УЛСТӨРЧДИЙН НАМААС ГАРЛАА ГЭЖ УЙЛЖ ГҮЙГЭЭД АЛБАН ТУШААЛД ТОМИЛОГДДОГ, КВОТ АВДАГ БАЙДАЛ ГАЗАР АВЛАА

      Ардчилсан намынхан “алалцаж” байна. Гишүүд нь намаа муулж, ээлж дараалан намаасаа гарч, зарим нь жагсаалтаар сонгуульд нэр дэвшихгүй гэдгээ мэдэгдээд эхэлсэн. Тэдний намаас гарч, жагсаалтаар нэр дэвшихгүй гэх шалтгаан нь Ардчилсан намын дарга Л.Гантөмөр, Ц.Баярцогт нартай холбоотой гэх. Учир нь тэднийг МАН, Х.Баттулга хоёрт худалдагдсан гэж нэр дэвшигчид нь үзээд байгаа. Хөгшин хүн үхэхээрээ айлгана гэдэг шиг Ардчилсан намынхан сонгуулийн өдрүүдэд намаасаа гарна гэдгээрээ айлгаж байна. Жирийн үед намаас гарна гэдэг ойлголт ямар нэгэн албан тушаалын үнэ цэнтэй байдаг. Хэн нэгэн “Намаасаа гарна, намаас гарчихаад улсын мөнгөнөөс идэж, уусан булхайг чинь олон нийтэд дэлгэнэ” гэх мэтээр шантаачилж, хэн нэгнийг сүрдүүлж байгаад Элчин сайдын суудлыг авдаг, Төрийн өмчит компаниудын эзэн болдог тохиолдол цөөнгүй. Иймэрхүү арга ядсан, ямар нэгэн хэргийг албан тушаалаар барьцаалсан нөхцөл байдал Монголд улам бүр батжиж байна. Намаасаа гарлаа гэж уйлж гүйгээд албан тушаалд томилогддог байдал сонгуулийн өдрүүдэд газар авах шинжтэй болж байна. Үүний нэгэн жишээ нь Ардчилсан намын гишүүн З.Нарантуяа, Г.Уянга нар байлаа.

     Тухайлбал, Ардчилсан намын Үндэсний бодлогын хорооны хуралдааны үеэр З.Нарантуяа “Ардчилсан нам дампуурсан байна. Нэр дэвшүүлэх хурлаа хийж чадахаа больсон байна. Энд хүчтэй нь нэрээ бичүүлээд л гарч байна. Ямар ч нэр дэвшүүлэлт болсонгүй. Би Ардчилсан намаас гарч байгаагаа мэдэгдэж байна” хэмээн сонгуульд нэр дэвшигчдийг тодруулах үеэр мэдэгдсэн. Харин түүнийг удалгүй сонгуулийн хоёрдугаар тойрог буюу Говь-Алтай, Завхан, Ховд, Увс аймагт тойргоос нэр дэвшүүлэхээр болсон байдаг. Өөрөөр хэлбэл, намынх нь түүнийг аргадаж, эрхлүүлсэн хэрэг. Тэрбээр 2016 онд Завхан аймагт Ардчилсан намаас нэр дэвшихдээ түүнийг нутгийн иргэдэд их хэмжээний мөнгө тарааж, Сонгуулийн тухай хууль зөрчсөн гэх бичлэг нь олон нийтэд цацагдаж байсан. Тухайн үед түүний нөхөр Д.Баяндүүрэн нь Сонгуулийн Ерөнхий хороонд албаны даргаар ажилладаг. Ингэснээр түүнийг “хар машины хакерчин” гэх сөрөг Пи-Ар өрсөлдөгчид нь явуулж байлаа. Тэгвэл саяхан түүний охин Б.Энхдөлөөн Ардчилсан намын нарийн бичгийн даргаар ажиллахаар болсноо мэдэгдсэн Z  үеийн төлөөллүүдийн нэг болсон юм.

     Уг нь төрийн албыг цэвэр байлгахын тулд намаас гарсныг нь шууд явуулчихдаг байх хэрэгтэй. Тэгэхгүй бол дуртай нь намынхнаараа аргадуулж, хэрэг барьцаалдаг, наймаалцдаг байдал ил, далд өрнөж байна. Харин түүний дараахан Г.Уянга Л.Гантөмөрийг сонгуулийн тухай хууль зөрчсөн хэмээн хандивын мөнгөө буцааж нэхсэн. Тэрбээр “Ардчилсан нам надаас 10 сая төгрөгийн хандив, Үндэсний бодлогын хорооны гишүүн биш байтал зургаан сая төгрөгийн татвар авсан. Тиймээс тус мөнгийг буцааж олгоно уу” хэмээн мөнгө шилжүүлсэн баримтаа ил болгож, дансаа тавьсан байдаг.

ЖАГСААЛТААС ТАТГАЛЗАГСАД

      Мөн Ардчилсан намын Үндэсний бодлогын хорооны гишүүд болон Ц.Жадамбаа, П.Нүрзэд, М.Чимэддорж, Л.Отгонцэцэг нар жагсаалтад нэр дэвшихгүй гэдгээ мэдэгдсэн. Учир нь тэдний хувьд нэр дэвшүүлэх үйл явц шударга бус болсон гэж үзэж байгаа гэх.М.Чимэддорж өөрийн цахим хуудастаа “Улс төр алдар хүнд биш. Албан тушаал биш. Улс төр бол итгэл үнэмшил, үйл хэрэг” хэмээсэн бол П.Нүрзэд “Надтай зөвшилцөж, жагсаалтаар нэр дэвших шийдвэр гаргаагүй тул АН-ын жагсаалтаас нэрээ татлаа” хэмээсэн. Тэдний жагсаалтаас гарч буй шалтгаан нь зөвхөн Л.Гантөмөртэй холбоотой юу үгүй юу гэдэг нь асуудал дагуулсан хэвээр байна.Тэднээс гадна жагсаалтад нэр нь багтсан ч шөнөдөө нэр нь хасагдсан, жагсаалтаар хойгуур бичигдэж, байр нь солигдсон гэх асуудал одоо хүртэл Ардчилсан намынхны дунд үүсэж байна.