Авлигатай тэмцэх газар (АТГ) нийслэлийн 16.9 тэрбум төгрөгийн "Шинэ тойрог авто зам" төслийн хэрэгт холбогдуулан Хотын даргын орлогч асан Т.Даваадалай болон бусад этгээдийн 6.2 тэрбум төгрөгийг битүүмжилснээ мэдээллээ.

АТГ-ын Мөрдөн шалгах хэлтсийн дарга, эрхэлсэн комиссар Х.Буянтүмэн өнөөдөр хийсэн мэдээллийн үеэр Т.Даваадалайг тус төслийн тендерийг хууль бусаар шалгаруулж, мөнгө угаасан гэж үзэж байгааг дурдсан.

АТГ-ын өмнө мэдээлснээр Т.Даваадалай нийслэлийн Засаг даргын эдийн засаг, дэд бүтэц хариуцсан нэгдүгээр орлогч байхдаа бусадтай үгсэн тохирч, "Шинэ тойрог авто зам" төслийн урьдчилсан ТЭЗҮ, зураг төслийн тендерийн ажлын даалгаврыг өөрчилсөн гэж үзэж байгаа. Ингэснээр тодорхой компанид хууль бусаар давуу байдал олгосон байх магадлалтай гэж мөрдөгчид үзжээ.

Мөн тэрбээр 2025 оны 4-10-р сарын хооронд эхнэрийнхээ үүсгэн байгуулсан компаниар дамжуулан 5.2 тэрбум төгрөгийн хахууль авч, мөнгө угаасан гэж сэжиглэгдэж буй. Хэрэгт "Метро" төслийн нэгжийн захирал, "Тойрог авто зам" төслийн захирал, нэг аж ахуйн нэгжийн захирал зэрэг гурван хүн холбогдсон.

АТГ наймдугаар сард мөрдөн шалгах ажиллагааг дуусгаж, хэргийг яллах саналтай прокурорт шилжүүлсэн. Шүүх шийдвэр гараагүй тул холбогдогчид гэм буруутай нь тогтоогдоогүй байна.