Ерөнхий боловсролын сургуулийн хоёрдугаар улирал өнөөдөр буюу арваннэгдүгээр сарын 9-нд эхэллээ. Энэ улирлаас нэгдүгээр ангийн сурагчид “Нийгэмшил, сэтгэл хөдлөлийн хичээл” үзэж эхэлж байгаа юм.

     Хүүхэд уурласан, гомдсон үедээ юу мэдэрч байгаагаа хэрхэн хэлэх, найзтайгаа санал зөрвөл яаж ярилцах зэрэг нь хичээлийн агуулгад багтжээ. Сурагчид эхлээд өөрийн мэдрэмжийг таньж, нэрлэж сурна. Цаашлаад бусдыг сонсох, өөрийн бодлыг хэлэх, ангийнхантайгаа хамтран ажиллах дадал эзэмшинэ. Хөтөлбөрөөр нийт 24 чадвар эзэмшүүлэхээр төлөвлөжээ. Сурагч бүрд “Миний сайхан сэтгэлийн дэвтэр” нэртэй сургалтын хэрэглэгдэхүүн өгөх бөгөөд багш нарыг уг хичээлийг заах арга зүйгээр бэлтгэхээр тусгасан байна.

                                                                                                 М.Сүндэр