Нобелийн шагналт зохиолч Мө Яний “Мэлхий” роман уншигчдын гарт очоод багагүй хугацааг өнгөрүүлсэн билээ. Энэхүү номыг яруу найрагч А.Урантогос эх хэлнээ буулгасан юм. Тэрбээр дэлхийн шилдэг уран зохиолыг орчуулахаас гадна чамгүй сайн яруу найрагч нэгэн. Түүний уран бүтээлүүдийг танилцуулбал “Өдөр бүхний элегия", “Гуравдугаар сарын байшийн” “Эрсийн зуун” зэрэг шүлгийн номуудын хэвлүүлж уншигчдынхаа гарт хүргэсэн билээ. Түүнчлэн Тайванийн яруу найрагч Ши Мөрөнгийн “Мянган жилийн хүсэл” сонгомол түүвэр, Ли Шиү Вэний “Орхимжит дэлхий” тэргүүт бүтээлүүдийг хятад хэлнээс орчуулаад буй юм.

Ингээд яруу найрагч, орчуулагч А.Урантогосын  “Улаанбаатарыг шувуу байхыг би үзсэн” номын онцлох шүлгүүдээс уншигч танд хүргэж байна. 

"УЛААНБААТАРЫГ ШУВУУ БАЙХЫГ..."

Улаанбаатарыг шувуу байхыг би үзсэн

Усан цэнхэр далавчиндаа үл үзэгдэх шархтай

Уяхан сэтгэл, зөөлөн харцтай

Амьтан байхыг нь би үзсэн

Аль эртийн дуу аялавч

Аньсага юу нь хурын чийгтэй

Тэмүүлэл мөрөөдөлдөө залуу насны тамгатай

Тэнгэрийн өнгөт амьтан  байхыг би үзсэн

Салхи хүртэл дайжиж хулжсан хүйтэн шөнийн гар тавирахад

Сарниж үүрд алга болсон хайран бүхэн минь баяртай

Гуньж гомдож холдсон учралуудаа мартсан

Гэгээнтэний зүрхтэй залуу нас минь баяртай

Баяртай, миний

Гэнэн цагаахан Улаанбаатар

Баруун гараас алдуурч ниссэн

Тэнгэрийн шувуу залуу нас минь!

ЗОЛИОС

Цээжний минь гүнээс

Чиний  сугалж орхисон

Ичимхий эрхтнийг хайр гэдэг

Чичрэнги дорой тэр

Хөлийн чинь доор гишгэгдэж

Шалаар нэг савируулан

Ёолж байхыг би үзлээ

Амраглал, тансаглал, чиний бичсэн шүлгүүд

Адын ховс мэт цөлмөхийг харлаа

Далдиран далдичсаар нүдээ ч сох хатгуулаад

Дэмий л нэрээр чинь дуудан буйг сонслоо

Нулимснаас халуун түүний цус

Намайг түлж ханаад өөрөө хатсан

Ул мөргүй сарнисан түүний оронд

Өөр хэн ч намайг аргадах гэж ирээгүй ээ

Үр минь мэт бодогдон арга тасрахдаа

Үхлийн дотор ч бурхан залбирч суудагт итгэсэн

Амьдралд амьд үлдэнэ гэдэг нь....

Дурлахаас ч хэцүү солиорлыг чи мэднэ

Дуу чинь түгэхээ болиод  агаарт хөлдөж орхино

Хөл чинь мод мэт ургаж уншсан номууд чинь цэцэглээд

Хэн ч үл хүсэх нэгэн шөнө бүр чамайг таална

Дурлахаас ч илүү солиорлыг чи мэднэ

Духанд чинь биш гэдсэнд ухаан байсныг чи ойлгоно

Шаналан зовлонгоороо цайны даруулга хийгээд

Шал танихгүй хүмүүстэй амьдарч яваагаа чи мэднэ

Дурлахаас ч илүү солиорлыг би мэднэ

Дурлаж, дурлуулж явах гунигтайг бүгд мэднэ

Хамгийн сүүлчийн асуултаа одоо дэлгэх хэрэггүй ээ

Хайртай байсан бүхэндээ хоргодохгүй болохын шалтгаан тэр

Ээждээ

Сайхан шүлэг уншсаны дараах

Санаа алдалт шиг

Шимшрээд байх чинь

Шаналан, эсвэл юу болохыг

Хэлээч, та надад

Хайр яагаад таны

Үсийг шингэлж  орхисныг

Өөртөө буй бүхнээрээ

Хулдан тэвэрмээр байгаагаа

Хэлмээр санагдана

Ээж ээ, та яагаад

Ийм хүлцэнгүй юм бэ

Хүлцэнгүй сайхан чинь

Намайг уйлуулаад байна

Үг ч хэлж үл чадна

Ээж  ээ, охин чинь тань шиг

Ээж болчихвол

Хайраас өөр хэлгүй

Харалган хүн болчихвол

Ээж ээ

Ээж минь дээ

Харанхуйн дуу

Бие дотор сүүдэртэх

Хар нарсан байшин

Баларч өмхрөх зураг

Хэзээ тодрох бол

Үүрд гэрэл үзэхгүй

Дөрвөн хананы дунд

Үнс мэт бутрах намайг

Үггүй зүүд хучна

Хоолой дундуур татсан

Хуучин хүнд төмөр

Ховхорч зэврэн хэзээ

Нар энд тусах бол

Харанхуйн аварга савдаг

Хурц шүдээ ярайлган

Халуун цус амсаж

Анир үгүйг будна

Өөрийн нулимсаар би энд

Гутрал цөхрөлөө тэжээнэ

Өөрийн хүслээр би энд

Уй гунигт мансуурч

Өөрийн хэлээр би энд

Амьд хэмээн хашхична

Надад үнэн эрх чөлөө өгөөч

Надад үнэн хайр өгөөч

Надад үнэн нэр өгөөч

Надад үнэн хувь тавилан өгөөч

Гүн цэнхэр зүрх

Далай намайг ойлгоод

Чамайг илгээсэн байжээ

Давлагаа ирж буцан

Би далайд уусна

Өдөр бүхний гүнээс

Өөрийгөө олж

Бүлээцэхгүй

Бүхэл биеэ өгөхгүй

Явсан ч холдохгүй

Холдлоо ч хагацахгүй

Гүн цэнхэр зүрх

Намайг нөмрөн цохилно