Үйл бүхэн үр дагавартай гэдгийг харуулах “Үхлийн тойрог” аймшгийн кино үзэгчдийн хүртээл болсоор байна. Тус уран бүтээлийн Жаргалын дүрд ажилласан залуу жүжигчин С.Удвалтай ярилцлаа.

-Танд энэ өдрийн мэнд хүргэе. “Үхлийн тойрог” кино нь үзэгчдэд хүрч эхлэлээ. Тус уран бүтээлд ажилласан сэтгэгдлээсээ хуваалцахгүй юу?

                -Сайн байна уу, “Үхлийн тойрог” миний ажилласан анхны аймшгийн кино байлаа. Анх зохиол нь маш их таалагдсан. Би хүний хийсэн сонголт, хийсэн үйл бүх үр дагавартай, үйлийн үр байлаг гэдэгт итгэдэг. Мөн хоёр улсын хамтын уран бүтээл байлаа. Энэхүү кинонд ажиллах шийдвэрээ нэлээн гэнэтийн гаргасан учраас бүх зүйл маш хурдан болж өнгөрсөн.

-Аймшгийн кинонд тоглох шинэ туршлага болсон байх даа. Энэ төрлийн уран бүтээлд тоглох ямар байсан бэ?

                -Жүжигчдэд тоглосон уран бүтээл бүр нь шинэ туршлага байдаг. Энэ төрлийн уран бүтээлд тоглоход аймшгийн кино гэж бодогдохгүйгээр “Бодит амьдрал дээр ч ийм зүйл тохиолддог шүү” гэсэн бодол төрж байсан. Бодит амьдралыг хүмүүст айдсаар мэдрүүлэхийг хүссэн юм шиг санагдсан. Айдасгүй хүн хамгийн аймшигтай гэдэг шүү дээ. Тиймээс киногоороо дамжуулж хүн бүрд үйлдэл бүр үр дагавартай гэдгийг харуулахыг зорьсон байх.

-Тайландад зураг авалт нь эхэлсэн юм билээ. Монгол, гадаад найруулагчтай ажиллах ямар байв?

                -Тайланд Улсад анх зураг авалт эхэлж, мотор дуугарсан. Гадаад найруулагчаас ирсэн зөвлөгөөг монгол найруулагч хэлж, дамжуулж байсан учраас миний хувьд монгол найруулагчтайгаа илүү тулж ажилласан. Өөрийнхөө хамгийн их хүндэлдэг жүжигчинтэйгээ хамтарч тоглосон мөн гадаадад анх удаа зураг авалтад орж байсан учраас баяртай ажилласан. Цаг өнгөрөх тусам илүү багийнхантайгаа илүү сайн гар нийлж ажилласан.

-Өөрөө хэр аймшгийн кино үздэг вэ. Айдаг төрлийнхөө кинонд ажиллах ямар байв?

                -Би аймшгийн их дуртай. Аймшгийн кино үзэж, сонсдог шигээ айх мэдрэмж аваагүй ээ. Жаргалын дүрийг найруулагчийнхаа бодож төсөөлсөн шиг гаргаж, илэрхийлэх ёстой зүйлийг гаргаж чадаагүй байх вий гэдгээс л хамгийн их эмээсэн дээ.

-Өмнө нь хэд хэдэн уран бүтээлд ажилласан шүү дээ. Анхны уран бүтээл нь ямар кино байсан бэ. Тухайн үед кинонд тоглочихоод ямар мэдрэмж авч байв?

                -Хоёрдугаар курсийн оюутан байхдаа 1990 уран сайхны киноны туслах дүрд ажиллаж байлаа. Кинонд ажиллах гэж байгаа нь л  хамгийн сайхан байсан даа. Кино, уран бүтээл ямар байдгийг, хэрхэн хийгддэгийг тэр үед л хамгийн ойроос харж, ойлгож байсан. Тэр үед авсан бүх мэдрэмж шинэ байсан. Мөн хоёрдугаар курсийн оюутан кинонд тоглох гэж байгаагаа гэрийнхэндээ дуулгасан мөч надад ч, тэдэнд минь хамгийн дурсамжтай байсан даа.

-Үзэгчид таныг “Suits” кинонд ажилласан шүү дээ. Тус уран бүтээлийнхээ талаар ярихгүй юу. Олон ангит кино ч мөн шинэ шалгуур байсан байх?

                -“Suits” олон ангит кинонд төдийлөн олон хэсэгт гараагүй ээ. Туслах дүрээр ажилласан. Харин эхлэхээс нь дуусах хүртэл продюсерын багт ажилласан. Ер нь арын албанд байсан гэсэн үг л дээ.

-Төгсөөд удаагүй юм билээ. Яагаад жүжигчин болохоор шийдсэн бэ?

                -Төгсөөд гурван жил болжээ. 16 настайдаа БНСУ-ын морин циркт хоёр жил ажилласан юм. Морин циркээс гадна жүжиглэсэн тоглолт болдог юм. Тэр жүжигт оролцож байгаа хүмүүсээс сайхан мэдрэмж авсан учраас жүжигчний мэргэжлийг сонгосон. Аав, ээж минь намайг их дэмждэг учраас шалгалт өгөх өдөр хүртэл хамт явж олон зүйлд тусалсан. Тэгж их дэмжсэн гэрийнхдээ хамгийн их баярладаг.

-Залуу уран бүтээлчийн хувиар ямар жүжигчин, уран бүтээлч байхын хүсдэг вэ?

                -СУИС-д сурч байхдаа жүжигчин гэх мэргэжил бол хүн судлал юм байна гэдгийг ойлгосон. Тиймээс хүмүүсийг их анзаардаг болсон. Үнэн жүжигчин байхыг л хүсдэг дээ. Тухайн дүрдээ үнэн жүжигчин байхыг хүсдэг дээ. Миний тоглосон киноны дүр бүхэн үнэн, бодит мэдрэмж өгдөг байгаа л гэж хүсдэг, хичээдэг дээ.

-Ажиллахын хүсдэг дүр бий юү?

                -“Би ийм хүн мөн билүү” гэж бодтол тоглуулах найруулагчтай учрахыг хүсдэг. Би өөрийгөө танихгүй болтол тэс өөр дүрд ажиллахыг хүсэж байгаа.

-Таны дараагийн зорилго, төлөвлөгөө юу вэ?

                -Олон зүйл бий. Хүлээн зөвшөөрөгдсөн жүжигчин болохыг зорьж байна.

-Ярилцлага өгсөн танд баярлалаа.

                -Баярлалаа.