Бидний сэтгэлд хоногшсон Жинжиймаа киноны дууг Монгол Улсын Гавьяат Жүжигчин, дуучин Т.Ариунаа дуулж, бидэнд тодхон дурсамж үлдээсэн билээ. Тэгвэл тус дууг дуучин, реппер “Rafor” буюу Н.Наранмөнх шинэчлэн дуулж, сонсогчдоосоо сайшаал хүртээд байгаа билээ.

-Танд энэ өдрийн мэнд хүргэе. Жинжиймаа дууг шинэчлэн дуулсан шүү дээ. Тус уран бүтээлийн талаар ярихгүй юу?

    -Жинжиймаа дуу, кино хоёулаа олон хүний сэтгэлд тод үлдсэн дурсамж шүү дээ. Тиймээс “Monstar” болон “Сэрүүн” брэндийн хамтарсан “Monstar mix content” цувралд  Жинжиймаа дууг өөрийн хэв маяг, орчин цагтай уялдуулж өөрчлөөд, сонсогчдодоо хүргэсэн дээ. Таатай хүлээж авсан бүх хүмүүстээ талархаж байгаа.

-Хуучны сэтгэлд хоногшсон дуу шүү дээ. Шинэчилж дуулахаар хүмүүс хэрхэн хүлээж авах бол гэж бодсон уу?

    -Хэрхэн хүлээж авах бол гэсэн бодол байсан, гэхдээ маш бага. Учир нь бусдад заавал таалагдах албагүй гэж боддог.Миний оюун ухаан, сэтгэл зүрхнээс гарсан уран бүтээл, бүхэлдээ мэдрэмж сэтгэхүй шүү дээ. Дууны үгээ бичихдээ хүн бүхэн ойлгох бус, өөрийнхөө мэдрэмжээр мэдэрч, ойлгоосой гэж хүссэн.

-Зохиогчийн эрхтэй холбоотой асуудал гарсан уу?

    -Зохиогчийн эрхтэй холбоотой асуудал гараагүй ээ.

-Тус уран бүтээлийг сонгох шалгаан байсан уу?

    -Дуутай холбоотой дурсамж байдаг болохоор сонгосон.  Тухайн үеийг дурсахад цаг сайхан байдаг юм

-Сүүлийн үед ямар уран бүтээл дээр ажиллаж байгаа вэ?

    -Сүүлийн үеийн уран бүтээлийн хувьд шинэ содон хамтралууд болон цомог дээрээ л ажиллаж байна даа.

-Ямар уран бүтээлчтэй хамтарч уран бүтээл гаргахыг хүсдэг вэ?

    -Уран бүтээлийн тал дээр би монгол үндэсний хэв маяг, үнэт зүйлсийг шингээсэн, түүнийг орчин үеийн хэв маягтай нийцүүлж ямар нэгэн байдлаар уялдуулан илэрхийлэхийг хүсдэг. Тиймээс хамтрахыг битүүхэндээ хүсдэг гэвэл та бидний мэдэх “The Hu” хамтлаг байна даа.

Би өөрийнхөө дуртай зүйлийг хийнэ, хэн нэгэнд ойлгогдож аль эсвэл сайшаагдах алба үгүй

-Анх уран бүтээлч болохоор шийдэж байсан үеэ дурсахгүй юу?

    -Уран бүтээлч, артист болно гэж огт боддоггүй байлаа. Хүүхэд наснаасаа л дуу хөгжимд дуртай, өөрөө ч дуулдаг байсан. Тиймээс уран бүтээлч больё гэж шийдэж, шийдвэр гаргаж  үзээгүй. Би ч өөрийгөө дуучин гэж хэлэхгүй, тэгж боддоггүй. Дурласан зүйлдээ бүхнээ зориулж, тууштай шат ахиж буй энгийн нэгэн залуу л гэж боддог. Ер нь өөрийгөө магтаж, цоллох дуртай хүн биш гэх үү дээ. Дуртай зүйлдээ л дурласан.  

-Анхны уран бүтээлээ гаргах үеийн мэдрэмжээсээ хуваалцвал?

    -Анхны дуугаа цацсан үеэ маш сайн санадаг, арга ч үгүй байх. Ямар ч зүйлд сайн муу талууд харилцан адилгүй оршдог гэж боддог. Тиймдээ ч анхны дуугаа цацсаны дараагаар хүмүүсийн сэтгэгдлүүдийг их сонирхож уншдаг байсан. Сайн, муу аль алийг нь хүлээн авч, магадгүй эмзэглэж байсан үе тэр л үе байх. Тэгээд л ойлгосон. Хүмүүст заавал таалагдах албагүй гэдгийг. Түүнээс хойш “Би өөрийнхөө дуртай зүйлийг хийнэ, хэн нэгэнд ойлгогдож аль эсвэл сайшаагдах алба үгүй” гэдэг байр сууринаас ханддаг болсон доо.

-Залуу реппер, артистууд олон болсон шүү дээ. Тэднээс юугаараа онцгойрохыг хүсдэг вэ?

    -Залуу уран бүтээлчид олонтой болж байгаатай санал нэг байна. Тэд бүгд онцгой гэж би хардаг. Учир нь хүн бүрийн өөрийгөө илэрхийлэх хэлэмж өөр өөр байдаг. Минийх ч өөр, би тэднээс онцгойрохыг хүсдэггүй ч адилхан байхыг хүсдэггүй. Өөрийнхөө ертөнцдөө л онцгой нэгэн байхыг хүсдэг.

-Хөгжмийн фестиваль, тоглолтуудад оролцоход ямар байдаг вэ?

    -Маш сайхан бас тайван санагддаг. Энэ л миний хийх ёстой ажил, байх ёстой газар гэж тайзандаа хэлдэг. Би ерөөс их дуу цөөтэй хүн. Тиймээс дуугаараа л ярьдаг гэхэд буруудахгүй байх аа.

-Дуунд дуртай ч дуучин болох талаар бодож байгаагүй гэсэн. Тэгвэл ямар мэргэжил эзэмшсэн бэ?

    -Кино найруулагчийн мэргэжлийг эзэмшсэн.

-Эзэмшсэн мэргэжил нь уран бүтээл хийхэд тус болж байв уу?

    -Кино найруулагч мэргэжлийн хувьд бүгдийг төлөвлөн төсөөлж, урьдаас нэг биш нэлээд олон алхмын цаадхыг харах хэрэгтэй болдог. Мөн кино бол бүхэл ертөнц , тэнд дуу авиа ямар нэгэн байдлаар оролцож л байдаг. Нэг цаг 40 минутын киног гурван минутын дотор бүрэн илэрхийлж чадах цор ганц зүйл дуу хөгжим гэхэд хилсдэхгүй. Аймшгийн кино үзэж суухдаа дуу оруулсан хэсгээс нь л бид айдаг шүү дээ. Тиймээс аливаа зүйлс ямагт хоорондоо ямар нэгэн байдлаар хэлхээ хамааралтай байдаг гэж хардаг. Мэргэжил маань уран бүтээлүүдийн минь хувьд дуугаа найруулахад их тусалдаг гэх үү дээ.

-Кино найруулбал ямар жанрын уран бүтээл хийх талаар төсөөлж, төлөвлөж байв уу?

    -Би найруулагч гэхээсээ илүүтэйгээр кино продюсер болох нууцхан хүсэлтэй. Харин ямар уран бүтээл хийхээ кино продюсер болбол, тэр үедээ л бодох байх даа.

-Амьдралаас юуг чухалчилдаг вэ?

    -Одоо байгаа бүхнээ л чухалчилдаг.

-Ярилцлага өгсөнд баярлалаа.