“Авьяаслаг монголчууд” шоунд оролцож, жижиг гитар, хүчирхэг хоолой, хэвлүүхэн яриагаараа сонсогч, үзэгчдийн хайрыг татаж байсан Б.Ихэрсувдтай ярилцлаа. Тэрбээр өдгөө Twinpearly нэрээр уран бүтээлээ гаргаж байгаа юм.

-Танд энэ өдрийн мэнд хүргэе, шинэхэн уран бүтээлүүдийнхээ талаар ярихгүй юу?

          -Өнгөрсөн намар “EP” цомгоо гаргасан. Тус цомогт миний Тайланд Улсад амьдрах таван сарын хугацаанд бичсэн таван дууны дөрөв нь багтсан. Дуундаа тухайн арал дээр байх үедээ авсан мэдрэмжээ шингээж, бүтээсэн.

-“Авьяаслаг монголчууд” шоунд оролцож байсан үеийнхээ талаар дурсамж задлаач. Тус шоунд яагаад оролцохоор болсон тухайгаа ч юм уу?

           -Ерөнхий боловсролын сургуулиа төгсөөд, их сургуульд орсны дараа хэсэг хугацаанд юу хийх ёстойгоо мэдэхгүй хавчигдмал байдалд орсон. Тэр үед тус шоунд оролцох гэнэтийн шийдвэр гаргасан даа. Тухайн үед гэр бүлийнхэндээ тэмцээнд оролцох болсноо хэлээгүй, гитараа үүрч очоод урьдчилсан шалгаруулалтад оролцсон. Шоунд оролцохоос өмнө гэрийнхэн миний дуулахыг төдийлөн дэмждэггүй байлаа. “Авьяаслаг монголчууд” шоунд амжилттай оролцсоны дараагаас уран бүтээл хийхийг минь дэмждэг болсон.

-Хэдэн жилийн дараа “The Voice of Mongolia” шоугаар эргэн ирсэн шүү дээ. Дахин шоу, нэвтрүүлэгт оролцсон шалтгаан нь юу байсан бэ?

           - “The Voice of Mongolia” шоунд их сургуулиа төгссөнийхөө дараа орсон. Тэр үед уран бүтээл хийж эхэлж байсан учраас хүмүүст хүргэж, таниулах хэрэгтэй байсан юм. Өмнө нь “Авьяаслаг монголчууд” шоунд оролцож, тайзан дээр, шүүгчдийн өмнө гарч үзсэн учраас өөртөө илүү итгэлтэй, тайван оролцсон.

-“Хэцүү байна” дууны шинэчилсэн хувилбар олон хүний сонсох дуртай дуу боллоо шүү дээ. Тус уран бүтээлийн талаар ярихгүй юу, шинэчлэн дуулах ямар байсан бэ?

          -Реппер Эбо “Хуучны дуу сэргээж, шинэчилж дуулдаг контент хийж байгаа. Би энэ дууг чамтай хамтарч дуулмаар байна” гэж санал тавьсан. Багадаа “Хэцүү анги” олон ангит киног үздэг, “Хэцүү байна” дуунд дуртай, сонсдог байсан учраас саналыг нь дуртай хүлээн авсан. Хоёр өдрийн дотор дуугаа шинэчлэн дуулж, бүрэн дуусгасан.

-Багадаа ямар хүүхэд байсан бэ?

         -Багадаа нэлээн хөдөлгөөнтэй, сахилгагүй хүүхэд байсан. Насанд хүрсэн ч багын зангаа тавиагүй, хөдөлгөөнтэй хэвээрээ. Цэцэрлэгт байхаасаа урлагт дуртай, ямар л урлагийн тэмцээн байна бүгдэд нь оролцдог байсан. Идэвхтэй оролцсон ч шалгардаггүй байсан болохоор өөрийгөө “Авьяасгүй юм байна” гэж бодож, их гуниглана. Гэхдээ тэр үед ээж минь намайг урамшуулж, дэмждэг байсан болохоор бүр мөсөн шантраагүй.                                                       

-Дууныхаа үгийг өөрөө бичдэг гэсэн шүү  дээ . Ямар үед дууны үг хамгийн сайн бичдэг вэ?

         -Бүх дууныхаа шүлгэн дээр өөрөө ажилласан. Уран бүтээл дээр ажиллаж, дууныхаа үгийг бичье гээд суухаар нэг л болж өгдөггүй. Гэтэл машин барьж байхад, хол замд гарах үед, өдөр тутмын ажлуудаа хийж байхад гэнэт дууны үг, шинэ санаа орж ирдэг. Их сонирхолтой, чихэнд аялгуу нь сонсогдоод л ирдэг.

-Уран бүтээлдээ ямар хэв шинж шингээхийг боддог вэ. Бусад уран бүтээлчээс ялгарах онцлог тань юу вэ?

             -Миний амьдралд тохиолдсон зүйл надад ямар мэдрэмж, ямар сургамж өгсөн талаар дуундаа шингээхийг илүү зорьдог. Ямар туршлага хуримтлуулж, ямар адал явдал туулж байгаагаа бүтээлдээ үлдээхийг хүсдэг гэх үү дээ.

-Та уран бүтээлүүдээ ихэвчлэн англи хэлээр дуулдаг шүү дээ. Эх хэлээрээ уран бүтээл хийх бодол бий юү?

             -Анх дууны үг бичиж эхлэхдээ л англи хэл дээр бичих нь илүү амар байсан. Учир нь, зарим сэтгэл хөдлөл илэрхийлсэн үгийг монголоор бичихэд утга нь алдагдаж, жаахан төвөгтэй болдог. Гэхдээ монгол хэлээрээ дууны үг бичих чадвараа сайжруулж, шинэ уран бүтээл хийж байгаа.

-Хөгжим тоглох, дуу дуулах үедээ авдаг мэдрэмжээ илэрхийлбэл?

            -Үгээр хэлэмгүй мэдрэмж байх. Орчлон ертөнцөөс тасарч, хийсвэр ертөнцөд очоод хөвж байгаа юм шиг сэтгэлд тухтай, жаргалтай мэдрэмж авдаг. Тэр өдөр жаахан тааруу өнгөрсөн байвал дуу хөгжим намайг яг л эмч  шиг анагаадаг.

-Та юунаас хамгийн их сэтгэл ханамж авдаг вэ?

            -Би хайраас хамгийн их сэтгэл ханамж мэдэрдэг. Бүх зүйлийг хайрлах хайраас хамгийн гоё мэдрэмж авдаг. Надаас гарсан дуу, аялгуу, үг бүр хайраас үндэслэдэг.

-Ихэрсувдыг илэрхийлэх зүйлсийн талаар яривал. Таныг юу юу хамгийн сайн илэрхийлэх бол?

         -Өөрийнхөөрөө, дэггүй зан чанар намайг хамгийн сайнаар илэрхийлдэг байх. Мөн зүрхнээс минь хайртай хамт гарч буй дуу хөгжим намайг илэрхийлнэ.

-Таны ойрын төлөвлөгөө, зорилго юу вэ?

          -Олон төлөвлөгөө байгаа. Тун удахгүй дүрсжүүлсэн шинэ дуугаа сонсогчдодоо хүргэнэ. Мөн шинэ уран бүтээлүүдээ гаргахаар завгүй ажиллаж байна даа.