Хүн бүрийн хамгийн гэгээлэг, нандин бүхэн 18 насанд нь тохиодог болов уу. Ахлах сургуулиа төгсөж, ирээдүйн мэргэжлээ сонгоно, насан туршийн хайртайгаа учирч, инээж хөөрнө. Магад анхны хайраасаа салж, хөнгөн гуниглана. Ийм л нандин насны тухай Хүүхэд, залуучуудын театрын уран бүтээлчид “18 дахь хаврын хайр” жүжгээ өсвөр насныхандаа зориулж тоглож эхэллээ. Ингээд тус жүжгийн Учралын дүрд ажиллаж байгаа Г.Анунтай ярилцлаа.

"Алдаж болохгүй, дурсамж, дурлал, хайраар дүүрэн 18 нас минь чамд баярлалаа"

-Танд энэ өдрийн мэнд хүргэе. “18 дахь хаврын хайр” жүжгийн гол дүрд ажиллаж байгаа сэтгэгдлээсээ хуваалцахгүй юу?

                -Жүжгийн анхны уншлагын үеэр хамгийн шунаж, тоглохыг хүссэн нь Учралын дүр байсан. Ямар гоё ажиллагаатай гоё дүр вэ гэж бодсон. Хүссэн дүрдээ ажиллах боломж олгож, надад итгэсэн найруулагч, багийнхандаа баярлалаа.

-Анхны гол дүр дээрээ ажиллаж байгаа өөртөө хэр сэтгэл хангалуун тоглож байна?             

                -Анхны гол дүр учраас багахан айдастай байна. Гэхдээ анхных гээд надад алдах эрх байхгүй учраас өөрөөсөө бүх хүч, чадвараа гаргаж ажиллаж байгаа. Учрал надаас төс өөр зантай нэгэн.

-Учралыг дүрийн онцлог юу вэ. Их өвөрмөц жаахан ширүүн ч байж магадгүй дүр шиг санагдсан. Таны хувьд Учралыг ямар охин гэж харж байна?

                -Цахим орчны буруу хэрэглээ, үүнээс үүдсэн дээрэлхэлт, эмзэглэлийг нэгтгэж харуулах дүр. Гаднаасаа харахад ширүүн, догшин санагдана. Харин дотроо ганцаардсан, хайрлуулахыг хүсдэг, найзуудтай болохын хүсдэг зөөлөн хүн. Гэхдээ тэрийгээ буруу илэрхийлж, өөрөөр ойлгогдсон өрөвдмөөр охины дүр. Би Учралын дүрд их хайртай. Хэн ч Учрал шиг байдалд битгий хүрээсэй гэж бодож, дүрээ гаргаж ажиллаж байгаа.

-Учралын дүрээр дахин өсвөр насандаа очиж байна шүү дээ. Өөрийнхөө 18 насыг дурсвал?

                -Би 18 настайдаа оюутан болчихсон байсан. Ахлах сургуулиа 16-тайдаа төгссөн юм. Би өөрийгөө их голдог хүүхэд байсан юм. Тиймээс 18 насандаа эргээд очвол өөртөө “Чи одоо хамгийн зөв зам дээрээ явж байгаа. Одоо байгаа чинь хамгийн төгс” гэж хэлнэ. Өөрийгөө огт хэрэггүй зүйл дээр голж, өөнтөглөж байсныгаа ойлгосон.

-“18 дахь хаврын хайр” жүжгийг өсвөр насныханд санал болгож байсан. Тус жүжгээр юу илэрхийлэхийг, ойлгуулахыг хүсэж байгаа бол?

                -Бага насныханд зориулж хүүхдийн жүжиг тавьдаг. Драмын жүжиг хэдий нас заагаагүй ч томчуудад түлхүү зориулсан, тэдэнд хандсан сэдэвтэй байдаг. Өсвөр насныханд зориулсан жүжиг тэр бүр тоглогдоод байдаггүй болов уу. Бид “18 дахь хаврын хайр” жүжгээрээ өсвөр насандаа ямар алдаа гаргавал ямар нөхцөл байдалд хүргэдэг вэ гэдгийг сэрэмжлүүлж, аливаа зүйлийн зөв бурууг ялгах ямар чухал вэ гэдгийг харуулахын зорьж байгаа.

-Таны хувьд 18 настнуудад юу гэж хэлэх вэ. Эргээд 18 насандаа очвол юу хийх үү, тэр үеийн өөртөө хандаж юу гэж хэлэх вэ?

                -Өөрийгөө хамгийн их голдог нас шиг санагддаг. Би ч тэдний нэг байсан. Энэ насны хүүхдүүд дэлхийд цор ганц, дахин давтагдашгүй оршихуй гэдгээ ойлгоосой гэж хүсэж байна. Өөрийгөө голохгүй үргэлж өөртөө итгэлтэй байх хэрэгтэй.

-Залуу жүжигчний хувьд тайзны уран бүтээлчээр голчлон ажиллах хүсэлтэй байгаа юу. Яагаад энэ чиглэлийг сонгов?

                -Би их сургуулиа төгсөөд тун удалгүй Хүүхэд, залуучуудын театртаа нэгдсэн. Тайзны уран бүтээлч хүн цаг, минут тутамд сайжирч байдаг. Тайзан дээр ажиллаж байхдаа өдөр бүр мэргэжлээрээ суралдаг юм билээ. Бүх зүйл нүдэн дэр цор ганц удаа амьд мэдрэмжээр хөглөгдөж тоглодог нь миний театр, тайзанд дуртай байдгийн шалтгаан.

-Жүжигчин болоход юу нөлөөлсөн бэ?

                -Бага байхдаа зурагтаар хошин шог, кино үзээд  үгийг нь цээжлээд толиныхоо өмнө зогсоод жүжиглэж тоглодог хүүхэд байсан. Тэгж тоглохдоо үнэхээр их дуртай. Гэрийнхээсээ зөрж сонгосон мэргэжлээрээ ажиллаж, тэдэндээ хүсэл мөрөөдлийнхнөө дагуу сайн ажиллаж байгаа шүү гэдгээ харуулахыг хичээж байгаа.

-Залуу уран бүтээлчийн хувиар ямар жүжигчин, уран бүтээлч байхын хүсдэг вэ?

                -Олон зүйлийг чаддаг жүжигчин байхыг хичээдэг. Бүжиглэж, дуулж, морь унаж, сагс тоглох гээд ямар ч дүр авсан үүрээд гарчихдаг нэгэн байхыг хичээдэг дээ.

-Ажиллахын хүсдэг дүр бий юү?

                -Сонгодог драмын жүжиг, кинонд ажиллахын хүсдэг.

-Шинэ жүжгээ өлгийдөн авч байгаа багийнхандаа хандаж үг хэлээч?

                -Жүжиг олон хүний хамтын хөдөлмөрөөс бүтдэг. Тайзан дээр гарахгүй ч арын албанд жүжгийг төгс тавихын тулд ажилладаг олон хүн бий. Тэдний гар нийлж ажилласны үр дүнд жүжиг үзэгчдэд бүрэн дүүрэн хүрдэг. Хүүхэд, залуучуудын театрын хамт олондоо бүгдэд нь шинэ жүжгээ нээж байгаад нь баяр хүргэе, мөн бүгдэд нь баярлалаа.