Монгол Улсын Ерөнхийлөгч Ухнаагийн Хүрэлсүх Монгол Улс, Япон Улсын хооронд дипломат харилцаа тогтоосны 50 жилийн ойг тохиолдуулан хоёр улсын харилцаа, хамтын ажиллагаанд үнэтэй хувь нэмэр оруулсан Япон Улсын иргэдийг төрийн одон, медалиар шагнах тухай зарлиг гаргасан. Зарлигийн дагуу шагналыг гардуулах ёслол Монгол Улсын Ерөнхийлөгч Ухнаагийн Хүрэлсүхийн Япон Улсын Засгийн газрын урилгаар тус улсад хийж буй төрийн айлчлалын үеэр боллоо.

      Энэ үеэр Алтан гадас одонгоор шагнуулсан Конагаяа Юүкигийн баярын сэтгэгдлийн хуваалцлаа. Тэрбээр “Би 1979 онд Улаанбаатарт сурч байсан. Нэг жил Монголд оюутан байлаа. Өнөөдөр байгууллагын 50 жилийн ой болж байна. Энэ үеэр Монгол Улсын Ерөнхийлөгч ирж, өөрийнхөө гараар бидэнд шагнал олгосонд маш их баяртай байна. Хоёр улсын хамтын ажиллагаа улам бүр дэвжин өргөжиж, хоёр улсын судлаачид сайн ажиллаж байгаа учир Монголын талаар илүү ихийг судлан дэлгэрүүлж, түгээхийг хүсэж байна. Миний хувьд мал аж ахуй түүнтэй холбоотой зан заншлыг судалж ирсэн. Одоо Монголд малчин айл өрх цөөрч байна. Гэхдээ нүүдэлчдийн сэтгэл, сэтгэлгээ та бүхний дотор хэвээрээ үлдсэн. Цаашид монголчуудын  дотоод сэтгэлийн хүчийг судлах хэрэгтэй гэж бодож байна" гэв.