Монголын сэтгүүлчдийн нэгдсэн эвлэлийн сэтгүүл зүйн салбарын оны шилдгийн шилдгийг тодруулах “Ган үзэг 2022” наадмын Мэдээллийн сайтын шилдэг сэтгүүлчээр Эргэлт.мн мэдээллийн сайтын сэтгүүлч Баатарцогтын Цогтбаяр тодорлоо. Эргэлт.мн мэдээллийн сайтын сэтгүүлч Б.Цогтбаяр нь энэ удаагийн “Ган үзэг” наадамд эрэн сурвалжлах цуврал бүтээлүүдээрээ өрсөлдсөн юм.

         “Оюунлаг эргэлт медиа групп”-ийн дэргэдэх Эргэлт.мн мэдээллийн сайт нь улиран одож буй 2022 онд “Эргэлтийн номын сан цуврал”, “Эргэлт” сэтгүүлийг эрхлэн гаргаж, уншигчдын хүртээл болгоод байгаа билээ. “Эргэлтийн номын сан цуврал” бүтээлд сэтгүүлч Б.Цогтбаяр нь эдийн засгийн гэмт хэргийн “Цагийн төрх” номоо баринтаглаж, “Эргэлт” сэтгүүлд эрэн сурвалжлах даацтай цувралуудыг нийтлүүлсэн билээ. Түүний даацтай, уншууртай, эрэн хайгуул хийсэн эрэн сурвалжлах материалаас онцолбол, “ТӨВ БАНКАН ДАХЬ ТОМЧУУДЫН ТАВИУЛУУД”, “С.БЯМБАЦОГТ САЙДЫН ХОВДООС ХОТ РУУ ТҮРСЭН БҮЛЭГЛЭЛИЙГ ХУУЛЬ ХЯНАЛТЫНХАН ШАЛГАХ БОЛООГҮЙ ЮУ”, “Б.ЖАВХЛАНГИЙН ЗАВХРАЛ” цуврал, “Цагаан халадтай тендерийн наймаачид” буюу сайд С.Энхболдоор толгойлуулсан гэмт хэргийн бүлэглэл”, ХЯТАДЫН ЗЭВСЭГ ҮЙЛДВЭРЛЭГЧ “НОРИНКО ГРУПП”-ИЙН ОХИН КОМПАНИУД “ЭРДЭНЭС ТАВАНТОЛГОЙ” ХК-ИЙГ “ЭЗЛЭХЭД” ХЭН ТУСАЛСАН БЭ”, “ГААЛИЙНХАНД ГАВ ЗҮҮЛГЭХ 1.9 САЯ ТОНН НҮҮРСНИЙ ХУЛГАЙН ХЭРГИЙН МӨРӨӨР” “КАПИТАЛ” “БАНКНЫ ДАМПУУРЛЫН АРД УИХ-ЫН ГИШҮҮН АСАН Ж.БАТЗАНДАН, ТҮҮНИЙ ТУСЛАХ Г.АЮУЛГҮЙ НАР БАЙСАН УУ” зэрэг бүтээл юм.

       Сэтгүүлч Б.Цогтбаяр нь улиран одож буй 2022 онд Монголын сэтгүүл зүйд мэргэжлийн мэдээллийн сайтын өнгө төрхийг бий болгох үйлсэд оюун санаа, мэдрэмж, эрэл хайгуул, зогсолтгүй хөдөлмөрөө дайчлан зүтгэж, улс төр, нийгмийг шуугиулж, уншигчдын таашаалд нийцсэн нийтлэл, ярилцлага, эрэн сурвалжлах цуврал бүтээлээрээ уг шагналыг хүртлээ.