Эгэл даруухан амьдралдаа сэтгэл хангалуун, эрх чөлөөтэй, стрессгүй амьдарч яваа энэ залууг “Супер такси”-ны жолооч Э.Тэмүүлэн гэдэг. Бид түүнтэй цөөн хором супер такси болон хүсэл мөрөөдлийнх нь талаар ярилцлаа.

-Сайн байна уу. Танд энэ өдрийн мэнд хүргэе. Завгүй ажлынхаа хажуугаар манай уншигчдад зав гаргаж байгаад баярлалаа. Өөрийгөө танилцуулах уу?

    -Намайг Э.Тэмүүлэн гэдэг. Айлын ууган хүү, Улаанбаатар хотын унаган иргэн.  Харин сүүлийн үед “Супер такси”-ны жолооч гэдэг нэртэй болсон байна.  Би төрөлхийн тархины саажилт өвчтэй. Ээж минь намайг бага байхад үүрээд, “Хүүгээ эрүүл болгоно оо” гээд олон ч газар эмчилгээ хийлгэхээр очсон доо. Хэдий миний гарын хөдөлгөөн, хэл яриа жаахан бэрхшээлтэй ч бусад хүн шиг эрүүл саруул оюун ухаантай. Тиймдээ өөрт тохирох ажлаа голохгүй хийдэг. Би ээжтэйгээ хамт амьдардаг болохоор ээждээ дараа болох биш, тус болж явахыг л хичээдэг. Урьд нь нарийн боов, компьютер, гагнуурын чиглэлээр мэргэжил эзэмшсэн. Мөн фитнесийн тамирчин байлаа.

-“Супер такси”-ны санааг хэзээ олж байсан бэ?

    -Дөрвөн жилийн өмнө супер таксины санаагаа интернэтээс олж, загварыг нь өөрөө гаргаж, хүнээр хийлгэсэн. Анх арын хүн суух хэсэг задгай байсан. Тэгээд үйлчлүүлэгчээ бороо, шороо, салхи, нарнаас хамгаалахын тулд саравч хийсэн. Миний такси харагдаж байгаагаасаа илүү хурдтай, бүр 70км/ц хүртэл хурдална гээч. Би 30 минутад түгжрэхгүйгээр, нисэх орж байсан гээд бод доо.

-Таксиныхаа талаар дэлгэрэнгүй яриа дэлгээч?

        -Миний такси дөрөө жийдэггүй, цахилгаан мотороор ажилладаг. Оройд нэг цэнэглэж аваад л өдөржин давхина шүү дээ. Бензин зарцуулж, утаа гаргаж, байгаль орчинд сөргөөр нөлөөлдөггүй гэсэн үг. Үйлчлүүлэгчийнхээ суудлын доор нь гурван том зайн эх үүсвэрээ байрлуулсан. Мөн мотор халах, үйлчлүүлэгчийн суудлаас төөнөхөөс сэргийлж, хажуугаар нь ундааны савтай хөлдөөсөн ус хийсэн. Би хоёрдугаар сарын сүүлчээс арваннэгдүгээр сарын эхэн хүртэл таксиндаа явдаг. Жилийн дөрвөн улирал явмаар байдаг. Гэхдээ өвлийн хүйтэнд үйлчлүүлэгч олдохгүй. Дээрээс нь халтиргаа ихтэй хэцүү.

-Таксинд явахад хүндрэлтэй зүйл гарч байв уу?

            -Би машин болон нийтийн тээвэрт саад болохгүйг хичээдэг. Гэхдээ зам сүлжиж явах үед машин санаатай шахаж, орж ирэх үе байдаг. Би амьдралд гуниж, гутрах дургүй болохоор инээгээд л цааш явдаг даа. Сөрөг хүмүүсээс илүү эерэг хүмүүс хажууд минь олон байдагт талархаж байна. Инээмсэглэн гараа өргөөд, зорьсон газартаа очоод “Хурдан ирлээ, баярлалаа” гээд буух үйлчлүүлэгчдээ харах хамгийн дуртай.

-Таны нэг өдөр хэрхэн өнгөрдөг вэ?

     -Өглөө босоод тодорхой товлосон ажил байхгүй бол таксины цэнэглэсэн зайгаа солино. Тэгээд үйлчлүүлэгчтэй  тухтай байх үүднээс гадна тоосыг арчаад, суудлаа тухтай болгож засаад л ажилдаа гарна даа. Өдөрт тогтсон цагт баригдахгүй, өөрийн тааваар тайван ажилладаг. Би ойрхон газар 2000 төгрөгөөр, хол газар 5000 төгрөгөөр үйлчилдэг. Өдөртөө 50-60 мянган төгрөг олно. Ер нь эрх чөлөөтэй, дуртай унаагаараа жаргаж мөнгө олдог.

-Фитнесийн тамирчин байсан гэлээ. Хичээллэхээ болиод удаж байгаа юу?

            -Би Монгол Улсын бодибилдингийн аварга шалгаруулах тэмцээний гуравдугаар байрыг 2017 онд хүртсэн. Надаас өмнө хөгжлийн бэрхшээлтэй иргэн ийм амжилт гаргаж байсан удаа үгүй. Амьдрал хичээл зүтгэлийн  минь хариуг бэлэглэсээр л байна. Хааяа өөрөөрөө онгирмоор санагддаг. Завсарлаад хоёр жил гаруй болсон байна. Удахгүй дахиад хичээллэх бодолтой байгаа. Фитнесээр хичээллэснээр өөртөө итгэх итгэл минь нэмэгдэж, бие бялдрын хувьд илүү чийрэг болсон.  Намайг хөгжлийн бэрхшээлтэй гэж гололгүй дасгалжуулсан “Golden gym”-ийн  багш нартаа үргэлж талархдаг.

-Мөрөөдлөөсөө хуваалцаач?

            -Намайг ойлгож, хайрлах сайхан эмэгтэйтэй учрахыг хүсэж байна. Гурвуулаа болчихоод, хүүхдээ голдоо хөтлөөд алхах, таксиныхаа ард суулгачихаад, салхи татуулан давхихыг мөрөөдөг гэх үү дээ. Төсөөлөхөд л  өөрийн эрхгүй жаргалтай болдог.

        Тэр бол  “Албан ёсны”, “Зай барь” гэх үгсийг хадсан, сүнгэнэн давхих “Супер такси”-ны жолооч.  Түүнтэй ийн ярилцсаны дараа өөрийн эрхгүй түүнээр бахархах  сэтгэл төрж  байлаа. Хэрэв уншигч та бүхэн  Э.Тэмүүлэнтэй зам дээр таарвал, “Супер такси”-гаар нь үйлчлүүлээрэй.