Авьяаслаг монголчууд шоунд чөлөөт бүжгийн үзүүлбэр үзүүлж шүүгчид төдийгүй монголчуудын хайрыг татсан авьяаслаг хүү, охин хоёрыг санаж байгаа байх. Тус хамтлагийн гишүүн Б.Тэмүүлэн өдгөө бүжгийн урлагаа орхилгүй тууштайгаар хичээллэж, бүжгийн багшаар ажиллаж байна. Монгол бүжигчдийг дэлхийд таниулахыг хүсдэг түүнтэй ярилцсан ярилцлагаа танд хүргэе.

-Танд энэ өдрийн мэнд хүргэе. Авьяаслаг монголчууд шоунд оролцсоноор нь хүмүүс сайн таних байх.Тус тэмцээний талаар яривал

            -"Гэгээн алсын одод" хүүхдийн урлагийн их наадамд оролцож тэргүүн байрт орж байлаа. Түүнээс хэдэн жилийн дараа Авьяаслаг монголчууд шоу нэвтрүүлгийн анхны дугаарт найзтайгаа оролцож байлаа. Бидний тэмцээнд оролцсон шалтгаан, зорилго нь Монгол Улсад тайзны бүжгийг түгээн дэлгэрүүлэх, хүлээн зөвшөөрүүлэх байсан. Шилдэг найман оролцогчийн нэг болохын тул хичээсээ 2-3 сар чөлөө авч бэлдсэн. 

-Бяцхан оролцогчдын нэг байсан шүү дээ. Тухайн үеийн мэдрэмжээсээ хуваалцахгүй юү? 

          -Монгол Улсад зохион байгуулагдсан анхны том тэмцээн байсан байх. Шургуу бэлдсэн үзүүлбэрээ олон хүний өмнө үзүүлэх, үзүүлбэрийг минь ойлгож, дэмжиж байгаа нь гайхалтай байсан. 

-Бүжгийн урлагийг сонирхож эхэлсэн үеэ дурсахгүй юу? 

          -Багаасаа их хөдөлгөөнтэй хүүхэд байсан. Анх бүжиглэдэг байхдаа заримдаа гайхдаг байсан "ингээд багшийнхаа бүжиглэж байгааг хараад, дуурайж хөдлөх гол мөн чанар юм уу" гэж бодсон. Гэхдээ удалгүй багш нарынхаа бүжиглэж байх үедээ авдаг мэдрэмжийг мэдэрч эхэлсэн. Мөн тайзан дээр хүмүүсийн өмнө үзүүлбэр үзүүлэхэд намайг дэмжиж байгаа тэр дуу хоолой хамгийн сайхан нь.

-Өнөөдрийг хүртэл үргэлжлүүлсэн шалтгаан байдаг уу?

            -Миний амьдрал бүжигтэй салшгүй холбоотой болсон. Би кино найруулагч мэргэжлээр суралцаж байгаа. Бүжиглэж эхэлснээр илүү олон зүйл хийх боломжтой болсон. Ер нь урлаг хүнийг хүмүүжүүлдэг гэдэг үг үнэн юм билээ.

-Авьяаслаг монголчууд шоу нэвтрүүлгийн дараа амьдралд нь өөрчлөлт гарсан уу?

        -Илүү хичээнгүй болж, бүжгийн дэглэлтээ их хурдан сурч эхэлсэн. Тухайн үедээ олны анхаарлын төвд байсан учраас хийж байгаа үйл хөдлөлдөө их анхаардаг болсон байсан.

-Бүжиглэж байх үедээ царайны хувиралдаа их анхаардаг юм шиг санагдсан. Энэ талаар яривал?

          -Үнэхээр их анхаардаг байсан. Хийж байгаа хөдөлгөөн бүрээ амилуулах царайны хувирлыг гаргах гэж бэлддэг. Гэтэл бүжгийг ойлгоод эхэлсэн царайны хувирлыг тусгайлан бэлдэх бус чин сэтгэлээсээ бүжиглэх үе өөрөө гарч, хувирч байдаг зүйл гэдгийг ойлгосон. Миний сэтгэл хөдлөл л ил гарч байгаа хэрэг л дээ.

-Бүжгийн багшаар ажиллаж байгаа юм билээ. Багшлах ямар байна?

            -Бүжгийн багш болоод удаагүй байна. Бүжиг зааж байх үедээ өөрөө өөрийгөө бэлдэж байна. Хэрхэн хүнд юм заах вэ гэдгээ ойлгож мэдэж байгаа. Надаас бүжиг сурч байгаа хүүхэд яг надтай адилхан хөдлөхдөө бус өөрийн мэдрэмжийг давхар ил гаргаж байвал надад илүү таатай байдаг. Миний нэг хувилбар болоод ямар ч хэрэггүй шүү дээ. Хуур хөгжмийн наадамд манай баг бүрэн бүрэлдэхүүнтэйгээр ажиллаа. Найз охинтойгоо хамт бүжиглэдэг учраас нэгтэнтэйгээ ярилцаж, хамдаа асуудлыг шийддэг учраас их түшигтэй байдаг. 

-Удаан хугацааны бүжгийн бэлтгэлийн үр дүнд бүжиг бэлэн болж, хүмүүст үзүүлдэг шүү дээ. Бэлдсэн бүх зүйлсээ хүнд үзүүлэх тэр мөчид ямар мэдрэмж төрдөг вэ?

            -Гурван минутын бүжгийн үзүүлбэр үзүүлэхийн тулд 1-3 сар бэлтгэл хийдэг. Ая, бүжгийн дэглэлт, шилжилт хөдөлгөөн гээд олон зүйл бэлдэнэ. Тайзан дээр гараад үзэгчдээс авдаг тэр сайхан мэдрэмжээ алдахгүйн тулд өөрийгөө залхаахгүйгээр бэлтгэх хийхийг хичээдэг.

-Таны сэтгэлд дурсамж үлдээсэн тайз байдаг уу?

            -"Ub dance" фестивальд өөрөө бие даан бэлдэж шилдэг дөрөвт үлдэж байлаа.Тухайн үедээ гудамжны бүжгийг ойлгодог, мэддэг шүүгчдэд үнэлүүлж шилдэгт үлдэж чадсандаа их баярладаг.

-Бүжиглэж байх үедээ хүмүүст юу харуулахыг хүсдэг вэ?

            -Өөрийнхөө бүжиглэж байх үедээ авдаг сайхан мэдрэмжийг хүмүүст харуулахыг хүсдэг. Миний бүжиглэж байгааг хараад уур бухимдлаа орхиж тайвширдаг байвал сайхан. Миний туйлын зорилго монгол бүжигчдийн дэлхийд хүлээн зөвшөөрүүлэх.

-Шантарсан үе гарч байсан уу?

             -Шантарсан үе тийм ч олон байсангүй. Гэр бүл, бэртэл гэмтэл, сургуулиас шалтгаалаад шантарч байсан үе бий. Бүгдийг нь зэрэг амжуулж чадахгүй үедээ хойш ухарч шантардаг юм билээ. Гэхдээ тэр үеэ даваад гарсан.

-Танд хамгийн том шалгуур болсон зүйл байсан уу?

           -Амьсгаа задрах үе юм болов уу. Бахардаж унатлаа бэлтгэх хийх үе олон байсан.

-Бүхнийг цааш үргэлжлүүлэх эрч хүч авдаг зүйл тань юу вэ?

       -Мөрөөдөл, хүрээлэл, гэр бүлээсээ их эрч хүч авдаг. Хамт зүтгэдэг олон хүн байдаг учраас илүү хичээх шалтгаантай болдог.

-Залуучуудад хандаж хэлэхийг хүсдэг үг бий юү? 

         -Хүмүүс нэг зүйлдээ тууштай бай гэж хэлдэг. Хүсээгүй зүйлдээ тууштай байгаад ямар ч хэрэггүй. Тиймээс олон зүйл оролдож үзээд тэр дундаас яг өөрийн хийж чадах эцсийн зүйлээ олоод тухайн зүйлд зарцуулах цагаа зөв тооцоолж байгаарай. Соёлтой хүн байхыг хичээгээрэй, боловсролтой биш ч соёлтой байх хэрэгтэй. 

-Ярилцлага өгсөнд баярлалаа. 

        - Баярлалаа