Цагдаагийн ерөнхий газрын Хэвлэл мэдээллийн төвийн дарга, хошууч Г.Мөнхбаяр цаг үеийн асуудлаар мэдээлэл өглөө.

     Тэрбээр "Сүүлийн үед удаа дараа ял шийтгэл эдэлж байсан эрүүгийн нөлөө бүхий бүлэг этгээдүүд, зэвсэгийн чанартай зүйлс ашиглан, бусдын хөрөнгийг авахаар заналхийлэн, айлган сүрдүүлэх, хүчирхийлэх зэрэг гэмт хэрэг үйлдсэнд цагдаагийн байгууллагаас тусгай чиг үүргийг шуурхай илрүүлэн таслан зогсоож байна. Тухайлбал, урьд өмнө нь удаа дараа ял шийтгэл эдэлж байсан эрүүгийн нөлөө бүхий этгээд болох Ука хочит Алтанхуягийн захиалснаар Хуланаа хочит Хулансамбуу, Ууганаа хочит Ууганзаяа, Сайхнаа хочит Энхсайхан нар бүлэглэн 2023 оны гуравдугаар сарын 5-7-ны өдрийг хүртлэх хугацаанд нэр бүхий иргэний Улаанбаатар хотын нутаг дэвсгэрт байрлах хоёр орон сууцны эзэмших гэрээг хүч хэрэглэн, зэвсгийн чанартай зүйл ашиглан айлган сүрдүүлж, өөрийн нэр дээр шилжүүлэн авч, бусдын эд хөрөнгийг авахаар заналхийлсэн гэмт үйлдэлд Эрүүгийн хуулийн 17.6 зүйлийн хоёр дэх хэсгийн гуравт зааснаар бусдын эд хөрөнгийг авахаар заналхийлэх гэмт хэрэгт Эрүүгийн хэрэг үүсгэж яллагдагчаар татан, мөрдөн шалгах ажиллагаа явуулж байгаа бөгөөд түүний гэр болон тээврийн хэрэгслээс дөрвөн ширхэг хутга, хийн буу болон ангийн зориулалттай сум, амьсгал боогдуулагч зэргийг хураан аваад байна. Мөн Ука хочит Алтанхуяг нь өмнө 2009, 2021 онуудад Эрүүгийн хуулийн тусгайлан бэлдсэн зэвсгийн чанартай зүйл дээрэмдсэн, галт зэвсэг хууль бусаар эзэмшсэн зэрэг гэмт хэрэгт бүртгэгдэж байсан байна" гэв.