• Өнөөдөр 2024-03-29

ШИВЭЭСЧИН Ц.АНУЖИН: ҮҮРД ГЭДЭГ ҮГНИЙ НОТОЛГОО НЬ ШИВЭЭС

2022-10-15,   1859

       Загвар зохион бүтээгч мэргэжлээр сурдаг Ц.Анужинг шивээс сонирхогч залуус Doxy нэрээр нь андахгүй. Залуухан шивээсчин ирээдүйд аз жаргалтай амьдрахын тулд өчигдрөөсөө илүү  хичээх хэрэгтэйг өөртөө өдөр бүр сануулдаг гэсэн.

-Хамгийн анх ямар шивээс хийж байсан тухайгаас нь яриагаа эхлэх үү?

     -Шивээсний машин худалдаж авчихаад өөрийнхөө гар дээр инээмсэглэсэн эможи шивж байлаа. Гараа өргөхөд л над руу инээмсэглэж байгаа юм шиг. Би 16 настайгаасаа үйлчилгээний байгууллагад ажилласан. Үйлчлүүлэгчид шалтгаангүй загнаж, бухимдана. Өсвөр насны хүүхэд байсан учраас тэр бүрийг хүндээр хүлээж авна. Хэцүү санагдах бүрд инээмсэглэсэн шивээс минь надад “Үргэлж хамт, хичээх ёстой шүү” гэж байгаа юм шиг санагддаг байлаа. Өөр хүнд гэвэл цар тархлын үед найз залуудаа шивээс хийж байлаа. Тэр үед “Одоо хийж байгаа шивээс муухай болбол ирээдүйд сайн шивээсчин болж байгаад хамгийн гоёыг нь хийж өгнө” гэж өөртөө амласан. Анх удаа хүн дээр хийж байгаа учраас айдастай, цахим сүлжээнээс үзсэн мэдлэгтэйгээр л шивээсээ хийж байлаа. Хүний бие дээр бүтээл туурвиж байгаа учраас тайван, өөртөө итгэлтэй ажиллах ёстой гэдгээ л сайн мэдэж байсан.

-Шивээсчин болохоор шийдсэн түүхээсээ хуваалцаач?

       -Надад зураг зураад сууж байдаг, насаараа зөвхөн зураг зурж амьдармаар санагдаж байсан үе бий. Найз минь нэг удаа “Чи зурах дуртай юм чинь шивээс чамд яг тохирно” гэсэн. Тэгээд л шивээсний машин авсан хэрэг. Студи нээх хүртэл 4-5 сарыг шивээс хэрхэн хийхэд суралцахад зарцуулсан.

-Гэр бүлийнхэн нь шивээсчин болно гэдгийг нь хэрхэн хүлээж авсан бэ?

    -Би гэрийнхэндээ “Шивээсчин боллоо” гэж хэлээд л шууд хиймэл арьсан дээр даалгавраа хийгээд суучихсан. Аавын хажууд минь суугаад сонирхон харж байсан харц мартагддаггүй юм. Тэгээд “Аав нь чамайг дэмжиж байна. Дуртай ажлаа хий. Гэхдээ өөрийнхөө бие дээр шивээс хийж болохгүй шүү” гэж байлаа. Аав намайг дэмжсэн учраас би тууштай үргэлжлүүлэх итгэлтэй болсон.

-Эмэгтэй шивээсчин гэхээр хүмүүсийн хандлага ямар болдог вэ?

    -Хүмүүс их гайхдаг, “Яагаад эмэгтэй хүн шивээс хийгээд байгаа юм” гэж асуусан хүн ч бий. Гэхдээ эрэгтэйгээсээ эмэгтэй нь юмыг илүү нямбай хийдэг гэсэн ойлголт байдаг учраас надаар шивээс хийлгэхийг хүсдэг хүн цөөнгүй. Намайг зорьж ирээд бие дээрээ үүрд байх шивээс хийлгэж байгаа хүмүүсийн аз жаргалтай харцнаас нь урам авч, маш ажлаа сайн гүйцэтгэхийг зорьдог.

-Өнөөдрийг хүртэл олон шивээс хийсэн байх. Тэр дундаас  таны хувьд хамгийн утга учир, үнэ цэнтэй нь аль вэ?

    -Одоогоор 30 орчим насны эмэгтэйд хийж өгсөн шивээс хамгийн үнэ цэнтэй байна. Нөхөртэйгөө ханилаад 13 жил болсон, дөрвөн хүүхдийн аав ээж байсан ч, нөхөр нь нас барчихсан. Нөхөртөө насан туршдаа хайртай, хэзээ ч мартахгүй гэсэн утгаар шивээс хийлгэмээр байгаагаа надад хэлсэн. Бид ярилцаад, цээжнийх нь зүүн талд зүрхтэй ойрхон хязгааргүйн тэмдэг болон нөхрийнх нь нэрний эхний үсгийг шивж байлаа. Харахад жижигхэн, энгийн шивээс мэт боловч хийсэн, хийлгэсэн хоёрт сайхан дурсамж болж үлдсэн.

-Таны хувьд шивээс ямар утга учиртай вэ?

    -Миний нэг гар бүтэн шивээстэй. Би шивээсийг өөртэйгөө мөнхөлж үлдээхийг хүссэн. Хүн бүрд шивээс өөр утгатай байх. Миний хувьд үүрд гэдэг үгний нотолгоо нь шивээс юм болов уу.

-Хүнд шивээс хийх үедээ ямар мэдрэмж авдаг вэ?

    -Амьсгалахгүй удаан байж байгаад амьсгалж байгаа юм шиг тайвширсан мэдрэмж авдаг. Хүн бүр дуртай зүйлээ хийхдээ ийм мэдрэмж авдаг байх.

-Таны амьдралдаа баримталдаг зарчим юу вэ?

    -Нэг зүйл эхлүүлсэн бол эцсийг нь үзэхийг хичээдэг. Залуу хүн гээд юм болгонд хайнга, хөнгөн хандаад, “Залуу хүн алдаж болно” гэдэг үгээр өөрийгөө хаацайлахыг хүсдэггүй.

-Залуучууддаа хандаж хэлэхийг хүсдэг үг бий юү?

    -“Залуу нас ганцхан олдоно” гээд өнөөдрөөрөө амьдарч болохгүй шүү. Ирээдүйд аз жаргалтай амьдрахын тулд өнөөдрөөс хичээгээрэй, “Хүн юу тарина түүнийгээ хураана” гэдэг учраас одооноос эхлээд өөртөө хэрэгтэй гэж бодсон зүйлдээ илүү их цаг зарцуулаарай.



 


ШИВЭЭСЧИН Ц.АНУЖИН: ҮҮРД ГЭДЭГ ҮГНИЙ НОТОЛГОО НЬ ШИВЭЭС
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2
  • Сэтгэгдэл үлдээсэн: 2022-12-26 05:48:56
    Ganaa.: durlatsooo daanch naiz zaluutai ym shig baina.odoo zugeer crushilhaas.
  • Сэтгэгдэл үлдээсэн: 2022-10-16 21:55:38
    Bayaraa: mundag shiweeschindee bayarlaj yawdag goe shiwees hiij ogsond
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188