“Гарыг чинь дааруулахгүйн тулд
Чиний бээлий болъё
Ганц үнсэлт авахын тулд
Намгийн ногоон мэлхий болъё” хэмээх дуугаараа олны танил болсон залуу уран бүтээлч М.Тайжинтай ярилцлаа. Тэрбээр дууныхаа үгийг өөрөө бичихийн зэрэгцээ аялгууг нь ч зохиодог гэнэ. Мэдрэмжээ дуу хөгжмөөр илэрхийлж, залуусын хайр, хүндэтгэлийг хүлээгээд буй залуу уран бүтээлч М.Тайжиныг уншигчтай тантай "уулзуулж" байна.

-Танд энэ өдрийн мэнд хүргэе. Хоёулаа таны анх хэрхэн дуу хөгжимтэй амьдралаа холбосон түүхээс риагаа эхлэх үү дээ?

    -Багаасаа дуу дуулах дуртай хүүхэд байлаа. Дуучин болохоор шийдэхэд багын хүсэл эрмэлзэл маань нөлөөлсөн байх. Хаана ямар л дууны уралдаан тэмцээн болж байна бүгдэд нь оролцохыг хичээдэг хүүхэд байсан. Найрал дуугаар дөрвөн жил хичээллэсэн.

-Дууныхаа үгийг өөрөө бичдэг гэж сонссон. Зөвхөн дуу дуулах төдийгүй шүлэг, яруу найрагт дуртай, бичдэг хүү байв уу?

    -Дууныхаа үгийг өөрөө бичдэг. Бичдэг болоод гурван жил л өнгөрч байна. Багадаа шүлэг бичдэг байсан минь хожим дууны үг бичихэд их нөлөө үзүүлсэн гэж боддог.

-Та дуугаа хэрхэн бүтээдэг юм бэ. Дуунуудыг тань сонсож байхад хувь хүн гэхээсээ илүүтэй бусдад зориулж, өөр хүний тухай дуулсан бүтээлүүд шиг санагдсан?

    -“Дааруулахгүй”, “Уйлуулмааргүй” дууг хүнд зориулж бичиж байсан. Тухайн үедээ мэдэрсэн мэдрэмжээрээ л бичиж байсан юм. Би эхлээд хөгжмөө сонсоод дараа нь үгээ зохиодог. Хөгжмөө сонсоод өөрийн мэдрэмж, дурсамжаа дууны үг болгон буулгадаг. Одоогоор нийт 50 гаруй уран бүтээл хийсэн. Өөр өөрийн гэсэн онцлогтой бүтээлүүдээ тун удахгүй олон нийтэд түгээж эхэлнэ.

-Анхныхаа уран бүтээлийг цахим орчинд хуваалцахаар шийдсэн үеэ дурсахгүй юу?

    -Одоогоос 3-4 жилийн өмнө реппер Roockie ахын уран бүтээлийг их сонсдог байсан юм. Тэр үед “Яагаад надад боломж байхгүй гэж” бодсон, тэгээд  дуу хийхээр шийдэж байсан даа. Тэгэхэд дууныхаа үгийг зохиох  гэж бөөн юм болдог байлаа.

-Ямар нэгэн продюсер, студитэй хамтарч ажилладаг уу?

    -Би дууны үг болон аялгуун дээр өөрөө ажилладаг. Одоогоор  ах дээрээ хоолойгоо бичүүлж, хөгжмөө хийлгэдэг. Төрсөн ах маань продюсер учраас бага зэрэг давуу тал болдог.

-Цахим орчинд анхны уран бүтээ цацчихаад ямар мэдрэмж авсан бэ?

    -Цахим сүлжээнд анхны дуугаа нийтлэхдээ 14 настай байлаа. Дуугаа тавиад хэдхэн хоногийн дараа гэхэд 10 мянган хандалт давчихсан байсан. Тэр дундаас намайг дэмжсэн хүн нь илүү олон байсан учраас дахиад уран бүтээл хийх урам зоригтой болсон.

-Дуучин O.Z-тэй хамтран бүтээсэн “Уйлуулмааргүй байна” дуу олон хүнд хүрсэн. "Уйлуулмааргүй байна" дуу хэрхэн бүтсэн тухай түүхээс манай уншигчидтай хуваалцахгүй юу?

    -Дуучин O.Z манай ахын найз байгаа юм. Ахынхаа студи дээр хоолой бичүүлж байгаад анх танилцаж байлаа. “Уйлуулмааргүй байна” дууг би хавар зохиосон. Миний анхны хамтарсан уран бүтээл болсон.

-Хүмүүс урлагийн хүн байх хэцүү гэж ярьдаг. Дуучин болох гараагаа амжилттай эхлүүлсэн залуу уран бүтээлчийн хувьд ямар бодолтой байдаг юм бэ?

    -Миний бодлоор урлагийн хүн байна гэдэг хүмүүсийн шүүмжлэл, итгэлийг даах чадвартай, олон нийтийн газар биеэ зөв авч явдаг хүн байх ёстой юм байх. Энэ бүгдийг давж чадвал урлагийн хүн болж чадах байх. Урлагийн хүн болохоор суралцаж байна даа.

-Тайзан дээр өөрийнхөө уран бүтээлээ хүнд хүргэх ямар байдаг вэ?

    -Өөрийнхөө байх ёстой газартаа байгаа гэдэг ээ мэдэрдэг. Хүн бүрийн нүд над дээр тусаж байхад өөрийгөө гялалздаг. Миний байж чадах хамгийн тайван газар.

-Урлагийн чиглэлээр сурахыг хүсдэггүй юм билээ. Ямар чиглэлээр суралцахыг хүсдэг вэ. Өөр мэргэжил эзэмшсэн ч уран бүтээлээ хийнэ гэж боддог уу?

    -Дараа жил архитектур мэргэжлээр Итали эсвэл АНУ-ыг зорих төлөвлөгөөтэй байгаа. Миний хамгийн том зорилго суралцаж байгаа улсынхаа эх дээр нь уран бүтээлээ хийх зорилготой. Монголд байх хугацаандаа өөрийгөө томхон уран бүтээлд бэлдэж байгаа.

-Ярилцлага өсгөн танд баярлалаа.

    -Баярлалаа.