Оюутныг сурч боловсрох, өөрийгөө хөгжүүлэхэд туслах зорилгоор сургалтын тэтгэлэгт хөтөлбөрүүд зарлагддаг. Энэ нэг талаараа суралцагч оюутныг идэвх зүтгэлтэй сурч хөдөлмөрлөснийг нь үнэлж буй санхүүгийн дэмжлэг юм. Эдгээр тэтгэлэгт материалаа явуулахад анхаарах гол шалгууруудыг танилцуулж байна.

1. Нийгмийн идэвхтэй оюутан байх

         Нийгмийн сайн сайхны төлөөх сайн дурын үйл ажиллагаанд тогтмол оролцож, зохион байгуулж, тухайн ажил нь олон нийтэд хүрсэн байх ёстой гэсэн шалгуур бий. Энэ нь тухайн оюутанд тэтгэлэг олгох хамгийн чухал шаардлагын нэг. Тиймээс тэтгэлэгт хөтөлбөрт хамрагдахыг зорьж байгаа бол одооноос сайн дурын байгууллагад элсэхийг зөвлөж байна.

 2. Эсээ

         Эсээгээрээ дамжуулан өөрийгөө  таниулах боломжтой. Тиймээс тэтгэлгийн эсээ нь бусад эсээнээс өөр байдаг. Тэтгэлгийн эсээнд гоё ганган үг ашиглаад хэрэггүй. Харин тухайн байгууллагын санал болгосон сэдвийн хүрээнд  заасан үгийн тоонд нь  багтааж гол санаагаа гаргах нь чухал. Яагаад энэ тэтгэлгийг чи авах ёстой вэ гэдгийг, надад бусад хүүхдүүдээс ялгарах ийм чадвар давуу тал, нөөц бололцоо бий гэдгээ аль болох тусгаж өгөх хэрэгтэй.

3. Дүнгийн голч

        Нийт суралцсан хугацааны голч дүн ихэвчлэн 3.2 ба түүнээс дээш байх ёстой гэсэн шаардлагыг ихэнх тэтгэлэг олгогч байгууллагын зүгээс тавьдаг. Мөн дүнгийн голчоос гадна эрдэм шинжилгээний ажилд оролцон байр эзэлж байсан бол том давуу тал болдог.

4. Багшийн тодорхойлолт

   Энэ нь тухайн тэтгэлэгт хүсэлт гаргаж буй оюутныг багшийн зүгээс тодорхойлсон баримт бичиг. Тухайн багш дээр хичээл үзэж байх хугацаандаа хэр идэвх зүтгэлтэй, ямар давуу талтай оюутан бэ гэдгийг нотлох багшийн дүгнэлт бүхий тодорхойлолт.