“Астана-2026” чөлөөт, сонгомол бөхийн ДАШТ-ий дөрөв дэх өдөр эмэгтэйчүүдийн 50, 57, 65, 76 кг-ын жин дэх урьдчилсан шатны барилдаанууд өнөөдөр эхэлнэ.  Эмэгтэйчүүдийн хамгийн хөнгөн буюу 50 кг-ын жинд ДАШТ-ий хүрэл, хошой мөнгөн медальт, МУГТ  Д.Отгонжаргал хүч сорино. "Парис-2024" олимпын наадмаас хойш эхний тэмцээндээ оролцож байгаа тэрбээр Мароккогийн Хажар Канебтай барилдахаар сугалаа татлаа.

    Харин 57 кг-д ДАШТ-ий мөнгөн медальт, ОУХМ  Б.Хулан, Бразилийн Жуллиа Пеналбертэй оноолт таарсан. Ялсныг нь шигшээ 16-д БНХАУ-ын тамирчин, жингийнхээ дэлхийн чансааг өнгөлж буй Хун Кэсинь хүлээж байна. Хятадын бөх энэ оны Азийн аварга болон Азийн наадамд дараалан түрүүлсэн бөгөөд 2026 онд ялагдаагүй байгаа юм.

    Эмэгтэйчүүдийн 65 кг-ын жинд  дэлхийн чансааны хоёрдугаарт эрэмблэгдээд буй өнгөрсөн оны ДАШТ-ий хүрэл медальт, ОУХМ Т.Энхжин эхний тойрогт гоц мөргөлөө. Түүнийг  шигшээ 16-д Төв Африкийн Бүгд Найрамдах Улс болон Германы тамирчны ялсныг хүлээж байна.  Харин 76 кг-ын жинд ДАШТ-ий мөнгөн медальт, ОУХМ  Э.Даваанасан, ОХУ-ын Мариа Силинатай барилдахаар оноолт таарчээ.