Дархан-Уул аймгийн Дархан сумын гуравдугаар багийн нутаг дэвсгэрт “Тэс Петролиум” ХХК-ийн түлшний агуулах энэ сарын 1-нд дэлбэрч, гурван хүний амь эрсэдсэн. Дархан-Уул, Сэлэнгэ, Орхон, Улаанбаатар хотын Онцгой байдлын алба хаагчид найман цаг ажиллаж, галыг бүрэн унтраасан байдаг. Гэвч хоёр иргэний цогцсыг эрэн хайх ажиллагааг үргэлжлүүлсэн. Эрлийн талаар Дархан-Уул аймгийн Онцгой байдлын мэргэжилтэн С.Сарангаас тодрууллаа. Тэрбээр “Устай холилдсон АИ-92 шатахууныг суллаж, эрэн хайж байсан хоёр иргэний цогцсыг түлшний савнаас олсон. Цогцсыг холбогдох байгууллагад нь хүлээлгэн өгч, Эрэн хайх ажиллагааг зогсоосон” гэлээ.