Эмчээс “Та хорт хавдартай юм байна” гэх өгүүлбэрийг хоёр удаа сонсож, үхэл амьдралтай тэмцсэн 12 цагийн хагалгаа, 12 удаагийн хими эмчилгээг тэр “Би л шантарвал надад ирсэн энэ амьдрал утга учиргүй өнгөрчихнө” гэсэн бодолтойгоор шүд зуун тэсэж, давж гарчээ. Хэцүү өвчнийг даваад гарсан тэр амьдралын цаг, мөч бүрийг зөвхөн өөрт нь, гэр бүлд нь зориулагдсан юм шиг өнгөрүүлэхээр шийдэж, цаг алдалгүй хүсэж, мөрөөдсөн загвар өмсөгчийнхөө ажлыг хийж эхэлжээ. Богинохон үстэй монгол бүсгүй нүүр дүүрэн инээмсэглээд дэлхийн алдарт “Kia” компанийн сурталчилгаанд тоглож, олны танил болж байлаа. Одоо тэр “Samsung”, “Apple”, “YSL” “Coach”, “Toyota” тэргүүтэй дэлхийн алдартай брэндийн нүүр царайгаар ажиллаж, сурталчилгааг нь амилуулдаг загвар өмсөгч Ж.Намуун болжээ.

-Та математикийн багш, шүдний технологич мэргэжилтэй юм билээ. Гэхдээ одоо дэлхийн нэр хүндтэй, нөлөө бүхий компаниудын сурталчилгаанд моделиор ажиллаж байна. Загвар өмсөгчөөр ажиллаж эхэлсэн түүх нь сонирхолтой бөгөөд олон хүнд сургамж болсон үйл явдал юм билээ. Энэ түүхээ ярьж өгөөч?

            -Багадаа загварын сургалтад явдаг байсан ч загвар өмсөгчөөр тууштай ажиллаж байгаагүй юм. БНСУ-ын их сургуульд сурч байхдаа сургуулийн сайтын нүүр царайгаар зураг авалтад анх оролцож байсан. Гэхдээ Сөүл хотоос нэлээн хол газар сурч байсан учраас үргэлжлүүлж, загвар өмсөгчөөр ажиллаж амжилгүй орхисон. Хүндээр өвдсөнийхөө дараа хүн хийхийг хүссэн зүйлээ хийж, мэдэрч, турших хэрэгтэйг ойлгосон. Бие тэнхэрч, эмнэлгээс гарсныхаа дараагаас энэ салбарт идэвхтэйгээр ажиллаж байна даа. 2019 оны долдугаар сард бүдүүн гэдэсний хорт хавдрын дөрөвдүгээр шатанд орсон байна гэсэн оноштойгоор бүтэн 12 цагийн хагалгаанд орсон. Дараа нь 12 удаагийн химийн эмчилгээ хийлгэсэн. Одоо энгийн ярьж байгаа ч тэр үе үнэхээр хэцүү цаг хугацаа байсан. Эмчилгээний дараа үс ургаж, жин нэмээд хуучин хэвэндээ орж эхэлсэн тэр үедээ буюу 2021 оны дөрөвдүгээр сард умайн хүзүүний хорт хавдартайгаа мэдсэн. Эхэн үе дээр нь мэдсэн учраас яаралтай хагалгаа хийлгээд, одоо хүртэл хяналтад байгаа. Дараа жилийн дөрөвдүгээр сард бүрэн эдгэрсэн гэсэн хариугаа авна гэдэгтээ итгэлтэй байна. Бүдүүн гэдэсний хорт хавдрын хувьд бүрэн эдгэрсэн гэх мэдээг 2024 оны долдугаар сард сонссон. Анх хавдартай гэдгээ мэдээд үнэхээр хэцүү байсан ч цаг өнгөрөхийн хэрээр давж гарах арга зам хайж эхэлдэг юм билээ.

-Эмнэлгийн орон дээр өвчинтэйгөө тэмцэхэд хамгийн их дэм болж, таныг хөл дээрээ дахин босгосон зүйл юу вэ?

            -Багадаа олон хэцүү бас сайхан  зүйл туулсан учраас сэтгэлийн хаттай болж өссөн байх. Гэхдээ л “Хорт хавдар” гэдэг оношийг хоёр удаа сонссоны дараа “Яагаад би юм бэ” гэж эрхгүй бодогддог юм билээ. Гэсэн ч  “Би л шантарчих юм бол надад ирсэн энэ амьдрал утга учиргүй өнгөрчихнө шүү дээ. Тиймээс энэ бүхнийг ямар ч хамаагүй аргаар даваад гарна” гэж л хүссэн. Хүний дотор өөрийнх нь бодож байгаагаас ч илүү хүч, тэнхээ байдгийг ойлгосон. “Ингээд үхнэ гэж юу байх вэ дээ” гэсэн бодол намайг хөл дээр  минь босгосон байх. Хэцүү өвчинтэй тулгарсны дараа бодол, хүнтэй харилцах харилцаа, амьдралын хэвшил өөрчлөгддөг юм билээ. Эмнэлгийн орон дээр хэвтэж байхдаа хурдан эдгэрэхийг мөрөөдөж, хийхийг хүссэн бүхнээ хийж байх хэрэгтэйг ойлгосон. Эдгэрснийхээ дараа хийх зүйлээ төлөвлөн бодож, гэр бүлийнхэнтэйгээ өнгөрөөх жаргалтай мөчүүдээ төсөөлсөн. Төсөөлөл бүр минь надад хөл дээрээ босох урам зориг хайрлаж байсан. Хүүхэд минь жаахан байсан учраас үрээ бодож, тэр бүх өвчнийг тэвчсэн юм шиг санагддаг. Ингээд ярьсан чинь надад олон зүйл урам, зориг өгч байжээ.

-Гэдсэн дээрх сорви нь загвар өмсөгчийн ажилд нь нөлөөлж байв уу?

            -Хэдийгээр том сорвитой ч загвар өмсөгчийн ажилд нөлөөлж байгаагүй ээ. Дотуур хувцасны зураг авалтын үеэр л хүмүүс мэддэг. Анх сорвиноосоо санаа зовдог байсан. Царай, биеийг минь хараад зөвшөөрсөн ч би “Бие дээр минь том сорви байгаа. Мэдэж байгаа юу, зүгээр үү” гэж асуудаг байсан. Сүүлийн жилүүдэд төдийлөн тоохоо больсон. Учир нь, цахим сүлжээнд сорвио ил гаргасан олон зургаа нийтэлж байсан учраас хүмүүс мэддэг болсон байх. Би сорвиноосоо ичиж байгаагүй ээ. Тун хэцүү давааг даваад гарсны минь гэрч шүү дээ.

-Дуучин, жүжигчин, загвар өмсөгчид гээд загварын салбарт ажиллах хүн олон шүү дээ. Тэднээс ялгарах таны онцлог юу вэ?

            -БНСУ-д загвар өмсөгчөөр ажиллахад өрсөлдөгч олон байдаг нь үнэн. Үүнийгээ дагаад тэднийг ажиллуулах зах зээл нь ч бий. Миний тэднээс ялгарах онцлог нь ази болон европ төрхийг хослуулсан царай, төрх минь. Өвөрмөц төрх минь ажлаа хийхэд давуу тал болдог. Солонгосчууд гадаад, европ төрхтэй моделиудтай хамтран ажиллах дуртай байдаг. Мөн БНСУ-д олон жил амьдарч байгаа учраас орчуулагч шаардахгүйгээр зурагчин, найруулагчидтайгаа харилцдаг минь давуу тал болдог.

-Таныг догдлуулж, баярлуулсан сурталчилгааны санал бий юү?

            -Алдартай жүжигчин Kim Soo Hyun-той хамтарч сурталчилгаанд тоглохдоо л хамгийн их догдолсон доо. Хэдийгээр цалин бага байсан ч дуртай жүжигчинтэйгээ нэг сурталчилгаанд тоглож байгаадаа баяртай байсан. Алдартай жүжигчинтэй хамтарч байгаа минь нэр төрийн хэрэг шүү дээ. Дараа нь хуримын даашинзны зураг авалтад найман цаг оролцоод, 17 сая вонийн цалин авч байсан. Нэг өдрийн дотор тийм өндөр цалинтай ажилласандаа баярлаж, өөрөөрөө бахархсан. Загвар өмсөгчөөр ажиллаж эхлэхдээ хожим харамсах зүйлгүй байхыг хүссэнээс биш, тийм их цалин авна гэж төсөөлөөгүй шүү дээ.

-Эх орондоо байнга ирдэг үү. БНСУ-д байхдаа хамгийн их санадаг зүйл тань юу вэ?

            -Найзуудыгаа л хамгийн их санадаг даа. Гоо сайхны эмнэлэгт ажиллаж байхдаа гурван сар тутамд Монголд ирж зөвлөгөө өгдөг байсан юм. Тэгэхээр санах нь бага байсан байх л даа. Сүүлд есдүгээр сард гэртээ очоод ирсэн. Оюутан байхдаа бол гэрээ их санадаг байсан. Одоогийнх шиг цалинтай ажил хийдэггүй байсан учраас удаан хугацааны дараа очиж байгаа гэрийнхэндээ бэлэгтэй очих гээд цагийн ажил хийж, мөнгө цуглуулдаг байлаа.

-Сүүлийн жилүүдэд БНСУ-д загвар өмсөгчид кинонд тоглох нь элбэг болсон шүү дээ. Танд жүжигчнээр ажиллах сонирхол бий юү?

            -Монголд байхдаа нэг энтертайнмент чиглэлийн үйл ажиллагаа эрхэлдэг компанид ажилладаг байсан юм. Тэр үед жүжигчид намайг хараад “Чи жүжигчин болохгүй яасан юм бэ” гэж их асуудаг, жүжиглэж чадна гэж урамшуулдаг байлаа. Тэр магтаал санаанаас огт гардаггүй. Боломж гарах юм бол кинонд тоглохыг мөрөөддөг.

-Хувцасны брэндтэй болохыг хүсдэг талаар нь сонссон юм. Та хүмүүст ямар хувцас урлаж өгөхийг хүсэж байгаа вэ?

            -Эмэгтэй хүний гоо сайхныг тодотгосон догь хувцасны брэндтэй болохыг хүсдэг. Хүн навсгар хувцас өмсөх тусам биеэ гаргуунд нь гаргадаг. Тиймээс хүмүүст өөртөө итгэх итгэл бэлэглэсэн, гол нь өдөр тутам өмсөхөд тохиромжтой хувцас зохион бүтээж өгөхийг хүсдэг. Хувцас үнэтэй, брэндийнх байхдаа чухал биш, биеийнх нь онцлогт тохирсон байхад л үнэ цэн нь оршдог.

-Та ирээдүйн мөрөөдөл, зорилгоосоо хуваалцахгүй юу?

            -Нөхөртэйгээ Монголд аялал жуулчлалын компанитай болохыг хүсдэг. Манай хүний мэргэжил нь аялал жуулчлалтай холбоотой учраас олон жил үүнийг мөрөөдөж байна. Дэлхийгээр аялж, бусад улсын соёлтой танилцах нь ч миний мөрөөдөл. Бусад хүний хувьд энгийн зүйл боловч эдгээр мөрөөдөл миний хувьд үнэ цэнтэй. Баян цатгалан амьдрах нь гол биш, аз жаргалтай, хүссэнээ идэж, хайртай хүмүүстэйгээ хамт байх нь хамгийн сайхан зүйл гэдгийг би ойлгосон.