Дархан-Уул аймгийн Дархан сумын зургадугаар багийн Баяндаваа хэсгийн 12 дугаар гудамжны задгай гэр шатаж байна гэсэн дуудлага өчигдөр 22:23 цагт Онцгой байдлын газарт иржээ.Дуудлагын дагуу тус аймгийн Онцгой байдлын газрын Гал түймэр унтраах, аврах 22 дугаар  ангийн алба хаагчдыг очиход иргэн Э-ийн таван ханатай гэр шатаж байсныг 12 минут ажиллаж унтраасан байна.

Тэгвэл гэр нь шатсан иргэн Э нь Дархан-Уул аймгийн удирдлагуудыг шүүмжилж, үзэл бодлоо илэрхийлсэн байжээ. Иргэн Э хэвлэл мэдээллийн хэрэгслээр талбайр өгөхдөө “Би амьдарч байгаа багтаа гурилан бүтээгдэхүүний үйлдвэрлэл эрхлэхээр газар авсан. Багийнхаа эрхэлсэн тодорхой ажилгүй иргэнийг гуйж, харуулаар ажилд авсан. Тэгээд гэрийг нь газар дээрээ бариад байж байтал учир битүүлгээр шатчихлаа. Цахилгаан залгаагүй, хүн байгаагүй гэр шүү дээ. Өдөр нь Дархан-Уул аймаг болон багийн удирдлагуудаас шахалт, дарамт ирсэн. Санаатайгаар шатаасан гэж бодож байна” хэмээн ярьжээ.