• Өнөөдөр 2024-03-29

ЖҮЖИГЧИН Ч.НОМИН-АНГАРАГ: Бүтээсэн дүрээрээ хүмүүсийн сэтгэлд хүрэхийг, үлдэхийг хүсдэг

2022-06-26,   1494

Хошин урлагийн “X tuts” продакшнаас жүжигчин болох гараагаа эхэлсэн залуу жүжигчин Ч.Номин-Ангарагтай ярилцлаа. Тэрбээр үзэгчдийн хувьд өөрийнхөө нэрээр бус бүтээсэн дүрээрээ мөнхөрч үлдэхийг хүсдэг гэнэ.

-Энэ өдрийн мэнд хүргэе. Манай уншигчдад өөрийгөө танилцуулаач?

    -Сайн байна уу. Намайг Ч.Номин-Ангараг гэдэг. Соёл урлагийн их сургуулийг 2016 онд жүжигчин мэргэжлээр төгссөн. Чадварлаг жүжигчин болохоор хичээн ажиллаж байна.

-Сүүлийн үеийн уран бүтээлийнх нь талаар ярилцах уу?

       -Коронавирусийн хөл хорионы үеэр “Orange entertainment” болон “NTV” телевизийн хамтын бүтээл “Search” цувралын гол дүрд тоглосон. Одоо бол “5 дахь улирал” уран сайхны киноны гол дүр дээр ажиллахаар бэлдэж байна.

-“Search” цувралд гол дүр бүтээх ямар байсан бэ?

       -Би XII ангийн охины дүрд тоглосон. Гэхдээ би чинь одоо 25 настай, арван жилээ төгсөөд нэлээд удчихсан хүн шүү дээ. Тиймээс хүмүүст “Худлаа харагдаж, надад дүр минь наалдахгүй байх вий дээ” гэсэн айдас их байсан. Надаас бусад жүжигчин сургуулиа дөнгөж төгссөн хүүхдүүд учир насны хувьд хол зөрүү харагдахгүй байсан. Мэдээж анхны гол дүр минь учраас их хайрлаж, хичээж ажилласан.

-“X tuts” продакшнд ажиллаж байсан юм билээ. Хэдий хугацаанд ажилласан бэ?

       -Их сургуулиа төгссөнийхөө дараа “X tuts” продакшнд хоёр жил ажилласан. Анх урлагт хөл тавихдаа  “X tuts” продакшнаар овоглосондоо баярлаж явдаг. Ажиллаж байх хугацаандаа тайзны хоёр шоу тоглолт болон “Өвлийн инээмсэглэл” жүжигт дүр бүтээж байлаа. Одоогоор надад харьяалагдсан продакшн байхгүй, чөлөөт уран бүтээлчээр ажиллаж байна.

-Урлагийн хүн болохоор шийдэж байсан мөчөөсөө хуваалцаач. Яагаад жүжигчин мэргэжлийг сонгосон юм бэ?

        -Анх Монголын хүүхдийн ордны дуулаачийн дугуйланд явж эхэлсэн. Тэгээд бүжиг, загвар гээд олон сургалт дамжаанд явдаг, ямар ч байсан урлагийн хүн болно гэдэг маань тодорхой байсан. Тавдугаар ангидаа анх удаа хошин өгүүллэг уншаад, өөртөө жүжигчин болох чадвар байгаа гэдэгт итгэсэн. Мөн багаасаа хөгжүүлсэн олон авьяас жүжигчин хүнд байх хэрэгтэй гэдгийг ойлгоод шалгалтаа өгч байсан.

-Урлагаар их сургуульд ороход нь гэр бүлийнхэн нь хэрхэн хүлээж авсан бэ?

         -Анх эрс эсэргүүцэж байсан. Намайг анагаахын их сургуульд эмчээр орох эсвэл гадаадад сургана гэж ярьж байсан. Тэгээд эцэг, эхээсээ нууцаар СУИС дээр очиж шалгалт өгөөд нэгдүгээр байраар жагсаж, сургуульдаа орж байсан. Нэгдүгээр байрт орчихсон хүнд гэрийнхэн маань үг хэлж чадалгүй хүссэн сургуульд минь оруулсан.

-Хичээлдээ сууж эхэлсэн чинь төсөөлснөөр өөр байсан тохиолдол олон уу?

      -Төсөөлсөн шиг байгаагүй ээ. Ядаргаанд орж үзээгүйгээрээ ядарсан. Гэхдээ шантарч, хойш ухрах талаар огт бодоогүй. Зүгээр л миний дотроо төсөөлж, мөрөөдөж, ургуулан бодож байснаас сургалтын арга барил нь өөр байсан. Миний мэдэхгүй зүйл олон байсан. Гэхдээ сургуульдаа сурсандаа би баярладаг. 

-Тайз, дэлгэцийн уран бүтээлийн ялгааг хэрхэн мэдэрч байна вэ?

      -Энэ хоёр төрлөөс авч байгаа мэдрэмж их өөр юм билээ. Нүүрний хувирал, дуу хоолойны өнгө гээд бүгд өөрчлөгддөг. Тайзны уран бүтээлээс илүү дэлгэцийн уран бүтээл нь илүү хэцүү. Алдсан тохиолдолд дахин зураг авч болдог ч жүжигчнээс илүү их мэдрэмж, жүжиглэлт шаарддаг юм шиг санагддаг.

-Иргэний нисэхэд ажиллаж байсан юм билээ. Урлагийн хүн хэрхэн нисэх хүчинтэй холбогдсон юм бэ?

   -Сургуулиа төгсөөд, 2018 онд Иргэний нисэхийн "Изинес Эйрвэйз" компанид зорчигч үйлчилгээний хэлтэст ажиллаж байгаа. Компанийнхаа ууган ажилтан учраас ажлаас гарахад хүндрэлтэй байсан. Гэхдээ би урлагаа сонгоод ажиллаад явж байна. Би анх ажилд орохдоо олон орноор аялна гэж бодсон. Гэтэл бодит байдал дээр  маш хүнд ажил байсан. Хүнээс олон талын авьяас шаарддаг, хүнтэй муухай харьцаж болохгүй, ширхэг үс цухуйж, ил гарч болохгүй гээд хувь хүний зохион байгуулалт, эмх цэгц, хариуцлагатай холбоотой ажил. 

-Жүжигчин хүний хувьд бүтээхийг хүсдэг дүр бий юү?

   -Жүжигчин мэргэжлийн минь үнэ цэн, миний чадварыг шалгасан, өөрчлөлт авчирсан дүр бүтээхийг хүсэж байна. 

-Одоо тоглох гэж байгаа киноныхоо талаар яриач. Кинонд тоглох саналыг хэрхэн хүлээж авсан бэ?

    -“5 дахь улирал” киног дандаа залуу уран бүтээлчид нэгдэн найруулж, бүтээж байгаа. Залуучуудын асуудлыг олон талаас нь харж, бага зэргийн хэтрүүлэгтэйгээр илэрхийлэх гэж байгаа.

-Цаашдын зорилго, мөрөөдлөөсөө хуваалцахгүй юу?

    -Урлагаасаа дөрвөн жил хөндийрсөн. Тэр алдсан хугацаагаа маш хурдан нөхөхийн тулд, урлагийн ах эгч, дүү нартаа өөрийгөө таниулахын тулд илүү их хөдөлмөрлөе гэж бодож, зорилго тавьсан. Миний хувьд өөрийгөө авьяастай гэж итгэдэг. Гэхдээ өнгөрсөн дөрвөн жилийн хугацаанд өөрийнхөө төлөө яваагүйдээ жаахан харамссан. Одоо бол багын хүсэл мөрөөдлөөрөө жигүүрлэн, урлагийн замналаа эхлүүлэхийг хичээж байна. Бүтээсэн дүрээрээ хүмүүсийн зүрх сэтгэлд үлдэхийг хүсдэг.

-Баярлалаа, цаашдын ажилд нь амжилт хүсье.

          -Баярлалаа.





 


ЖҮЖИГЧИН Ч.НОМИН-АНГАРАГ: Бүтээсэн дүрээрээ хүмүүсийн сэтгэлд хүрэхийг, үлдэхийг хүсдэг
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 3
  • Сэтгэгдэл үлдээсэн: 2022-06-24 18:26:21
    Xocoo: Мундаг авяастай хөөрхөн бүсгүйд ажлын өндөр амжилт хүсье өөр олон дүрд тоглоорой
  • Сэтгэгдэл үлдээсэн: 2022-06-24 15:12:45
    Баярмаа: Мундаг .... ард түмэндээ илүү их амьдралын үнэнийг харуулсан амьдрах Итгэлийг өгсөн жүжигчин байгаарай♥️♥️♥️
  • Сэтгэгдэл үлдээсэн: 2022-06-24 13:11:37
    Зочин : Мундаг авяастай охиндоо ажлын өндөр амжилт хүсье Өөр олон олон дүрд тоглоорой
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188