Төр нийгмийн зүтгэлтэн С.Зоригийг онц хэрцгийгээр хөнөөсөн хэргээр ял эдэлж буй Т.Чимгээ, Б.Содномдаржаа нарыг эрүүдэн шүүж, хэрэг хүлээлгэсэн үндэслэлээр ТЕГ-ын дарга асан Б.Хурц, УЕП-ын орлогч прокурор асан Г.Эрдэнэбат нарын есөн хүнийг буруутган шалгаж буй. Өнөөдөр Улсын дээд шүүх тэдэнд холбогдох хэргийг хаалттай хэлэлцэж байгаа.

        Тэгвэл өчигдөр УЕП-ын орлогч прокурор асан, С.Зоригийн хэргийг шалгах ажлын хэсгийн ахалж байсан Г.Эрдэнэбат "Улаан бал" ярилцлагын нэвтрүүлэгт оролцож, С.Зоригийн хэрэгт буруутгагдсан гэмт хэрэгтнүүдийг хэрхэн шалгасан, нотлох баримтуудыг хэрхэн бүрдүүлсэн тухай улсын нууцад хамаарахаас бусад процессуудыг ярьсан. Тэрбээр "Т.Чимгээ, Б.Содномдаржаа нар С.Зоригийг хөнөөсөн нь бүх баримтаар нотлогдсон"  гэж тайлбарласан. Өөрөөр хэлбэл, тэднийг эрүүдэн шүүж зориудаар хэрэг хүлээлгэсэн зүйл байхгүй гэж байр сууриа илэрхийлсэн юм. Тэгвэл Г.Эрдэнэбатын ярилцлагаас онцлох эшлэлүүдийг түүвэрлэн хүргэж байна. 

Т.Чимгээгийн ах өлсгөлөн зарлаж  байгааг цаанаасаа зохион байгуулалттай гэж харж байна. Ер нь Т.Чимгээ, Б.Содномдаржаа нарын ар гэрийнхний гаргаж байгаа үйлдлүүд нь цаанаасаа зохион байгуулалттай гэж харагдаад байдаг. Энэ өлсгөлөн нь ч өөрийнхөө хүсэл зоригоор биш болов уу.

Хэрвээ Ц.Элбэгдорж С.Зоригийн хэргийн “зохион байгуулагч” юм бол өөрөө цаазын ялыг халж яадаг юм. Харин ёстой жинхэнэ энэ хэрэгт холбогдсон гурван хүнийг цаазаар аваад, өөрөөсөө бүр мөсөн зайлуулж, хэргийг хаах ёстой байсан биз дээ. 

С.Зоригийн хэргийг зохиомлоор шийдсэн бол гэмт хэрэгтнээр муу нэр нь олонд түгсэн, илүү сүртэй хүмүүсийг сонгох байсан. С.Зоригийн хэргийг бодит баримтаар шийдвэрлэсэн. 

Т.Чимгээг өөрийнх нь хэргээ хүлээсэн мэдүүлгээр яллаагүй. Түүнийг нууцаар мөрдөж, мөшгиж байх үед Т.Чимгээ энэ хэргийг үйлдчихсэн, энэ хэрэгт санаа зовж буй нь өөрийнх нь яриагаар нотлогдсон учраас түүнийг яллагдагчаар татсан

Энэ хэргийн материалуудыг нууцаас гаргаасай. Нууцаас гарахыг нь баяртайгаар хүлээж байгаа хэд хэдэн баримтууд бий. Тэгвэл энэ хэргийг хэн үйлдсэн бэ гэдэг нь ард түмэнд тодорхой харагдана 

Т.Чимгээ гүйцэтгэх ажлын баримтаар хэрэг үйлдсэн нь нотлогдсон. Дээрээс нь гэрчийн мэдүүлгээр нотлогдсон. Б.Содномдаржаа ч ялгаагүй. 

1998 оны аравдугаар сард Т.Чимгээ Дорноговь аймагт байгаагүй гэж хөршүүд нь мэдүүлсэн

16 настай хүүхэд, хүүхэдтэй эмэгтэй хүн алахгүй гэж эргэлзээд байдаг нь үндэслэлгүй зүйл. Хүмүүс эрүүл нүдээр хараасай. 

 

Энэ хэргийг айхтар мэргэжлийн хүн үйлдээгүй. Амин газрыг нь олохгүй 18 удаа хутгалсан хэрэг шүү дээ. Хүмүүс гоё түүхэд дуртай л даа, бодит амьдрал тийм биш.  

Ц.Нямдоржийг “Хятадын тагнуул” гэж хэлсэн Баатар генерал сүүлдээ “Улсын нууц задруулсан” хэргээр буруутгагдсан шүү дээ

Т.Чимгээ, Б.Содномдаржаа нарыг эрүүдэн шүүж мэдүүлэг авч хэрэг хүлээлгэсэн зүйл байхгүй

Б.Хурц, Г.Эрдэнэбат нарыг яагаад эрүүдэн шүүсэн гэж буруутгаад байгааг ярих гэхээр улсын нууц задруулсан хэрэгт орох гээд байна

Ц.Нямдорж гэдэг хүн сүүлийн цамцаа урагдтал энэ хэргийн хойноос хөөцөлдөж байна. Тогонд цохиулж байгаад хэргийг нь хүлээлгэсэн малын хулгайн хэргээс эхлээд эрүү шүүлтүүд гарч байхад Ц.Нямдорж Хууль зүйн сайд байхдаа тоогүй. Тэгсэн атлаа энэ хэргийн буруутнуудыг буруугүй болгох гэж яваад байна. 

Би Ц.Нямдоржийг итгэлтэйгээр хардаж байна