр хатуу чанга Хуягаагийн дүрийг яаж ийм зөөлөн яриатай, нүүр дүүрэн инээсэн, дулаахан хүн гаргасан юм бол гэж бодож суусан юм. Айлын бага хүү Т.Оюунболд, нөмөртэй хэрнээ гэнэт л дүү нарынхаа төлөө буруу сонголт хийж киног хэзээ ч эргүүлчихэж мэдэх Хуягаагийн дүрийг чадварлаг гаргажээ.