Татварын ерөнхий газрын дарга Б.Заяабалын тушаал, шийдвэрийн дагуу тус албаны зарим албан хаагчийг 5-15 сая төгрөгөөр шагнаж, урамшуулсан талаар бид өмнө нь мэдээлсэн. Тодруулбал, 2020-2021 онд Татварын албанд ажиллаж байгаа 32 албан хаагчид 382 сая төгрөг татвар төлөгчийн мөнгөнөөс олгосон гэх мэдээлэл цахим сүлжээнд цацагдаад байгаа юм.  

Бид энэ талаар Хэнтий аймгийн Татварын хэлтсийн дарга А.Гантөмөрөөс тодрууллаа. Тэрбээр 2021 онд 15 сая төгрөгийн урамшуулал авсан билээ.  

        А.Гантөмөр “15 сая төгрөгөөр дэмжлэг үзүүлсэн нь үнэн. Би орон сууцны зээлтэй учраас хүсэлт гаргасан юм. Хүсэлт өгч, тушаал шийдвэр нь дүрэм, журмын дагуу гарсан байгаа. 15 сая төгрөгийн урамшуулал авч, орон сууцныхаа зээлийг дарсан. Байгууллагын дотоод журам болон төрийн албан хаагчид дэмжлэг үзүүлэх журам байдаг шүү дээ. Бүх л төрийн байгууллага дэмжлэг үзүүлдэг. Монгол Улсын төсвийг бүрдүүлэхийн тулд бид өдөр, шөнөгүй л ажиллаж байгаа. Төрийн байгууллагаас ганц удаа дэмжлэг авсан. Би насаараа буюу 30 гаруй жил олон хүнд чичлүүлж, төсөв бүрдүүлэхийн төлөө ажиллаж байна” гэлээ.