Шинжлэх ухааны академи төрийн дээд шагнал “Чингис хаан” тэргүүн зэргийн одон хүртлээ. Монгол Улсын Ерөнхийлөгч У.Хүрэлсүх энэ үеэр хэлсэн үгэндээ тус академи үндэсний судлаачдыг бэлтгэж, Монгол судлалыг олон улсад хөгжүүлэхэд чухал хувь нэмэр оруулсныг онцлов.

         Тэрбээр “1931 онд Шинжлэх ухааны хүрээлэн нэртэйгээр үүсгэн байгуулагдсан өнөөгийн Шинжлэх ухааны академи түүх, хэл бичиг, утга зохиол, эдийн засаг байгалийн ухааны судалгаа өргөжин хөгжиж, хөдөө аж ахуй, анагаах ухааны судалгааны чадавх бэхжиж, байгаль болон техникийн ухааны хүрээлэн байгуулагдаж, суурь болон хэрэглээний судалгааг хөгжүүлж улмаар үндэсний судлаачдыг бэлтгэх, эрдэм шинжилгээний хамтлагийг төлөвшүүлэх, олон улсын хамтарсан судалгаа явуулах дараа үеийн ололт амжилтын үндэс суурь болсон юм. Мөн Шинжлэх ухааны академи нь олон улсын Монголч эрдэмтдийн их хурлыг Улаанбаатар хотноо тогтмол зохион байгуулж, өрнө дорнын судлаачидтай хамтран ажилласнаар Монгол улс, Монгол судлалын олон улсын хамтын ажиллагааны тулгуур төв болгон үндэсний ой санамжийг хадгалах, дэлхий дахинд таниулах чухал ажлыг хийсээр ирсэн. Түүнчлэн Монгол нутагт 800 мянган жилийн өмнө эртний хүн амьдарч байсныг тодорхойлон, нүүдэлчдийн загварт урлаг монголоос үүдэлтэйг баримтаар нотолсон түүхэн гавьяатай. Мөн эх орныхоо түүхэн дурсгалт 100 гаруй газрын мэдээллийг нэгдсэн санг бүрдүүлж, Юнеско-гийн “Дэлхийн соёлын өв”-д бүртгүүлсэн билээ. 1981 онд Монгол улсаас сансарт хүн ниссэн зэрэг нь манай улсын бахдам амжилт, Шинжлэх Ухааны Академийн түүхэн гавьяа билээ. Эдүгээ Шинжлэх Ухааны Академи 35 улсын 150 гаруй шинжлэх ухааны академи, эрдэм шинжилгээний байгууллагуудтай хамтран ажиллаж хамтын судалгаа, эрдэмтэн солилцоо зэрэг хөтөлбөрүүдээр туршлага судлан үндэсний судлаачдыг чадавхыг бэхжүүлж, Монголын шинжлэх ухааны нэр хүндийг өндөрт өргөхөд бодит хувь нэмэр оруулсан гэх мэт олон чухал ажлыг амжилттай биелүүлээд буй юм. Мөн Монгол орны биологийн олон янз байдал, амьтан ургамлыг судлан амьтны аймгийн ангилал зүй, экологи, биологи, генетикийн судалгааны мэдээллийн нэгдсэн санг бүрдүүлсэн бөгөөд 200 гаруй  байгалийн шинэ нэгдэл 70 орчим зүйл ургамлын анх олж нээн дэлхийн мэдлэгийн санд бүртгүүлсэн юм.

Чингис хаан тэргүүн зэргийн одонд Шинжлэх Ухааны Академийн 16 эрдэм шинжилгээний хүрээлэн 50 гаруй шинжлэх ухааны доктор 280 гаруй докторын зэрэгтэй эрдэмтэн судлаач нар ажиллаж олон улсын өндөр зэргийн сэтгүүлд 3800 гаруй өгүүлэл хэвлүүлсэн байна. Тэдгээрээс  90 мянга гаруй нь ишлэл хийгээд байгааг тэмдэглэхэд таатай байна. Үндэсний Шинжлэх ухааны энэхүү их өвийг академич Б.Ширэндэв, Ц.Дамдинсүрэн, Б.Ренчин тэргүүтэй Монголын суут эрдэмтэд, тэдний халааг залгамжилсан үе үеийн олон мянган судлаачид хамтран бүтээсэн түүхтэй. Эрдэмт хүн улсын чимэг, зүтгэлт хүн гэрийн хэмээх ардын сайхан зүйр үе байдаг. Эрдэм мэдлэгийг эрхэмлэн дээдэлж, эрдэмтэн мэргэдийнхээ сэцэн ухааныг өнөд түшиж Монгол түмний минь билиг оюун мохошгүй хурц, мөхөшгүй бат байхын өлзийтэй сайхан ерөөлийг өргөн дэвшүүлж байна. Их эзэн Чингис хаанаараа овоглох эрхэм дээд алдар хүртсэн “Шинжлэх Ухааны Академи”-ийн хамт олон, үе үеийн академичид, эрдэмтэн судлаачид, ажилтан албан хаагч та бүхэнд дахин баяр хүргэж эрдэм бүтээлийн өндөр амжилт хүсэн ерөөе.

Мөнх тэнгэрийн хүчин дор, Их эзэн Чингис хааны суу алдар, сүр хүч Монголчууд биднийг өнө мөнхөд ивээж байх болтогуй” гэв.