Засгийн газрын ээлжит хуралдаан боллоо. Хуралдаанаас гарсан зарим шийдвэрийн талаар ЗГХЭГ-ын дарга Д.Амарбаясгалан мэдээлэл өгсөн юм. Тэрбээр “Эрдэнэс монгол нэгдэл ХХК-ийг гадаадад болон дотоодод үйл ажиллагаагаа явуулахад нь саад учирч буй зарим асуудлыг шийдвэрлэж байгаа. Тус компани нь охин болон харьяа компаниудыг нэгдсэн удирдлагаар хангаж, нэгдсэн менежментүүдийг зохион байгуулах боломж бүрдсэн. 2019 онд Монгол Улсын Үндсэн хуульд нэмэлт өөрчлөлт оруулахдаа байгалийн баялгийг ашиглах төрийн бодлого нь урт хугацааны хөгжлийн бодлогод тулгуурлаж, одоогийн болон ирээдүйн иргэн бүрд эрүүл аюулгүй орчинд амьдрах эрхийг баталгаажуулж, газрын хэвлийн үр өгөөжийг үндэсний баялгийн санд төвлөрүүлж, тэгш, шударга хүртээнэ гэж заасны дагуу Үндэсний баялгийн сангийн эрх зүйн орчныг бүрдүүлэх ажлыг зохион байгуулж байгаа. Үндэсний баялгийн сангийн нөөцийг бүрдүүлэх уул уурхайн нэгдэл бол “Эрдэнэс монгол” группийг зохион байгуулах шийдвэрийг 2022 оны тавдугаар сард Засгийн газрын тогтоолоор шийдвэрлэсэн байдаг. “Эрдэнэс монгол” групп ХХК-ийн дүрэмд өөрчлөлт оруулж, тус компани охин болон харьяа компаниудыг нэгдсэн удирдлагаар хангаж, нэгдсэн менежмент хийх боломж бүрдүүлэх шаардлагатай болсон. Өнөөдрийн тус компанид дүрмийн өөрчлөлт хийж, “Эрдэнэс монгол нэгдэл” нь дотооддоо дөрвөн компанийг бий болгож ажиллана” гэлээ.