Баянзүрх дүүргийн 21, 27 дугаар хороо Дарь-Эх орчимд үер бууж, таван хүн амь эрсдээд байна. Тодруулбал, нийслэлд орсон түр зуурын борооны улмаас Дарь-Эх орчим үерт автаж, арван сартай нярайтайгаа автомашинд зорчиж явсан гэр бүлийн хүмүүс үерт урсаж, хүүхэд нь эндсэн харамсалтай нь хэрэг гараад байна. Талийгаач хүүхдийн аав, ээжийн биеийн байдал хүнд Гэмтэл согог судлалын үндэсний төвд хэвтэн эмчлүүлж байна. Хүүхдийн цогцсыг машин урссан газраас нэг км орчмын зайнаас буюу гүүрэн доороос олж, шүүх шинжилгээний хүрээлэнд хүлээлгэн өгсөн байдаг.

Хүүхдийн аав, ээж ухаан орсон даруйдаа эмнэлгийн ажилтнуудад хүүхэдтэй явсан гэдгээ мэдэгдэж, эмч нар цагдаагийн байгууллагад дуудлага, мэдээлэл өгсөн. Үүний дагуу эрэн хайх, аврах ажиллагааг эхлүүлсэн ч харамсалтай нь хүүхэд амьсгал хураасан байдалтай олдсон юм.

            Бид энэ талаар талийгаач хүүхдийн аавтай нь хамт ажилладаг хүнтэй холбогдож тодрууллаа. Тэрбээр “Хүүхдийн аав, ээж ухаан орсон ч биеийн байдал нь сайжирч өгөхгүй байна. Аавынх нь цээж бүхэлдээ хатгаатай, хүнд байгаа. Харин ээжийнх цээжний зурагны хариу гараагүй байгаа ч үг хэлж, хөдөлж чадахгүй байгаа гэсэн.Талийгаач хүүхдийн аав, ээжийг аавынх нь эгч сахиж байгаа. Тэр өдөр ажилдаа ирээд, орой нь эхнэр хүүхэдтэйгээ эгчийнх рүүгээ явж байхад гэнэтхэн ус ороод ирсэн юм байна лээ. Хоёр том хүү нь гэртээ үлдсэн гэсэн. Дарь-Эхийн замд явж байхад нь үер бууж, машин нь усаар дүүрсэн учир машинаасаа буугаад хүмүүсээс тусламж гуйсан гэсэн. Машинаас буухдаа аав нь хүүхдээ тэвэрчихсэн байсан юм билээ. Тэгээд үерийн усаар чулуу, хайрга, айлын эд хогшил урсаж ирээд цохиж, юу юугүй урсгачих гээд хүнд байсан гэсэн. Хүүхдээ тэвэрчихээд усанд урсчих гээд байсан учир машиныхаа хамар дээр тавиад, тусламж эрсэн юм шиг байгаа юм. Үерийн ус маш ширүүн урсгалтай байсан учраас хүүхэд нь усанд урсаад хэд хэдэн удаа барьж авсан гэсэн. Аав нь уснаас хүүхдээ гаргаж машиныхаа хамар дээр тавьж байснаа санаж байгаа ч тэрнээс хойш юу болсныг мэдэхгүй байгаа. Аав, ээж хоёр нь байнга хүүхдээ асууж байгаа ч ар гэрийнхэн нь биеийн байдал нь хүндэрчих вий гээд айсандаа хэлээгүй. Өнөөдөр эгч нь аавд нь хэлсэн байж магадгүй. Гэхдээ өөрсдөө гадарлаж байгаа байх. “Уснаас гаргаад машины хамар дээр тавьсан. Тэгээд өөрөө урссан” гээд л байн байн яриад байна гэсэн. Аав, ээжийнх нь хувьд маш хүнд байна. 30 гаруйхан настай хосууд хүүхдээ алдчихаад, өөрсдөө эмнэлэгт биеийн байдал нь хүнд байна гэдэг төсөөлөхөд ч бэрх байна. Амьдрахын төлөө зүтгэж яваа ажилдаа сайн хосууд байгаа юм. Нөхөр нь манай гутлын үйлдвэрт ажиллаад хоёр, гурван жил болж байна. Ажилдаа сайн, хүн чанартай, хүний дээд байгаа юм. Ийм зүйл болсонд бид маш их харамсаж байна. Сайн ажилтан учраас бид өөрсдийнхөө нэр дээр банк бусаар машин худалдаж авч өгсөн. Машин нь бидний нэр дээр бүртгэлтэй учраас албаныхан бидэн рүү залгаж, тодруулж байх шиг байна. Өнчин өрөөсөн хүмүүс учраас хүн хүч муутай ажлынхан нь хүүхдийнх нь ажил явдлыг хариуцаж байгаа. Хүүхдийг нь маргааш хөдөөлүүлнэ. Хоёр том хүү нь гэртээ байсан учраас үерт өртөөгүй. Аав, ээж нь эмнэлэгт, дүү нь нас барчихсан, хоёр хүү нь хэцүү л байна даа” гэв.