Улаанбаатар төмөр зам ХНН-ийн Тээвэр зохион байгуулалтын албаны орлогч дарга С.Батдөлийг өнгөрсөн баасан гарагт Эрүүгийн цагдаагийн албанаас гүйцэтгэх ажиллагаа явуулж, саатуулсан.

Хойшлуулшгүй ажиллагааны явцад С.Батдөлийн гэр болон хамаарал бүхий объектоос 7.3 тэрбум төгрөг, 4 тэрбум төгрөгийн үл хөдлөх хөрөнгө худалдах, худалдан авах гэрээг хурааж авсан. Мөн түүнийг 48 цагийн хугацаатай саатуулж, сулласан.  

Прокурорын байгууллагаас 2022 оны нэгдүгээр сарын 6-ны өдөр яллагдагч С.Батдөлд "Цагдан хорих таслан сэргийлэх арга хэмжээ" авах тухай саналыг шүүхэд хүргүүлсэн байна. Гэвч яллагдагчийн өмгөөлөгч заавал өөрийн биеэр оролцохыг хүсэж, шүүхийн хэлэлцүүлгийг түр хойшлуулах санал гаргасныг хүлээн авч шийдвэрлэсэн ажээ.