Тоонот рекордсын залуу уран бүтээлч, реппер Babynna буюу Б.Наранзаяа. БНСУ-д анх уран бүтээл хийж эхэлсэн тэрбээр саяхан шинэ уран бүтээлээ гаргасан билээ. Түүнтэй шинэ уран бүтээлийнх нь талаар ярилцлаа.

-Танд энэ өдрийн мэнд хүргэе. Уран бүтээлч болохоор шийдсэн үеэс нь яриагаа эхлэх үү?

           -Аав минь урлагийн тэр дундаа хипхоп чиглэлээр уран бүтээл хийдэг байлаа. Багаасаа аавынхаа хийж байгаа хөгжмийг сонсож өссөн. Намайг урлагт хөтөлсөн дөө. Дуу хөгжимд их дуртай хүүхэд байсан нь өөрөө уран бүтээл хийхэд нөлөөлсөн.

-Тоонот рекордст хэрхэн орсон бэ. Залуу уран бүтээлчийн хувьд хамтарч, дэмжих хамт олонтой байхын давуу тал олон уу?

        -Анхны уран бүтээлээ гаргасны дараа Тоонот рекордсоос холбогдоод хамтран ажиллахаар болсон. Залуу уран бүтээлчийн хувьд сурч мэдэх зүйл олон бий. Тэр бүрд минь тоонотын уран бүтээлчид дэмжиж, зөв зүйл рүү хөтөлж, дэмждэг.

-Аав нь урлагийн хүн гэсэн шүү дээ. Аавынхаа талаар ярихгүй юу?

-Хамгийн анхны уран бүтээлийнхээ талаар ярихгүй юү. Эхлэл ямар байсан бэ?

          -Найзуудтайгаа хамт хөгжилдөж байхдаа хийсэн “bain bain” гэх уран бүтээл бий. Миний хамгийн анхны уран бүтээл төдийгүй хамгийн хайртай дуу. Олон сайхан дурсамжийг агуулсан уран бүтээл л дээ.

-БНСУ-д уран бүтээл хийдэг байсан шүү дээ. Монгол Улсад уран бүтээл хийх ямар байна?

          -БНСУ-д уран бүтээл хийхэд хүндрэлтэй зүйлс олон гарсан. Гэр бүлтэйгээ хамт байсан нь их дэм болсон. Сурахын хажуугаар цагийн ажил хийнэ. Тэр бүхний хажуугаар уран бүтээлээ хийж байгаа учраас цагаа зөв зарцуулж, цагийн менежменттэй болсон. Давуу тал болсон зүйлс ч бий. Эх орондоо уран бүтээл хийх сайхан шүү дээ. Танилын хүрээ олон учраас илүү тухтайгаар илүү олон зүйлсийг туршиж, хөгжих боломжийг олгож байгаа. Тоног төхөөрөмж, цахим сүлжээ ч сайн хөгжсөн учраас илүү сайн уран бүтээл хийх боломжтой.

-Сонсогчидтойгоо уулзсан анхны тайз нь хэзээ байсан бэ. Тайзан дээрээс авсан мэдрэмж ямар байсан бэ?

          -Би БНСУ-д байхдаа анх удаа тайзан дээр гарсан. Амьдралдаа сандарч байгаагүйгээрээ сандарсан. Тэгж их сандарсан хэр нь тайз бол миний байх ёстой газар юм байна гэдгийг ойлгож, аз жаргал мэдэрсэн.

-Таны хувьд хөгжим, уран бүтээл гэж юу вэ?

         -Хөгжим бол миний хувьд өөр нэг ертөнц. Сэтгэл хөдлөл, бодол гээд бүх зүйлд нөлөөлнө.Намайг хүн гэдгийг минь мэдрүүлж, амьдралыг илүү утга учиртай болгодог зүйл.

Уран бүтээлээрээ дамжуулж сонсогчдодоо ямар мэдрэмж өгөхийг хүсдэг вэ?

          -Хийсэн уран бүтээлээс минь өөрсдийн гэсэн харах өнцгөөрөө хүссэн  мэдрэмжээ аваасай гэж хүсдэг.

-Сонсогчдодоо өөрийнхөө уран бүтээлээс санал болгооч гэвэл ямар дууг санал болгох вэ. Яагаад?

          -Шинэхэн уран бүтээлээ санал болгох юм болов уу. Тус уран бүтээлийнхээ бүх зүйлийг өөрийнхөө төсөөлж, хүссэнээрээ хийсэн. Мөн хөгжим гэдэг зүйлийг өөрийнхөө өнцгөөр илэрхийлсэн уран бүтээл байгаа.

-Уран бүтээлдээ ямар хэв шинжийг шингээхийг боддог вэ. Бусад уран бүтээлчдээс ялгарах онцлог нь юу вэ?

           -Миний хэв маяг бусдаас ялгарах байх. Эмэгтэй репперүүд дундаа илүү чөлөөтэйгөөр уран бүтээлээ хийдэг. Өөрийнхөөрөө уран бүтээлээ хийдэг нь миний давуу тал, онцлог.

-Ирээдүйд гаргах цомгоо ямар байгаасай гэж хүсдэг вэ. Цомог дээрээ ажиллаж эхэлсэн болов уу?

           -Цомгийн ажилдаа одоохондоо арай ороогүй байна. Одоогийн байдлаар илүү чанартай уран бүтээл, хамтрал хийхээр ажиллаж байна. Өөрийнхөө хэмжээнд болсон гэж бодох хүртлээ хичээж уран бүтээлээ хийнэ. Чанартай цомог гаргахыг хүсэж байгаа учраас удаан хугацаанд бодож, төлөвлөнө.

-Таны дараагийн зорилго төлөвлөгөө юу вэ?

                -Үзүүлэхийг хүссэн, үзүүлж амжаагүй байгаа чадвараа гаргасан шинэ уран бүтээл гаргахыг зорьж байна.