О.Анирчулуу охин энэ жил Сант сургуулийн 12 дугаар ангид элсэн орно. Зургадугаар ангиасаа физикийн олимпиадуудад оролцож эхэлсэн тэрбээр саяхан болсон олон улсын физикийн олимпиадаас мөнгөн медаль хүртээд буй. Түүний хувьд өмнө жил олон улсын физикийн олимпиадаас хүрэл медаль хүртэж байсан бөгөөд ийнхүү амжилтаа ахиулжээ. Ингээд түүнтэй олон улсын олимпиадад гаргасан амжилт, хүсэл мөрөөдлийнх нь талаар ярилцсанаа  хүргэж байна.

-Олон улсын физикийн олимпиадаас мөнгөн медаль хүртсэнд баяр хүргэе. Энэхүү олимпиадад хэр хугацаанд бэлдсэн бэ?

    -Манай сургууль зургадугаар ангиас нь физикийн олимпиад, шалгалтад бэлдэж эхэлсэн. Тиймээс миний хувьд зургадугаар ангиасаа эхэлсэн олимпиадад бэлдэж, оролцсон. Олон улсын физикийн олимпиад өмнө жил оролцож хүрэл медаль авч байлаа. Энэ жил амжилтаа ахиулсандаа баяртай байгаа.

-Хоёрдахь удаагаа оролцож байгаа учраас өмнөхөөсөө илүү  туршлагатай байж чадсан  уу?

    -Өмнө жилээсээ хавь илүү туршлагатай болсон байсан. Олон улсын физикийн олимпиадаас гадна Азийн физикийн олимпиадад хоёр жил оролцсон. Гэхдээ энэ олимпиадаас шагналт байранд шалгарах жаахан хэцүү. Ер нь олон физикийн олимпиадад  оролцож туршлага хуримтлуулсныхнаа ачаар олон улсын физикийн олимпиадад амжилттай оролцсон байх. Олон улсын олимпиадууд таван  цаг онол, таван цаг туршилт гэсэн журмаар явагдаг. Таван цаг гэж сонсохоор урт юм шиг хэр нь олимпиадын үед бол маш бага хугацаа. Тиймээс энэ таван цагийг үр бүтээлтэйгээр, алдаагүй хийхийг суралцах хэрэгтэй болдог. Олон олимпиадад оролцсоноор цагаа хуваарилж, сандрал багатайгаар ажиллаж  сурсан.

-Олимпиадад оролцохдоо хэр сандардаг вэ?

    -Нэлээн сандарсан шүү. Бүтэн жилийн турш бэлдсэн учраас урт хугацааны бэлтгэлийнхээ үр шимийг хүртэж чадах болов уу гэсэн айдас, сандрал байсан.

-Олон төрлийн хичээл байгаа шүү дээ. Тэр дундаас физикийн хичээлийн яагаад сонгож, гүнзгийрүүлэн сурсан бэ?

    -Манай сургууль  хичээлдээ сайн хүүхдүүдийг  нэгдүгээр ангиас  нь математикийн олимпиадад бэлдэж эхэлдэг. Гэхдээ тэр үед ээж минь багаасаа хичээл, олимпиад гээд явчихвал ядарчихна гээд оруулаагүй юм. Тэгээд зургадугаар ангид байхад  физикийн олимпиадад бэлдэх боломж гарч ирсэн. Ингээд суралцах явцдаа олимпиадад орж алтан медаль авсан юм. Нэг амжилт гаргачихаар дахин амжилт  гаргахын тулд хичээдэг болчихдог юм билээ.  Тэгээд аравдугаар ангиас хичээлийн сэдвүүд хүндэрч,  агуулга нь гүнзгийрч эхэлсэн. Тэр нь надад их таалагдсан л даа. Ер нь би багаасаа сониуч, бидний эргэн тойронд болж байгаа зүйл яаж бий болж, яагаад байдаг  талаар нь мэдэхийг хүсдэг байсан.

Миний сонирхсон асуудлыг физик атомын түвшинд хүртэл нь тайлбарлаж, бүх  сэдвүүд нь хоорондоо уялдаа холбоотой байдаг таалагддаг.

-Олимпиадад оролцох бэлтгэлээ хэрхэн хийдэг вэ?

    -Бэлтгэл хүнд хэдий ч хамтдаа бэлдэж байгаа багийнхантайгаа илүү дотно болсон. Багийнхантайгаа хамтдаа ядарсан үедээ тоглож хөгжилдөж байсандаа баяртай байна. Миний хувьд энэ жил их чухал  гадаад сурахаар төлөвлөж байгаа учраас гадаадын сургуулиудад өргөдлөө өгөхийн хажуугаар олимпиаддаа бэлдсэн. Өөрийгөө ядрахгүйгээр бэлтгэл хийсэн гэвэл худлаа болох байх. Гэхдээ ядарсан ч ард нь гарч чадсан.

-Гэр бүлийнхэн, багш нар нь хэрхэн тусалж, дэмждэг вэ?

    -Гэр бүл минь өнгөрсөн жил шинэхэн гишүүнтэй болсон учраас  завгүй хүмүүс байдаг. Гэхдээ тэр их ажлын  хажуугаар надад урам өгч дэмждэгт нь баярлаж явдаг. Бидэнд өмнө олон улсын физикийн олимпиадад  Монгол Улсаа төлөөлж оролцоод мөнгөн медаль авч байсан н.Оргилбол ах, н.Цэрэнчимэг эгч бэлдсэн. Бидэнд хичээлийг эхнээс нь зааж, өөрсдөө өмнө оролцож байсан туршлагаасаа хуваалцаж ажилласан. Зөвхөн хичээл дээр туслахаас гадна олимпиадын өмнөх сэтгэл зүй байдал дээр их тусалж дэмжсэн. Манай баг энэ жил их амжилттай оролцсон, бүгд шагналт байранд орсон шүү дээ. Мөн хүрэл медалиуд нь мөнгөн медалийн дайтай үнэ цэнтэй байсан. Онооны босго гэж байдаг, тэдний оноо их өндөр байсан.

-Хүн бүрд өөрсдийн амжилттай суралцах арга гэж байдаг шүү дээ. Таны хувьд ямар арга барилаар суралцдаг вэ?

    -Ер нь шууд цээжлэх гэхээсээ илүү томьёогоо ойлгох хамгийн чухал байдаг. Яагаад тэр томьёо гарч ирж байгаа юунд ашигладаг гэдгийг ойлгох хэрэгтэй. Томьёоны гаргалгаагаа  ойлгочихсон тохиолдолд  томьёогоо мартсан ч эргүүлээд саначихдаг.

-Олон олимпиадад оролцохдоо бүгдэд нь хичээл зүтгэл гаргасан байх. Тэр дундаас хамгийн их сэтгэлд үлдсэн олимпиадынхаа талаар ярих уу?

    -Улсын физикийн олимпиадад наймдугаар ангидаа оролцож байсан. Олимпиад  Өмнөговь аймагт болсон учраас хотоос оролцож байгаа хүүхдүүд автобусанд суугаад очиж байлаа. Хөдөө зохион байгуулагдсан  учраас жижигхэн спортын тэмцээн, арга хэмжээнүүд  болсон нь их дурсамжтай. Сүүлийн хэдэн жил цар тахлаас болоод хөдөө орон нутаг, олон улсын олимпиадад оролцох боломжгүй болсон.

ДЭЛХИЙН ДУЛААРЛЫН ЭСРЭГ АРГА ХЭМЖЭЭ АВЧ ЧАДАХ МЭРГЭЖИЛ ЭЗЭМШИХИЙГ ХҮСДЭГ

-Хүүхдүүд хичээлээс үүдсэн сэтгэлзүйн тогтворгүй байдалд их ордог юм билээ. Таны хувьд олон олимпиад, шалгалтад бэлддэг учраас сэтгэл зүйгээ хэрхэн тайван байлгадаг вэ?

    -Сэтгэл зүйгээ тайван байлгахын тулд өөртөө хангалттай гэж бодох хүртлээ хичээлээ бэлдэхийг хичээдэг. Өөрөө сайн бэлдэж чадаагүй гэдгээ мэдэж байгаа учраас сандарч, дарамтад ордог. Тиймээс өөртөө хангалттай гэж бодох хүртлээ хичээж бэлдээд өөрийгөө тайвшруулдаг. Хүн сандрах үедээ мэддэг зүйлээ ч чадахаа больчихдог шүү дээ. Гэхдээ л шалгалтын өмнөх сандрал байсаар байдаг.

-Гадаадад сурах төлөвлөгөөтэй байгаа юу?

         -Америк Улсад сурах төлөвлөгөөтэй байгаа. Орох боломжтой сургуулиудаа бодсон. Одоо олимпиад дууссан учраас гадаадад суралцахдаа анхаарлаа хандуулна гэсэн бодолтой байгаа.

-Үеийн найзууддаа хэлэхийг хүсдэг үг, зөвлөгөө бий юу?

        -Аливаа зүйлийн тэнцвэрийг олж байгаарай гэж хэлмээр байна. Би хэчнээн физикт анхаарч бэлддэг хэдий ч эрүүл мэнддээ анхаарал хандуулдаггүй. Эрүүл мэнд гэдэг бүх зүйлсийн суурь шүү дээ. Суурь нь байхгүй бол яаж ч хичээгээд амжилт олж чадахгүй байх тохиолдол гардаг.

-Ирээдүйн зорилго, төлөвлөгөөнөөсөө хуваалцахгүй юу?    

    -Хүссэн их сургуульдаа орох хамгийн ойрын мөрөөдөл байна. Миний хувьд дэлхийн дулаарлын эсрэг арга хэмжээ авч чадах  мэргэжилтэй болохыг хүсдэг. Энэ зорилгодоо хүрмээр байна.

-Ярилцлага өгсөн танд баярлалаа. Сурлага, хөдөлмөрийн өндөр амжилт хүсье.