Сүхбаатарын талбайд өчигдөр буюу арванхоёрдугаар сарын 4-ны өдөр иргэд үзэл бодлоо илэрхийлэн  жагссан билээ. Энэ үеэр хувцсаа тайлж, эсэргүүцлээ илэрхийлсэн Л.Дашнямаас ямар шаардлага тавьж, жагссан талаар тодрууллаа.

  -Өвлийн хүйтэнд Төв талбайд найзтайгаа хамт хувцсаа тайлж, эсэргүүцлээ илэрхийлсэн. Яагаад хувцсаа тайлах хэмжээнд хүрчихсэн юм бэ?

      -Монголын нүүрсийг хятад хүний цусаар угаасан үйл явдал боллоо. Нэг үхрийн эвэр доргивол, мянган үхрийн эвэр доргино гэж үг байдаг. Монголчуудаас нүүрсний хулгайн хэрэгт холбогдсон бүлэг этгээдүүдийг ч шийтгэгдэх ёстой. Дээрээс нь манай хууль, эрх зүйн орчин сул байгааг харуулж байна.

      40 сая төгрөгөөр торгуулаад өнгөрөх төдий биш нүүрсний хулгайд холбогдсон бүх хүний байгаа хөрөнгийг нь хураах ёстой. Энэ бол тэдний хөрөнгө биш монгол ард түмний хөрөнгө. Бид баялагтаа эзэн Монгол Улс байх ёстой. Нүүрсний хулгайчдын нэрсийг зарла гэсэн шаардлага тавьж, эсэргүүцлээ илэрхийлсэн. Ингэвэл бүх зүйл цаанаасаа жигдрээд алхам алхмаар урагшилна шүү дээ.

 -Хувцсаа тайлж эсэргүүцлээ илэрхийлж байгаад явчихсан. Яагаад явчихсан юм бэ. Хувцсаа тайлж эсэргүүцлээ илэрхийлсний дараа ямар нэгэн дарамт шахалт ирсэн үү?

     -"Засгийн газар огцорсон дээр өөр шинэ залуучуудыг гаргаж ирье" гэсэн жаахан боломжгүй, сэтгэл хөөрлөөр хандсан зүйл ярьж байсан. Эхний ээлжид Л.Оюун-Эрдэнэ сайд нүүрсний хулгайд оролцсон этгээдүүдийг нэрийг зарлаад, цаашлаад алхам алхмаар хулгайн хэрэгт хариуцлага тооцох хуулийн зохицуулалт хэрэгтэй.

     Миний хувьд мөнгө, төгрөгөө алдахад их юм алдаагүй, эрүүл мэндээ алдвал харин жаахан юм алдсан гэж бодож болох юм. Гэхдээ би өнөөдөр эх орноо алдвал юу ч үгүй болж байгаа гэсэн үг. Жагсаж байх үед "Хувцсаа өмсөөд яв" гэсэн шаардлага ирсэн. Миний хувьд үргэлжлүүлэн жагсана. Залуучууд илүү чөлөөтэй сэтгэлгээтэй, юмны зөв өнцгийг харж байна.

 -Малгайгүй явахад ч хэцүү хүйтэн өдрүүд үргэлжилж байгаа шүү дээ. Одоо биеийн байдал нь хэр байна вэ?

   -Маш хүйтэн байсан. Бага зэрэг даарсан. Биеийн байдал сайн байгаа.

 -Цаашид жагсаалаа үргэлжлүүлэх үү?

      -Ерөнхий сайд Л.Оюун-Эрдэнэ та тэр нэрсийг зарла, зарлаж чадахгүй бол дараагийн бай та байх болно. Хулгайч хулгайчийгаа барьж өгдөггүй гэдэг үг байдаг. Хэрэв та үнэхээр хамааралгүй юм бол тэдгээр нэрсийг зарлаж өг. "Бацаан юм яриад байна" гэж манай дээд үеийнхэн дээрэнгүй харьцаг. Залуучууд тэмцэхэд бэлэн байгаа шүү.