Нүүрсний хулгайчдын нэрсийг зарлаж, хариуцлага хүлээлгэхийг шаардсан иргэдийн жагсаал үргэлжилж байна. Жавар тачигнасан өвлийн улиралд Сүхбаатарын талбайд эсэргүүцлээ илэрхийлж буй залуусын нэг Б.Бат-Очиртой ярилцлаа. Түүний ярилцлага авч буй сэтгүүлчийнхээ бээрсэн гарыг дулаацуулж байгаа дүрс бичлэг цахим орчинд тавигдаж, сайшаал хүртээд байгаа билээ.

-Танд энэ өдрийн мэнд хүргэе. Цахим сүлжээнд ярилцлага авч буй сэтгүүлчийнхээ гарыг дулаацуулж байгаа дүрс бичлэг нь тавигдсан шүү дээ. Тухайн үед юу болсон юм бэ?

        -Биднийг талбай дээр жагсаж байх хугацаанд оройн цагаар ярилцлага хийхээр ирсэн хүн байгаагүй юм. Харин хоёр хоногийн өмнө Монголын үндэсний радио телевизийн сэтгүүлч шөнийн сурвалжилга хийхээр ирсэн. Бид гадаа хонож байгаа учраас зузаан хувцас өмссөн байсан ч ярилцлага авахаар ирсэн ах нимгэн хувцастай байсан. Яриа өгч байх үед сэтгүүлчийн гар бээрч, чичрэхийг харсан. Тэр хүний гар даарч байгааг мэдсээр байж гарыг нь дулаацуулж өгөхгүй юм бол миний сурсан эрдэм юу болох юм бэ. Хүн хүнээ хайрлах сэтгэлтэй байх хэрэгтэй. “Нөхрийн хэрэг бүтвэл, өөрийн хэрэг бүтнэ” гэдэг шиг надаас ярилцлага авах гэж ирээд, даараад зогсож байхад урд нь зогсож байгаа би дулаацуулахгүй юм бол өөр хэн дулаацуулах юм.

-Эсэргүүцлээ илэрхийлж байгаа иргэдийг мөнгө авч жагсаалд оролцож байгаа гэсэн мэдээлэл цахим сүлжээнд тавигдаад байгаа. Энэ асуудал дээр ямар байр суурьтай байгаа вэ?

    -Миний бодлоор шударга, үнэнийг амархан харлуулж чаддаггүй юм. Учир нь тэр зүйл үнэ цэнтэй, амьтай байдаг. Хүний хандлага мэдрэгддэгтэй л адилхан хүний мэдрэмж худлаа хэлдэггүй юм. Би өөрийгөө мундаг тэмцэгч гэж онгирохгүй. Хэзээ нэгэн цагт дахин жагсах хэрэг гарах үед жинхэнэ тэмцэгч болсон байж магадгүй.

-Нүүрсний хэрэгтэй холбоотой 17 хүний нэрийг зарлалаа шүү дээ. Жагсаал цаашид хэрхэн үргэлжлэх вэ?

    -Нүүрсний хулгайтай холбоотой бүх хүний нэрийг зарлуулж, шийтгэлийг нь хүлээлгэх хүртэл жагсаал үргэлжилнэ. Мөн авлига, албан тушаалтай холбоотой хуульд өөрчлөлт оруулахаар шаардлага хүргүүлсэн. Бидний хүссэнээр хуульд өөрчлөлт орох юм бол тэр нь жагсагчдын хувьд нэг амжилт юм. Урьд нь хөөн хэлэлцэх хугацаатай,  3-5 жил хорьдог эсвэл 40 сая төгрөгөөр торгоод өнгөрдөг байсан бол хуульд өөрчлөлт оруулснаар эд хөрөнгийг нь  хурааж, 15-18  жилийн ял оноодог болж өөрчлөгдөх нь байна. Би жагсаалд оролцож байгаа залуусыг өмнө нь нэг ч удаа харж байгаагүй, танихгүй. Бид тэмцлээ үр дүнд хүргэхийн тулд чадах чинээгээрээ хамтарч байгаа. Сүхбаатарын талбай дээр жагсаж байгаа залуус үзэл бодлоороо нэгдсэн.

-Өмнө нь жагсаал, цуглаанд оролцож байсан уу. Монгол Улсад өрнөж байсан жагсаалуудаас энэ удаагийн жагсаалын онцлог юу вэ?

    -Эх орондоо ирээд гурван сар болж байна. Цахим  сүлжээнээс "Арванхоёрдугаар сарын 4-нд жагсаал хийнэ" гэсэн мэдээг харсан. Заавал энэ жагсаалд оролцож, дуу хоолойгоо нэгтгэх хэрэгтэй гэж бодсон учраас ирсэн. Миний хувьд анх удаа жагсаалд оролцож байгаа. Анх юу хийхээ мэдэхгүй “Сүхбаатарын талбай дээр очиж үзэл бодлоо илэрхийлэх ёстой” гэсэн бодолтой ирсэн. Олон өдөр жагссаны дараа хэрхэн тэмцдэг талаарх ойлголттой боллоо. Эсэргүүцлээ илэрхийлж байгаа залуусын дунд удирдагч гэж байхгүй, бүгд чаддаг зүйлээрээ оролцож байгаа. Засгийн газар тэмцэгч залуусыг “Ингэж байгаад больчихно” гэсэн хандлага гаргаж байгаа юм шиг санагдсан. Гэхдээ энэ удаа өөр байх болно, бид эцсийг нь хүртэл явна.

-Гадаа хүйтэнд удаан зогсож байгаа шүү дээ. Эрүүл мэндэд нь ямар нэгэн байдлаар сөрөг нөлөө үзүүлсэн үү?

    -Ханиад хүрсэн, хэд хоног халуурлаа. Гэхдээ өвдлөө гэж хойш сууж, гэртээ харьсангүй. Би ирэхээ больчихвол “Энэ хүн ирэхгүй байж болж байгаа юм чинь би ч гэсэн ирэхгүй байж болох юм байна” гэж бодоод ирэхээ больчихвол жагсаалын хүч суларч магадгүй шүү дээ. Гэр барьж өгсөн ч  орохыг хүсээгүй. Би эрхлэх гэж бус тэмцэх гэж ирсэн. Иргэдээсээ хоол, хувцас хэрэглэл авч, урмын үгээр тэтгүүлж байгаа би гэрт ороод тайван унтаж чадахгүй шүү дээ.

-Япон Улсад суралцаад ирсэн юм билээ. Гадаадад суралцаж байх хугацаандаа Монгол Улсаа хэрхэн хөгжүүлэх талаар бодсон уу?

    -Ядуу амьдралаасаа салахын тулд Япон Улсыг зорьсон. Очоод олон төрлийн ажил хийж үзлээ. Ганцаардаж, гологдож, шилэгдэж үзсэн. Цаг хугацаа өнгөрөхийн хэрээр олон зүйл сурч мэдсэн. Эх орондоо амьдрахаар ирж байгаа минь нэг талаараа Монгол Улсаа хөгжүүлэхэд нэмэр болж байгаа юм. Япон Улс руу ядуу амьдралаасаа салах гэж яваад, ядуу сэтгэлгээнээсээ салаад ирсэн. Сурч мэдсэн, давж туулсан туршлагаараа улсдаа хувь нэмэр оруулна.

 -Ярилцлага өгсөн танд баярлалаа.

        -Баярлалаа.