Дорнод аймгийн иргэд зэвтэй ус ууж, эрүүл мэндээрээ хохирч байгаа талаар удаа дараа мэдэгдэл хийгээд байгаа. Мөн тус аймгийн иргэд эсэргүүцлийн жагсаалыг төв талбайдаа зохион байгуулж байна. Харин аймгийн Засаг дарга М.Бадамсүрэн нь зэвтэй ус гарч байгааг няцааж, үгүйсгэж байгаа юм. Мөн тэрбээр хамгийн сүүлд хэвлэлд ярилцлага өгөхдөө бөгжөө тайлсан нь олны анхаарлыг татаад байна.

Дорнод аймгийн Засаг дарга М.Бадамсүрэнгээс цаг үеийн асуудлаар тодрууллаа.

         Тэрбээр “Нэгдүгээрт, манай аймгийн дулааны шугам олон жил болж байгаа. Огт шинэчлэлт хийгдээгүй байсан. Бид өнгөрсөн онд орон нутгийн төсвөөсөө 7-8 тэрбум төгрөг гаргаж, үе шаттайгаар засварлах ажлыг хийгээд явж байна. Ирэх онд ч мөн тодорхой хэмжээний төсөв суулгаж, засварын ажил хийнэ. Аймгийн хэмжээнд дулааны шугам сүлжээг сольж, засварлахад 33 тэрбум шаардлагатай гэсэн тооцоо, судалгаа гарсан. Одоо зэвтэй ус гарахгүй байгаа. Өнгөрсөн хавар зэвтэй ус гарсан асуудал бага зэрэг гарсан.

        Хоёрдугаарт, хэвлэлд ярилцлага өгөхдөө би угаасаа л бөгжөө тайлдаг. Тухайн үед мартаад ярилцлагаа эхлүүлсэн байна лээ.  Тийм үнэтэй эд биш. Жирийн төрийн албан хаагчийн хэрэгцээнд зориулагдсан мөнгөөр л авч байсан. Эхнэр маань авч өгсөн учраас байнга зүүх ёстой байдаг. Хэвлэлд яриа өгөхөд хүмүүс буруугаар ойлгож магадгүй гээд биедээ байгаа үнэт эдлэлээ авдаг. Бөгж, үнэт эдлэл зүүсэн байна гэж шүүмжилдэг учраас авчихдаг гэсэн үг. Эхнэр маань 4-5 жилийн өмнө 400 мянган төгрөгөөр авч өгч байсан. Хүнээс нуугаад байх үнэтэй эд биш” гэлээ.