“Би дуугаараа хүний зовлон, жаргалыг хамт хуваалцах гэж хийдэг” гэх залуу уран бүтээлчийг бид Sekstsagaanbogd, fruitybaachka-тай хамтарсан дууных нь “Чи залгана гэхдээ baby do you miss me,

Чи балгана гэхдээ хундага ч хүний мөсгүй

Би дурлана гэхдээ хайрлахгүй бүсгүйг

Миний шөнүүд маргааш нь дүрсгүй” гэх хэсгээр нь сайн таних билээ. Сонсогчдын дуртай олон дуунд хамтарсан Bektor Petrovic буюу Ц.Билгүүн. Энгийн байгаа нь л түүнийг бусдаас онцгойруулж байдаг залуу уран бүтээлчтэй хийсэн ярилцлагаа танд хүргэж байна.

-Танд энэ өдрийн мэнд хүргэе.Уран бүтээлийнхээ гарааг анх хэрхэн эхэлж байсан бэ. Анхны уран бүтээлийнхээ талаар ярихгүй юу?

                - Сайн байна уу, анх найзууд маань дуу хийх гэж оролддог байсан юм. Тэр үед нь сонсогч байж байгаад өөрөө оролдож үзэхээр шийдсэн. Тэгж л энэ аялал эхэлсэн дээ. Анхны уран бүтээл маань "Утга үгүй” гэх дуу бий. Одоо ч хааяа энэ дуугаа сонсож өөрийгөө ямар түвшинд хүрснээ харж, мэдрэх дуртай. Дуу хийхийн хамгийн гоё зүйл нь надад олон зүйлийг бүтээж өгсөн. Анх өөрийнхөө хоолойг сонсож байгаа нь л хамгийн сонирхолтой байсан. Тэр үеийн мэдрэмж л хамгийн сайхан байдаг учраас одоог хүртэл үргэлжлүүлж байгаа гэж боддог.

-Уран бүтээлчийнхээ нэрийг яагаад Bektor Petrovic гэж өгсөн юм бэ?

                -ОХУ-ын “Кухня” киноны ахлах тогооч Виктор Петрович нэрийг өөрчилж өгсөн. Дүр нь их таалагддаг учраас л уран бүтээлчийнхээ нэрээр сонгосон.

-Таны хамтарсан уран бүтээлүүд бүр сонсогчдын хамгийн дуртай дууны нэгээр нэрлэгддэг. Амжилттай уран бүтээлүүд дээр хамтарсан сэтгэгдлээсээ хуваалцвал?

                -Хүмүүсийн хамгийн сайн мэдэх нь 2021 онд Davaidasha найзтайгаа хийсэн Hip Hop дуу юм байх. Тус уран бүтээлд одоо хүртэл бид хоёр сэтгэл хангалуун байдаг. Дараа нь Noubold найзтайгаа “Төсөөлөл бүхэн чи” дууг хийсэн. Энэ дуугаар илүү олон хүнд хүрсэн байх. Сүүлийн үеийн уран бүтээл гэвэл Fruitybaachka, baatarfly хоёртой “Tugs” гэх дууг хийсэн. Энэ мэтчилэн уран бүтээлчид, найзуудтайгаа олон уран бүтээл дээр хамтарч байгаадаа баяртай байдаг. Хамтдаа бүтээсэн дуу бүр үнэ цэнтэй шүү дээ. Хамтарсан уран бүтээлчид бүртээ баярлалаа гэж хэлмээр байна.

-Уран бүтээлүүдээсээ онцолж ярихыг хүсвэл. Таны хувьд хамгийн дуртай дуу нь аль нь вэ?

                -Би бүх дуугаа онцолно. Бүгдэд нь сэтгэл мэдрэмжээ шингээж хийсэн учраас бүгд өөр түүхтэй.

-Таны “Хэзээ хойно нь” дуунд олон сонсогчид нь дуртай шүү дээ. Тус дуу хэрхэн бүтсэн талаар ярьж өгч болох уу?

                -“Хэзээ хойно нь”дууг хайртай хүндээ хаягдаад сэтгэлээр унаж байх үедээ тэр үеийнхээ мэдрэмжийг шингээж хийсэн дуу.

-Сонсогчдодоо өөрийнхөө уран бүтээлээс санал болгооч гэвэл ямар дууг санал болгох вэ. Яагаад?

                -“Шөнөөр” гээд миний “Soundcloud”-д байгаа дууг санал болгож байна. Яагаад ч юм би тэр дуундаа их дуртай. Тэр дуугаа сонсохоор тайвширдаг.

-Уран бүтээлүүд дээр хамтрахдаа юун дээр хамгийн их анхаарч ажилладаг вэ?

                -Хүмүүстэй туршлага солилцож хөгжим хийх надад гоё байдаг. Хүн бүр өөр өөрсдийн үзэл бодол, дотоод ертөнц, туулсан амьдралаараа хөгжим хийдэг шүү дээ.

-Дуугаа ямар үед хамгийн сайн зохиож, хийдэг вэ?

                - Сатаарах зүйлгүй санаа зовох асуудалгүй байхад минь л хамгийн гоё дуунууд гардаг даа.

-Уран бүтээлүүдээрээ хүнд юу хүргэхийг зорьдог вэ?

                -Мэдрэмж өгөхийг хичээдэг. Би дуугаараа хүний зовлон, жаргалыг хамт хуваалцах гэж хийдэг. Тийм ч учраас дууныхаа үгэнд их ач холбогдол өгч бичдэг. Үг бүр нь хэн нэгнийг тайвшруулж, мэдрэмжийг нь хуваалцдаг байгаасай гэж хүсдэг.

-Таныг юу бусад уран бүтээлчидээс онцгой болгодог вэ?

                - Миний энгийн байгаа байдал минь л намайг бусдаас онцгой болгодог доо.

-Таны дараагийн зорилго, төлөвлөгөө юу вэ?

                -Уран бүтээлч Fruitybaachka-тай хамтлаг болж хамт лаг болъё гэж төлөвлөсөн байгаа.