“Kpop world festival 2022” олон улсын тэмцээний дууны төрөлд тэргүүн байр эзэлсэн Я.Эгшиглэнтэй ярилцлаа. Дуу хөгжимд хайртай 18 настай охины мөрөөдөл  биелж эхлэхэд “Би зүүдлээд байна уу даа” хэмээн бодсон тухайгаа тэр ярьсан юм.

-“The Changwon K-Pop World Festival 2022” тэмцээний дууны төрөлд тэргүүн байр эзэлсэнд баяр хүргэе. Нэр хүндтэй тэмцээний тайзан дээрээс шагнал хүртэх үеийн мэдрэмжээсээ хуваалцахгүй юу?

    -Цомоо гартаа барих үеийн догдлол одоо ч мэдрэгдэж байна. Намайг тайзан дээр байгааг гэрийнхэн минь үзэх учраас сэтгэл үнэхээр хөдөлсөн. Олон өдрийн хичээл зүтгэлийнхээ үр дүнг үзэх гэж байгаа учраас илүү хичээх ёстой гэж бодсон.

-Өөрийнхөө үзүүлбэрийг бусад оролцогчоос юугаараа  илүү онцгой гэж харсан бэ?

    -Бусад оролцогч догь, хүчирхэг үзүүлбэр үзүүлэхээр бэлдэж байсан. Харин минийх илүү эмэгтэйлэг, эгдүүтэй зохиомжтой байсан. Гэхдээ түүнээс илүү миний авьяас чухал учраас дуулалтаараа онцгойрохыг хичээсэн.

-Хоолойныхоо өнгийг илүү тодотгосон дуу сонгосон юм шиг санагдсан. Дуулах дууны сонголтоо хэрхэн хийсэн бэ?

    -Дуулах боломжтой, өөрийнхөө хамгийн сайн дуулж чадах хоёр дууныхаа дүрс бичлэгийг явуулсны дараа тэмцээний арын албанаас нэг дууг нь сонгож өгсөн.

/Тус нэвтрүүлэг аравдугаар сарын 28-нд KBS телевизээр цацагдана/

-Дуулах дуртай хоёр дуугаа сонгосон гэлээ. Энэ нь тэмцээнд оролцоход давуу тал болсон болов уу?

    -Дуучин IU-гийн дуунд их дуртай. Бүх дууг нь сонсож, дагаж дуулдаг, өөрийнхөө тоглолтыг хийж байна гэж төсөөлж, бэлтгэл хийдэг байлаа. Одоо ингээд бодохоор төсөөлдөг байсан мөрөөдөл минь биелсэн байна.

-“The Changwon K-Pop World Festival 2022” тэмцээнд оролцоход бэрхшээлтэй зүйл нь юу байсан бол?

    -Дээд өнгөндөө санаа зовсон. Гэхдээ багш нарынхаа ачаар тэмцээндээ ямар нэгэн бэрхшээлгүй оролцлоо. Энэ тэмцээнд оролцсоноор өөрийнхөө чадварыг илүү дээшлүүлсэн.

-Олон улсын тэмцээний тайзан дээр гарахад, өмнө гарч байсан тайзнаас илүү сүрдмээр байсан болов уу?

    -Монголд байхдаа телевизийн нэвтрүүлгийн тайзан дээр гарч байсан юм. Тэр үед миний үзүүлбэрийг үзээд хариу  үйлдэл илэрхийлэх үзэгч байгаагүй. Гэтэл “The Changwon K-Pop World Festival” бол огт өөр шүү дээ.Олон улсын тэмцээн учир төсөөлөшгүй том тайз, олон үзэгч угтсан. Монгол Улсынхаа нэрийг гаргаж байгаа болохоор сандарсан ч тайван байж, тэмцээндээ оролцсон. "Дараа нь алдартай уран бүтээлч болчихоод, энэ тайзнаа дахин гарч үзүүлбэр үзүүлнэ дээ" гэж өөртөө амласан.

-Өөр улсын оролцогчидтой тэмцээний бэлтгэл хийх сонин байсан болов уу. Харилцан туршлага судлах том боломж гарч ирсэн байх даа?

    -Тун сонирхолтой бөгөөд олон дурсамж, туршлага хуримтлуулсан цаг хугацаа байлаа. Оролцогчид хоёр долоо хоногийн өмнөөс хамтдаа амьдарч, бэлтгэл хийсэн. Бүгд өөр, өөр улсаас ирсэн  ч сонирхол нэгтэй учраас хурдан дотноссон. Би англи хэлнээс илүү солонгос хэлдээ сайн учраас тэмцээний арын албаныхантайгаа их ойр байсан. Оролцогчид бүгд нэгнээсээ суралцаж, нэгэндээ зааж зөвлөсөн.

-Цэнхэр дэлгэцийн цаанаас хардаг алдартай уран бүтээлчдээ ойроос нь харсан үеийн мэдрэмж ямар байв?

    -Солонгос Улсын онгоцны буудалд буусан цагаас нэвтрүүлгийн багийнхан  яриа авч, дүрс бичлэг хийж эхэлсэн. Яг л төсөөлдөг байсан шиг ээ Алдартай дуучин болсон юм шиг санагдаж, догдолсон. Тоглолт эхлэхээс өмнө нэвтрүүлгийн найруулагч  “Дуучдыг хараад зургаа даруулъя гэж асууж болохгүй шүү.  Өөрсдөө яг дуучин шиг байгаарай” гэж хэлсэн .Гэхдээ тэмцээн эхлэхэд бүгд тэмцээндээ анхаарлаа хандуулж, хамт байгаа өнөө алдартай дуучид маань тийм ч сонин санагдахгүй байсан. Зүүд, мөрөөдөл төдий байсан зүйлс нүдний өмнө биелэж эхлэх хамгийн сайхан.

-Анх урлагт хэн хөтөлсөн бэ. Дуу хөгжимтэй холбогдсон түүхээсээ хуваалцаж болох уу??

    -Аав маань их сайхан дуулдаг, дуу хөгжимд ойр ажилладаг учраас урлагт дурлаж өссөн. Аавынхаа ажил дээр очоод л мундаг том дуучдын дуулахыг харж, дагаж дуулдаг хүүхэд байлаа. Бүжгээр хоёр жилийн өмнөөс хичээллэж эхэлсэн.

-Cherry Bomb бүжгийн хамтлагт байсан юм билээ. Хамтлагийнхаа тухай яриа дэлгээч?

    -Анх удаа өөртэйгөө ижил кпоп урсгалд сонирхолтой хүүхдүүдтэй танилцсан. Авьяаслаг бүжигчин хүүхдүүдтэй нэг хамтлаг болох үнэхээр сайхан бөгөөд өөрийгөө хөгжүүлэх гайхалтай боломж байсан. Одоо хамтлагаасаа гарсан ч гишүүдээ үргэлж дэмжиж, бахархдаг.

-“The Changwon K-Pop World Festival 2022” тэмцээнд оролцохоос өмнө дуу коверлон дуулж байв уу?

    -Цар тахад гарч, хөл хориотой байхад дуртай хамтлаг дуучдынхаа дууг коверлон дуулж эхэлсэн. Wendy melody цахим хуудсаар дамжуулан дуугаа олон нийтэд хүргэдэг.

-Мөрөөдлөө нэг шатаар ахиулж, олон улсын тэмцээнд амжилттай оролцлоо. Дараагийн шат юу байгаа бол?

    -Одоогоор “New sound” студитэй хамтран уран бүтээл гаргахаар ажиллаж байгаа. Цаашид ч энэ эрчээ алдахгүйгээр илүү хичээж, олон амжилт гаргахаар төлөвлөж байгаа.

-Ярилцлага өгсөнд баярлалаа.

       -Баярлалаа.