“Зурвас” уран сайхны кино тун удахгүй нээлтээ хийх гэж байна. Залуухан уран бүтээлчдийн сэтгэл, оюун бодлоо нэгтгэн урласан тус киноны гол дүрийг бүтээсэн жүжигчин Г.Эрдэнэболдтой ярилцлаа. Тэрбээр 2017 оноос хойш тайз, дэлгэцийн уран бүтээлүүдэд туслах болон гол дүр бүтээхээс гадна туслах найруулагчаар ажиллаж өөрийгөө давхар хөгжүүлж байгаа залуу уран бүтээлч билээ.

-Танд энэ өдрийн мэнд хүргэе. Жүжигчин мэргэжлийг сонгосон тухайгаас нь яриагаа эхлэх нь зүйтэй болов уу?

    -Би дөрөвдүгээр ангиасаа дуулсан. Арван жилдээ хамтлагтай байлаа. Соёл урлагийн их сургуульд  дуулаачийн ангид  шалгалт өгөх гээд судалж эхэлсэн. Гэтэл гэнэт л надад жүжигчин мэргэжил хүнийг илүү задалж, хөгжүүлдэг юм шиг санагдсан. Тэр нь миний сонирхлыг их татсан хэрэг л дээ. Ингэж л жүжигчин мэргэжлээр суралцах болсондоо. Намайг урлагийн хүн болоход хамгийн их дэм болсон Дорноговь аймгийн Сайншанд сумын Зүүнбаян багын сургуулийн хөгжмийн багш МУСТА П.Оюунцэцэг болон бусад багшдаа талархаж явдаг.

-Дуучин болохоор шийдсэн байж шүү дээ. Жүжигчин мэргэжил сонгохдоо хэр итгэлтэй байсан бэ?

    -Итгэлтэй болох хүртлээ бэлтгэл хийсэн. Элсэлтийн ерөнхий шалгалтаа өгчхөөд СУИС-д ур чадварын шалгалт өгөхөөр мэргэжлийн жүжигчнээс 14 хоногийн сургалт авч байлаа. Гэхдээ Соёл урлагийн их сургууль дээр шалгалт өгөх гэж ирээд сүрдсэн шүү. Надтай адил хүсэл мөрөөдөлдөө хөтлөгдөөд ирсэн сайхан охид, залуучууд байсан. Ирсэн зорилгоо ч биелүүлж, жүжигчний ангид амжилттай элссэн дээ.

-Олон киноны туслах дүрд ажиллаж, тушлага хуримтлуулж байв уу?

    -Оюутан байхаасаа "Нийслэл хүүхэн", "Зура", "Single Ladies 4" зэрэг киноны арын албанд ажиллахаас эхлүүлээд олны хэсэг, туслах дүрд нь ажиллаж байлаа. 2021 онд “Search” олон ангит киноны гол дүрд тоглосон.

-Нээлтийн товоо зарлахаар бэлдэж байгаа “Зурвас” уран сайхны кинон дээр ажилласан дүрийнхээ талаар яривал?

    -Би цэрэгт татагдаад удаагүй шинэ цэргийн дүр дээр ажилласан. Багаасаа аав ээжгүй өссөн, ахыгаа ямар айлд өргүүлснийг мэдэхгүй, шинэ цэрэг учраас дээд оны ах нараасаа их зүйл сонсож, суралцдаг, дархан хил гэж ямар үнэ цэнтэйг мэдэрсэн залуугийн дүр байлаа. Миний бодлоор бид ганц л олдох энэ амьдралаа үргэлж хайрлах ёстой юм шиг санагдаг. Учир нь, бидний эрүүл энх, аюулгүй байдлын төлөө нүдээ ч цавчилгүй энхийн манаанд зогсож байгаа тэдгээр эр цэргүүдээ хүндэтгэн бид ч гэсэн өөрсдийнхөө аюулгүй байдлыг хангах ёстой гэж боддог.

-Хилийн цэргийн 0243 дугаар ангид зураг авалтаа хийсэн юм билээ. Хүссэн үедээ очоод үзэж болохгүй бүсэд очих ямар байсан бэ?

    -Төмөр тортой хашааны цаана Монгол Улсын халдашгүй дархан хил байгаа гэж бодох сонирхолтой юм билээ. Оросын Холбооны Улс болон Монгол Улсын хилийг илтгэсэн хоёр цементэн багана өөд өөдөөс хараад байрлаж байхыг харах үнэхээр сайхан сүрдэм мэдрэмж өгдөг. Хилийн зурвасаа харахын тулд хэсэгхэн ой модыг чөлөөлчихсөн, ялангуяа намрын улиралд очсон болохоор байгалийн үзэмж илүү сайхан байсан.

-“Зурвас” киноны таны ажилласан дүрээр ямар сэтгэл хөдлөл, зан чанарыг төлөөлүүлэн гаргахыг зорьсон бол?

    -Амьдралын зовлон бэрхшээл, сайн бүхнийг үзэж яваа залуугийн дүр. Тушаал авсан цэрэгт байх ёстой ном журмыг биелүүлж байгаа залуу. Миний хувьд энэ дүрийн хэлдэг онцлох өгүүлбэр бий. “Би өнчин өчсөн учраас хүчээр шахуу цэргийн албанд ирсэн ч харамсахгүй байна. Учир нь, энд олон ах, эгчтэй болж, амьдралын найзтай болж байна” гэх хэсэг бий.

-Цэргийн сэдэвтэй киноны дүрд тоглоход бэрхшээл байв уу?

    -Миний хувьд цэргийн алба хаагаагүй. Гэхдээ гэр бүлийн гишүүн дунд цэргийн хүн цөөнгүй учраас тодорхой хэмжээний сонссон мэдлэг, туршлагатай очсон. Надад морь унах, буу зэвсэг ашиглах гэхээсээ илүү бэрхшээлтэй байсан асуудал нь захны давуу оёх байлаа. Хамтран тоглосон жүжигчдээсээ ихээхэн тусламж авсан.

-"Зурвас" кинонд тоглох саналыг хэрхэн хүлээж авсан бэ. Таны өмнө нь бүтээсэн дүр сахилгагүй хөвгүүний дүр байсан шүү дээ?

    -Цэргийн дүрд тоглох саналыг үнэхээр сэтгэгдэл өндөр хүлээж авсан. Надад итгэж өгсөн дүр учраас чадан ядан тоглохыг хүссэн. Өмнө нь тоглосон “Search” киноны дүр бол амьдрал дээр байдаг, ажиглагддаг үйл явдлыг уран сайхны хэтрүүлэгтэйгээр хүнд ойлгуулахыг хүссэн гэж хардаг.

-Дууны клипэнд ажиллах, кино тайзны уран бүтээл дээр ажиллахаас хэр өөр байдаг вэ?

    -Найруулагчаас миний дүрийн гаргах өгүүлэмжийг надад тайлбарлаж, зааварлаж өгдөг. Гэхдээ кино, тайзны уран бүтээлээс онцгойрох зүйл нь би нэг ч өгүүлбэр хэлэхгүйгээр, царай, үйл хөдлөлөөрөө хүмүүст тухайн дүрийг хүнд юу хэлэх гээд байгааг ойлгуулах ёстой. Энэ нь нэг талаар намайг сорих шалгуур болж байгаа юм.

-Энэ жилийн наадмын нээлтийн ажиллагаанд туслах найруулагчийн үүрэг гүйцэтгэсэн. Жүжигчин хүний хувьд найруулагчаар ажиллах ямар байв?

    -Том аз, завшаан тохиосон гэж харж байгаа. Хоёр багшийнхаа туслах найруулагчаар нь ажилласан. Миний хувьд олон төрлийн ажил хийдэг 1000 гаруй хүнтэй харилцаж, ажилласан учраас хүнтэй харьцах чадвар маань улам нэмэгдсэн юм шиг санагдсан. Өргөн хүрээг хамарсан үйл ажиллагаанд гар бие оролцсон маань нэр төрийн хэрэг болсон.

-Цаашид кино уран бүтээл дээр найруулагчаар ажиллах төлөвлөгөө бий юү?

    -Ерөнхий найруулагчаар ажиллахгүй ч арын алба, туслах найруулагчаар нь ажиллах боломж олдвол тухайн боломжийг зүгээр өнгөрүүлэхгүй. Гэхдээ мэргэжлийнхээ дагуу жүжигчнээрээ ажиллах илүү сонирхолтой.

-Тайзны уран бүтээлийн дүрд ажиллах зорилго байдаг уу. Таны хувьд бүтээхийг хүсдэг дүр бий юү?

    -Кино уран бүтээлд би алдаа гаргавал дахин нэг удаа жүжиглэж, бичүүлэх боломжтой. Миний тоглосон киног үзэгчид өргөн дэлгэцээр дамжуулан үздэг. Харин тайзан дээр гараад надад алдах эрх байхгүй. Миний жүжиглэлтийг үзэгчид шууд хүлээн авч, хариу үзүүлдэг. Би хүний сэтгэлд үлдсэн этгээд дүрд ажиллахыг хүсдэг. Тоглосон киног маань үзээд миний ажилласан дүрийг үзэн ядаж, жихүүцэх хэмжээний дүр дээр ажиллахыг хүсдэг.

-Залуу уран бүтээлчийн хувьд бусдадаа бяцхан зөвлөгөө хүргээч гэвэл?

    -Ямар ч мэргэжлээр төгссөн, ажиллаж байгаа хүний хувьд баг, хамт олон гэдэг хамгийн чухал. Нэг хүсэл зорилго дор нэгдэж чадах хүмүүсийг олох хэрэгтэй. Анд гэдэг үг аав, найз, дүү гээд бүх л хүнийг илтгэдэг юм шиг санагддаг.

-Ярилцсанд баярлалаа.

    -Баярлалаа.