Эргэлт.мн мэдээллийн сайт “Орон нутгийн сонгууль-2024”-ийг угтан аймаг, дүүргийн ИТХ-ын төлөөлөгчдийн талаарх баримтыг цувралаар танилцуулж эхэлсэн. Тэгвэл энэ удаад Сонгинохайрхан дүүргээс ИТХ-д горилогчдын хэн нь хэн болохыг танилцуулж байна.

       Сонгинохайрхан дүүргийн захын гудамжаар ороход л өмнөх болон одоогийн удирдлагуудад тавих дүн нь тодохой болно доо уг нь. Тодруулбал, тус дүүрэг хүн амын нягтаршилаараа нийслэлд тэргүүлдэг хэдий ч хамгийн хөгжил муутай, амьжиргааны түвшингээрээ ч сүүл мушигдаг. Гэтэл тус дүүрэгт дарга даамлаар очсон хэнбугай ч байсан Саарал ордон бараадаж, үлдсэн нь нийслэлд дарга болж дэвшээд дүүрэг нь хуучин байрандаа үлддэг гэдэгтэй санал нийлэх хүн олон биз. Хамгийн  сүүлд гэхэд тус дүүргийн Засаг даргаар ажиллаж байсан Н.Алтаншагай УИХ-д гишүүнээр сонгогдсон бол Сонгинохайрханы үе үеийн Засаг дарга нар, ИТХ-ын төлөөлөгч нийслэлд дарга болон дэвшсэн. Тэгвэл Сонгинохайран дүүргээс Саарал ордон руу санаархагч дараагийн ээлжнийхэн орон нутгийн сонгуульд бэлдэж эхлээд тун завгүй явна.

       Уг нь Сонгинохайрхан дүүргийн 2020-2024 оны үйл ажиллагааны хөтөлбөрт иргэдийн амьжиргааны түвшинг дээшлүүлж, хүүхэд бүрийг тэгш суралцах боломжоор хангана. Ойн зурвас, ногоон төгөл, цэцэрлэгт хүрээлэнг барьж байгуулах, агаарын бохирдлыг  бууруулах, хөрсний бохирдолыг бууруулж, эрүүл орчин бүрдүүлэх, авто замын засварын ажлыг эрчимжүүлж, нийтийн тээврийн хүртээжийг нэмэгдүүлэх гэх  амлалтыг цагаан дээр хараар дурайтал бичсэн байна. Гэтэл бодит байдал дээрээ Сонгинохайрхан дүүргийн удирдлагуудын өгсөн амлалт биелэлээ олсонгүй.

        Тэр байтугай дүүргийн Засаг дарга нь Саарал ордон бараадаж, ИТХ-ын дарга нь Засаг дарга болж тушаал ахиад нийслэлд төлөөлөгчөөр суух бэлтгэлээ базаагаад байна.

      
Сонгинохайрхан дүүргийн Засаг дарга Б.Хуягбаатар- Хэнтий аймгийн Өмнөдэлгэр сумын харьяат, бизнесийн удирдлагаар боловсрол эзэмшсэн гэх тэрбээр Налайх дүүргийн намын хорооноос ажлын гараагаа эхлүүлсэн байдаг. Тэрбээр улсын бүртгэгчээс улсдаа хамгийн их хүн амтайд тооцогдох дүүргийн Засаг дарга болоод удаагүй байна. 2011 онд УИХ-ын гишүүн асан Н.Ганбямбын бие төлөөлөгчөөр Саарал ордонд хөл тавьсан тэрбээр 2013 онд Сонгинохайрхан дүүргийн ЖДҮ-ийн газарт даргаар очиж, Сонгинын фракцид нэгдэж байжээ. Ингэхдээ нийслэлийн Засаг дарга асан Д.Сумъяабазарын туслахаас Сонгинохайрхан дүүргийн МАН-ын хорооны дарга болсон.  Дүүргийн ИТХ-ын дарга болтлоо дэвшсэн тэрбээр Засаг даргын тамгаа гардаж аваад удаагүй байна. Өдгөө нийслэлд хүч үзэж, Саарал ордон бараадах шат ахих нүүдлээ хийсэн бололтой.

НИТХ-ын төлөөлөгч, Зорчигч тээврийн нэгтгэл ОНӨААТҮГ-ын дарга Ц.Баттөр- Улаанбаатар хотын уугуул гэгдэх тэрбээр нийслэлийн ерөнхий боловсролын 40 дүгээр сургуулийг төгсөж, "Орхон" их сургуульд эрх зүйчээр суралцаж төгссөн. Нийслэлийн Засаг дарга Х.Нямбаатарыг "Орхон" их сургуульд багшилж байхад нь суралцаж төгссөн гарын шавь нь. Сургуулиа төгсмөгцөө Х.Нямбаатарыг дагаж,  түүнийг Сонгинохайрхан дүүргийн ИТХ-ын дарга байх үед буюу 2013-2016 онд СХД-ийн Нийгмийн хөгжлийн хэлтсийн даргаар нь ажиллаж байсан. Улмаар 2017-2020 онд Х.Нямбаатарыг гишүүн болмогц зөвлөхөөр ажилласан. Харин 2020 онд Сонгинохайрхан дүүргээс НИТХ-ын төлөөлөгчөөр сонгогдож, өдгөө “Нийслэлийн зорчигч тээврийн нэгтгэл”-ийн даргаар давхар ажиллаж эхэлсэн. Энэ удаагийн орон нутгийн сонгуульд багштайгаа баг болж дахин нэр дэвшиж байна.

       Хотын ерөнхий менежер Ц.Төрхүү- 1998 онд нийслэлийн 42 дугаар сургууль, 2002 онд ХААИС, 2007 онд Удирдлагын академийг төгссөн. Мөн Их Британийн Вермингэмийн их сургуульд мэргэжил дээшлүүлсэн. 2012-2016 онд Сонгинохайрхан дүүргийн Засаг даргын орлогч, 2016-2023 онд Ус сувгийн удирдах газрын даргаар ажиллаж байсан гэх намтартай. Хотын ерөнхий менежерээр ажиллаж байсан М.Баяраа нэгдүгээр сард үүрэгт ажлаасаа чөлөөлөгдсөнөөр түүний оронд Ц.Төрхүүг томилсон. Сүүлд “Би 20 гаруй жил төрд ажиллахдаа Х.Нямбаатар шиг дарга хараагүй” хэмээн хотын даргад тал зассан тэрбээр төрд сууж, төлөөлөгч болох эрхээ намаасаа өвөртлөөд байна.

НИТХ-ын төлөөлөгч Э.Хулан- Түүнийг олон нийт УИХ-ын дарга асан М.Энхболдын охин гэдгээр нь илүүтэй мэдэх биз. Тэрбээр 2016, 2020 онд Сонгинохайрхан дүүргийн ИТХ-д хоёр удаа сонгогдон ажиллаж буй юм. Тэрбээр 2016, 2020 онд Сонгинохайрхан дүүргийн ИТХ-д хоёр удаа сонгогдон ажиллаж буй юм. Мөн тэрбээр Нийслэлийн хүүхэд, гэр бүлийн хөгжлийн төвийн дэд даргаар ажиллаж байсан ч шахалт үзүүлж, үүрэгт ажлаас нь чөлөөлсөн гэх асуудал хөндөгдөж байлаа.

Нийслэлийн ерөнхий архитектор бөгөөд Хот байгуулалт, хөгжлийн газрын дарга Г.Батзориг- Нийслэлийн газрын албанд мэргэжилтнээр ажиллаж байгаад 2019 онд СХД-ийн Газрын албаны даргаар томилогдсон. Улмаар 2020 онд Нийслэлийн Газар зохион байгуулалтын албаны орлогч дарга, 2021 онд дарга болж дэвшсэн. Г.Батзориг Хэнтий аймгийн уугуул бөгөөд Х.Нямбаатарын “татаас”-аар Нийслэлийн Газар зохион байгуулалтын албаны дарга болж томорсон гэгддэг.  Өнгөрсөн нэгдүгээр сард тэрбээр Нийслэлийн ерөнхий архитектор бөгөөд Хот байгуулалт, хөгжлийн газрын даргаар томилогдсон билээ.

Нийслэлийн зам тээвэр, хөдөлгөөн зохицуулалтын хорооны дарга Б.Сэргэлэнбаатар- Х.Нямбаатарыг СХД-ийн ИТХ-ын дарга байх үед буюу 2013-2016 онд Ажлын албаных нь мэргэжилтнээр нь ажиллаж байсан. Улмаар 2016 онд Х.Нямбаатарыг УИХ-ын гишүүн болмогц зөвлөхөөр нь ажиллаж эхэлсэн. 2020 онд СХД-ээс НИТХ-ын төлөөлөгчөөр сонгогдсон.

Хотын  орлогч асан Н.Баярчимэг- Хотын дарга асан Д.Сумъяабазарын хоёрдугаар орлогчоор ажиллаж байсан НИТХ-ын хурлын төлөөлөгч Н.Баярчимэг Сонгинохайрхан дүүрэгт ИТХ-д нэр дэвшихээр болжээ. Түүний хувьд хотын дарга асан Д.Сумъяабазарын улс төр, бизнесийн ойрын хамтрагч. Н.Баярчимэг нь Д.Сумъяабазар, Д.Дагвадорж нарын эзэмшдэг “Үндэсний хөрөнгө оруулалтын банк”-нд 2011 онд хуульчаар ажилд орж, 2016 он хүртэл ахлах хуульч, хэлтсийн дарга болтлоо ажилласан. Улмаар 2016-2017 онд Үндэсний хөгжлийн газрын хуулийн хэлтсийн даргаар ажилласан байдаг. Н.Баярчимэг 2017 оны аравдугаар сард Д.Сумъяабазарыг Уул уурхай, хүнд үйлдвэрийн сайдаар томилогдоход тус яамны Хуулийн хэлтсийн даргаар нь томилогдож, мөн л дагаж явсан. УУХҮЯ-ны Хуулийн хэлтсийн даргаар ажиллаж байгаад хоёр жил орчмын дараа буюу 2018 онд “Эрдэнэс тавантолгой” ХК-ийн дэд захирал болсон. Н.Баярчимэг “Эрдэнэс тавантолгой майнинг” ХК-ийн дэд захирлаар жил орчим ажиллаад Сонгинохайрхан дүүргийн Засаг дарга Ж.Сандагсүрэнгийн орлогч болсон. Сонгинохайрхан бол Д.Сумъяабазарын тойрог, Ж.Сандагсүрэн бол Д.Сумъяабазарын “туслах” байсан, цэвэр түүний хүн. Ингээд Ж.Сандагсүрэнгийн орлогчоор ажиллаж байгаад СХД-ээс НИТХ-ын төлөөлөгч болон дэвшиж, Д.Сумъяабазарын орлогч болж албан ёсоор дэргэд нь ирсэн.