Ойрын өдрүүдэд орсон борооны улмаас томоохон гол, мөрөн үерлэж, улсын хэмжээнд ноцтой гамшиг нүүрлээд байна. Үерийн улмаас нэг иргэн амиа алдсан харамсалтай хэрэг гарчээ. Тодруулбал, Сэлэнгэ аймгийн Мандал сумын Түнхэл багийн 264 дүгээр точикт Хараа голын гүүр нурж гүүрэн дээгүүр зорчиж явсан ЗИЛ-131 загварын автомашин унаж,  жолооч болон автомашин алга болсон тухай дуудлага өчигдөр онцгой байдлын газарт иржээ. Дуудлагын дагуу тус аймгийн Онцгой байдлын газрын Мандал сум дахь Гал түймэр унтраах, аврах 19 дүгээр ангийн алба хаагчид иргэн Д /42 настай, эрэгтэй/ цогцсыг Хараа голын уснаас эрэн хайх ажиллагааг зохион байгуулан ажиллаж байна.

Ташрамд дурдахад, голын усанд автомашинтай унаж, амиа алдсан иргэн нь Түнхэл тосгоны иргэдийг уснаас зөөх, авран хамгаалах ажиллагаанд оролцож байжээ.