Улсын Нэгдүгээр төв эмнэлэг дэлхийн анагаах ухааны салбарын дэвшилтэт технологийг үйлчилгээндээ нэвтрүүлэх, ард иргэдэд хүртээмжтэй, чанартай үйлчилгээг хүргэх зорилгоор маш олон төсөл, хөтөлбөрүүдийг хэрэгжүүлдэг.

   Тэгвэл энэ хүрээнд Улсын нэгдүгээр төв эмнэлэг нь улсын төсвийн хөрөнгө оруулалтаар БНСУ-ын Meerecompany-ийн зохион бүтээсэн “Revo-I” робот мэс заслын системийг үйл ажиллагаандаа нэвтрүүлж, өнөөдөр нээлтээ хийлээ.

   Тус үйл ажиллагаанд УНТЭ-ийн Ерөнхий захирал П.Алтантуяа, БНСУ-ын Meerecompany компанийн дэд захирал Lee Hokun багийн хамт, ЭМЯ-ны Эмнэлгийн тусламж, бодлого хэрэгжилтийн газрын дарга М.Наранпүрэв, УНТЭ Урологи-Андрологийн төвийн дарга Д.Баян-Өндөр болон бусад эмч, мэргэжилтнүүд оролцжээ.

   Энэ үеэр Улсын Нэгдүгээр төв эмнэлгийн Ерөнхий захирал П.Анхтуяа “УНТЭ-ийн мэс заслын тусламж, үйлчилгээнд түүхэнд тэмдэглэгдэн үлдэх нэгэн мөч өнөөдөр тохиож байна. Өөрөөр хэлбэл, Эрүүл Мэндийн сайд асан Ж.Чинбүрэнгийн санаачилгаар одоогийн Эрүүл Мэндийн сайд Э.Батшугарын гүйцэтгэлээр бид “Revo-I” робот мэс заслын системийг үйл ажиллагаандаа нэвтрүүллээ. Уг системийг нэвтрүүлэхэд манлайлан ажиллаж буй УНТЭ-ийн Урологи-Андрологийн төвийн баг хамт олонд талархал илэрхийлье. Бид эмч, мэргэжилтнүүдээ бэлтгэх зорилгоор БНСУ-д сургахаас гадна ХСҮТ-ийн хамт олонтой нягт хамтран ажиллаж эмч, мэргэжилтнүүдээ бэлтгэлээ. Цаашид бид уг технологийг өргөжүүлэх, иргэдэд үйлчлэх хүртээмжийг сайжруулах, ЭМД-д хамруулах, хүний нөөцөө бэлтгэх тал дээр анхаарч ажиллана” гэж онцоллоо.

УНТЭ-ийн Урологи-Андрологийн төвийн дарга Д.Баян-Өндөр “Аливаа эмнэлгийн хүчин чадлыг хоёрхон үзүүлэлтээр л хэмждэг болчихсон. Үүний нэг нь эрхтэн шилжүүлэх шинжилгээ бол нөгөөх нь робот мэс засал юм. Тэгвэл өнөөдөр УНТЭ-д маш сайхан үйл явдал тохиож бид үйл ажиллагаандаа “Revo-I” робот мэс заслын системийг нэвтрүүллээ. Робот мэс заслын тусламжтайгаар өвчтөнд аюул багатайгаар үйлчилгээ үзүүлэх, хурц эмгэгийг авахад гарлаг хүнд бэрхшээлийг шийдвэрлэх боломжтой. Мэс заслын эмч тус роботыг удирдаж тухайн өвчтөний эрхтэнг ялгах, оёдол тавих, хайчлах, тайрах зэрэг маш олон үйлдлийг хийдэг. ХСҮТ-д өнгөрсөн оны 12-р сард нэвтэрсэн роботын дараагийн үеийн роботыг бид ийнхүү ашиглалтад орууллаа. Эрүүл Мэндийн сайд асан ж.Чинбүрэн “Монголын мэс заслын түүхэнд робот мэс заслыг нэвтрүүлэхэд маш чухал шийдвэрийг гаргаж, хөрөнгө оруулалтыг хийсэн. Өнгөрсөн хугацаанд энэ технологийг нэвтрүүлэхэд туслалцаа үзүүлсэн ЭМЯ, УНТЭ-ийн хамт олон, ХСҮТ-ийн эмч, мэргэжилтнүүддээ талархал илэрхийлье” хэмээн хэлжээ.

Энэ үеэр робот мэс заслын үйл ажиллагаанд оролцсон эмч, сувилагч нарт сертификат гардуулжээ.