Ардчилсан намын дарга С.Эрдэнийн бие муудаж, түргэн дуудсан гэх мэдээлэл зарим хэвлэл мэдээллийн хэрэгслээр цацагдаад байгаа билээ. Тодруулбал, өчигдөр буюу нэгдүгээр сарын 10-ний 20:00 цагийн орчимд С.Эрдэнийн бие муудаж, “Шонхор таурт” түргэний эмч ирсэн гэх.

Бид энэ талаар АН-ын дарга С.Эрдэнээс өөрөөс нь тодрууллаа.

Тэрбээр “Миний бие өмнөх өмнөхөөсөө илүү чийрэг, сайн байна. Зарим хүн харлуулах гэж санаанаасаа юу ч хамаагүй зохиож, гүтгэдэг болжээ. Би өдөр хөдөө яваад үдээс хойш ирсэн. Үдээс хойш Ардчилсан намын байранд Удирдах зөвлөлийн 10 гаруй хүн цуглаж, хурал хийсэн. Энэ үеэр миний болон өөр хэн нэгний бие муудаж, түргэн тусламж дуудаагүй. Бид өчигдөр хурдаа 21:00 цагийн орчимд дуусаад гэртээ харьцгаасан. Хэний ч бие муудаагүй байхад түргэн дуудаж байх юм” гэлээ.