“Хавтаст хэрэг” олон ангит киноны ахлах дэслэгч Халиуны дүрээр бидний танил болсон залуу жүжигчин, чадварлаг бүжигчин Н.Нархажидтай ярилцлаа. Тэрбээр өнгөрсөн жил Соёл урлагийн их сургуулийг жүжигчин мэргэжлээр төгссөн юм.

-Сайн байна уу. Хавтаст хэрэг олон ангит кино гарч дууслаа. Кино багийнханд нь баяр хүргэе. Анх энэхүү кинонд хэрхэн тоглох болсон бэ?

     -Сайн байна уу. Хавтаст хэрэг киноны хувьд манай ангийн хөвгүүдийн байгуулсан "Халх" продакшны Отгонбаатар хэд хэдэн ангийн зохиол бичиж редакторласан юм. Тэгээд надад дүрийн шалгаруулалтад орохыг санал болгосон. Намайг очиход ихэнх дүрээ сонгочихсон, ганцхан Халиунаагийн дүрийг сонгоогүй байсан. Миний хувьд шинэ төгсөгч дээрээс нь цар тахалтай хичээлдээ бүрэн суух боломжгүй үеийн оюутан байсан учраас туршлага бага байсан. Гэхдээ кино багийнхан надад итгээд, ахлах дэслэгч Халиунаагийн дүрийг өгсөн. Анх хамт тоглох жүжигчдийгээ хараад эмээсэн ч, өөрийгөө чадахыг мэдэж байсан учраас тоглохоор болсон. Найруулагч маань намайг Халиунаагийн дүрд сонгосныхоо дараа “Чиний дүрийг маш их хайсан” гэж хэлсэн. 

-"Хавтаст хэрэг" киноны эхний зураг авалтад орох ямар байсан бэ?

      -Хамгийн эхний зураг авалт Мандах бид хоёрын цагдаагийн газрын гадаа таардаг хэсэг байсан. Тэр үед ахтай анх удаа уулзсан л даа. Ах өөр уран бүтээлийн ажилтай байсан болохоор зохиол уншлагын үеэр ирж амждаггүй байсан юм. Анхны өдөр учраас сандрал ихтэй гэхдээ өөрийгөө хянаж, жүжиглэлтээ сайн гаргахыг хичээсэн.

-Зураг авалтын явцад хэн хамгийн их туслаж дэмжиж байсан бэ?

    -Өөрөө зохиолоо сайн уншаад, аль хэсэгт хэрхэн тоглохоо төлөвлөнө. Хамт тоглож байгаа жүжигчид маань туршлагатай хүмүүс учраас зааж зөвлөдөг байсан. Тэр дунд хэн ч “Чи болохгүй байна,тэгэхгүй байна”  гэсэн шүүмж хэлж байгаагүй. Г.Алтаншагай ах “Нараа ингэвэл  дээр юм байна” гээд зөвлөдөг байсан. Бүгд л аль хэсэг дээр хэрхэн жүжиглэхээ ярилцдаг. Цагдаагийн тухай кино учир мэдэхгүй зүйл их гарна. Тэр бүрд нь цагдаагийн албан хаагчид “Эмэгтэй цагдаа нар ийм байдаг. Буугаа ингэж барина” гээд зааж, зөвлөж байсан. 

-Зураг авалтын дундуур хөгжилтэй зүйлс тохиолдсон уу?

    -Хөгжилтэй зүйл зөндөө болсон. Гол дүрийн таван гишүүн хамт байгаа цагт инээхгүй байна гэж байхгүй. Ялангуяа Г.Алтаншагай, С.Болд-Эрдэнэ ах нар хамт байгаа цагт үргэлж инээдтэй зүйлс болдог. С.Болд-Эрдэнэ ах сахилгагүй, Алтаншагай ах байнга инээдтэй зүйл ярьдаг. Би яг тэр гээд ярихаар хөгжилтэй зүйлийг муу ярих гээд байна.

ЦАГДААГИЙН ДҮРД ТОГЛОСОН УЧИР ИЛҮҮ ХАРИУЦЛАГАТАЙ БАЙХЫГ ХИЧЭЭХ БОЛСОН

-"Хавтаст хэрэг" олон ангит кино телевизээр гарч саяхан дууслаа. Кино дуусахад ямар мэдрэмж төрсөн бэ?

    -Таван сар орчмын хугацаанд зураг авалтын багийнхантайгаа 16 ангит киноны ард гарсандаа маш их бахархсан. Тийм амархан ажил байгаагүй. Киногоо үзэх болгондоо тухайн ангийн зураг авалтын ард юу болсон тухай боддог юм билээ. Эхнийхээ ангийг үзэхдээ өөрийгөө хараад ичээд байсан. Гэхдээ цаашлаад үзэх тусам өөрийгөө харах бус бусдынхаа дүрээ хэрхэн гаргасан, киноныхоо хийц зэргийг харж, илүү уран бүтээлч талаасаа үздэг болсон.

-Таны хувьд "Хавтаст хэрэг" кино бусад олон ангит киноноос юугаараа онцлог байсан бэ?

    -Миний хувьд "Хавтаст хэрэг" кино нууцлалын зэрэгтэй Монгол Улсад болж байсан гэмт хэргүүдээс сонгож, кино зохиол бичиж хийсэн болохоор содон байсан. Мөн эрэлттэй, чадварлаг олон уран бүтээлч энэ кинонд тоглосон гэдэг утгаараа хүмүүсийн сонирхлыг татсан байх. Өөр улсын цагдаа бус яг Монгол Улсын цагдаа ямар байдаг, яаж ажилладаг гэдгийг арай илүү амьдралд ойр байдлаар харуулсан. Кинон дээр хүнд гэмт хэргүүдийн талаар гарах бүрд найзууд маань надаас “Нээрээ ийм хэрэг гарч байсан юм уу” гэж асуудаг.  Үнэхээр тийм хэрэг гараад, бид сэдэвлээд кино хийсэн гэхээр итгэдэггүй. Энэ  гэмт хэргүүдээс сэдэвлээд кино хийж байгаа нь хүмүүст “Битгий ийм алхам хийгээрэй, ийм үр дагаварт хүрдэг юм шүү” гэдгийг анхааруулах, харуулахыг зорьсон. Энэ кино гарсны дараа гэмт хэргийн тоо буураасай гэж хүссэн.

-Хүмүүс "Хавтаст хэрэг" киноных нь дүрээр шууд хүлээж авсан үе байгаа юу?

    -Үнэнийг хэлэхэд, хүмүүс намайг таньдаг болно гэж бодоогүй. Тэгсэн миний төсөөлж байснаас илүү хүлээн авч “Энэ нөгөө хөөрхөн Халиун байна” гэсэн үгийг их сонсон. Хамгийн гоё санагдсан зүйл нь замын цагдаа зогсоочихоод намайг таниад “ Халиун уу, киноных нь тэр анги их таалагдсан. Бидний ажлын хэсгийг хүмүүст бодитоор харуулж байгаад баярлаж байгаа шүү” гэсэн. Хүмүүс намайг таниад харж эхлэхээр биеэ барьж эхэлдэг юм билээ. Цагдаагийн үүрэгт албан хаагчийн дүр дээр ажилласан, хүмүүс намайг цагдаа эмэгтэйгээр минь харж байгаа учраас гадуур явахдаа хүмүүс буруугаар ойлгочих вий дээ гэж санаа зовсон үе байсан.

БҮЖИГЛЭНЭ ГЭХЭЭР НҮД СЭРГЭДЭГ ХҮҮХЭД БАЙСАН

-“No rules” “Хавтаст хэрэг” киноны дүрүүдийг бүтээхэд өөртэй нь адилхан санагдсан зүйл байгаа юу?

    -Яг ижилхэн зантай учраас тухайн дүрд тоглоно гэж байхгүй. Адилхан бас өөр олон зүйлс байсан. Дүрүүдийн хувьд гэвэл хоёулаа надаас хэт эгч хүмүүсийн дүр байсан. Би яг өөрийнхөө насны гоё хайрлаж, дурласан залуу охин, тийм дэврүүн насны тухай гардаг уран бүтээлд тоглох юм сан гэж мөрөөддөг.

-Дараагийн уран бүтээлийн санал ирсэн үү?

    -Өөр киноны санал ирсэн л дээ. Гэхдээ цагдаа, эмчийн дүр байсан. Хувьдаа бодохдоо төрийн албан хаагчийн дүрд тоглох юм бол миний цаашдын уран бүтээл энэ чиглэлийн хүмүүсийн дүр байх юм шиг санагдсан. Хүмүүс зөвхөн тэр төрлийн киногоор нь харчих юм бол бусад найруулагч, хүмүүст цагдаагаас өөр дүрээр харагдахаа больчих байх гээд татгалзсан байгаа. Би “Mongolia Entertaiment ” хамтлагийн бүжигчин. Тиймээс хамтлагийн ажилдаа төвлөрөөд явж байгаа.

-Бүжгийн хамтлагт байдаг гэлээ. Мэргэжлийн бүжигчин үү, эсвэл сонирхлоороо бүжиглэдэг үү?

    -Миний мөрөөдөл бүжигчин л дээ. Хөгжим бүжгийн коллежийг Ардын бүжгийн ангийг бүжгийн жүжигчин мэргэжлээр төгсчихөөд СУИС-ийн Кино драмын ангид орсон. Сурч байх явцад маань бүжигчин мэргэжил том давуу тал болж өгдөг учраас энэ мэргэжлээр сурсандаа баярладаг. Гэхдээ өмнө нь би хэзээ ч жүжигчин болно гэж бодож байгаагүй.

-Хүүхэд байхдаа урлагийн хүн болно гэж бодож байсан  уу?

    -Бүр багаасаа бүжигчин болно гэж боддог, цэцэрлэгт байхаасаа л бүжиглэдэг байсан. Гэхдээ хичээлээ хийдэггүй, бүжиглэнэ гэхээр нүд нь сэргэдэг, бүжиглэж л байвал болдог тийм хүүхэд байсан. Би жоохон бие муутай болохоор эцэг, эх маань бүжиглүүлэхгүй гэдэг байсан юм. Аав, ээждээ хөгжим бүжгийн коллежид  шалгалт өгч тэнцсэн гэдгээ эцэг, эхийн гарын үсэг хэрэг болох үед нь хэлсэн/ инээв/. Хэчнээн бие муутай байсан ч хүн дуртай зүйлдээ яаж ийгээд явдаг юм билээ. Миний хувьд бүжиг надад дархлаа суулгаж өгсөн гэж боддог доо.

-Цаашдын зорилго, мөрөөдлөөсөө хуваалцаач?

    -Урлагийн замналаа хэзээ ч хаяхгүй. Бүжиглэнэ, жүжиглэнэ багаасаа л уран бүтээлч болно гэж боддог байсан учраас урлаггүй бол би галзуурах байх гэж боддог. Одоогоор төлөвлөсөн ажил байхгүй учраас ингэж бодож байж мэднэ. Гэхдээ сарын дараа би өөр зүйл төлөвлөөд явж байж магадгүй. Хүнд заримдаа юм хийж бүтээмээр эсвэл зүгээр л сууж баймаар үе байдаг шүү дээ. Би яг тийм бодолтой үе дээрээ байгаа.

-Ярилцлага өгсөнд баярлалаа. Цаашдын уран бүтээлд нь амжилт хүсье.

    -Баярлалаа, амжилт хүсье.