Т.Бадамжунай гэж Монголд байхгүй дээрэмчин, авлигалчин, гэмт хэрэгтнийг Монголын хууль хяналтын байгууллага Засгийн газрын хэрэгжүүлж байгаа “Шувуу” ажиллагаагаар Филиппин Улсаас “шүүрч” авчирч байлаа. Мөн ч жигтэй юм болж байсан сан, жил гаруйн өмнө. Баахан хэвлэл дуудаад, баруун солгойгүй зураг, дүрсийг нь шүршээд, гарыг нь гавлаад, хар машинд чихэж аваад нисэхээс хөдөлж билээ.

Тэр өдрөөс хойш 600 өдөр өнгөрлөө. Т.Бадамжунай ч үгүй болж байх шиг байна. “Шувуу” Т.Бадамжунайг шүх хүлээж авахгүй байгаа бололтой. Аргацаасан аргаар хэргийг нь буцааж, сүүлдээ хэрэгсэхгүй ч болгож мэдэхээр байна.

      Т.Бадамжунай нь ХХААХҮ яамнаас Жижиг, дунд үйлдвэрлэлийг дэмжих сангийн хүрээнд 2012 онд төсөвт тусгасан 500 сая төгрөгийг эрх мэдэл, албан тушаалын байдлаа урвуулан ашиглаж, зориулалтынх нь дагуу ашиглалгүй өөрийн хамаарал бүхий этгээдүүдтэй хамтран завшсан байж болзошгүй гэх хэрэгт шалгагдаж байхдаа хилээр гараад зугтаачихсан байдаг. Тодруулбал, Завхан аймагт 2012 оны тавдугаар сард жижиг дунд үйлдвэрийг дэмжих нэрээр ямар ч төсөл сонгон шалгаруулахгүйгээр 500 сая төгрөгийг долоо хоногийн дотор төсвөөс гаргаж, нэр бүхий 108 иргэн, аж ахуйн нэгжийн данс руу шилжүүлсэн. Ингэхдээ ХХААХҮ-ийн сайд асан Т.Бадамжунай эрх мэдэл, албан тушаалаа ашиглаж, ах, дүүгийнхээ халаасны компани руу шургуулсан байж болзошгүй тул түүнийг хууль хяналтын байгууллагаас шалгаж байсан ч Дорнод аймгаар дамжин хил гарч, хэдэн жилийн дараа баривчлагдаж ирсэн нь энэ.

      Авлига, албан тушаалын хэрэгт сэжиглэж байгаа Т.Бадамжунайгаас сэжүүр олоод баривчлаад ирсэн ч хэрэг нь шийдэгдэхгүй хоёр жил болох нь. Дахиад шувуу болоод зугтаагаад явчихаж мэдэхээр байна.

      Шүүхэд хүргээд байсан Т.Бадамжунайн хэргийг нэмэлт мөрдөн байцаалтад буцаагаад байна. Учир нь, УИХ-ын гишүүн асан Ц.Анандбазартай хамтатган шалгахаар болсон. Угтаа хэдхэн сарын өмнө Т.Бадамжунайгийн хэргээс Ц.Анандбазарыг хэргийг тусгаарласан ч нэгтгэн шалгах шаардлагатай гэж үзээд байгаа юм.

      Тодруулбал, “Хэргийг буруу тусгаарласан”, “Шүүх хуралдаанаар нөхөн гүйцэтгэх боломжгүй мөрдөн шалгах ажиллагааг хийлгэх”-ээр прокурорт буцаасан байна. Өөрөөр хэлбэл, Т.Бадамжунайд холбогдох хэрэгт шалгагдаж байсан Ц.Анандбазарын хэргийг тусгаарласан нь буруу гэж үзсэн. Мөн үүнээс гадна УИХ-ын гишүүн асан Ц.Анандбазар Т.Бадамжунайг Улаанбаатар хотын менежерээр ажиллаж байхад Дархан цаазат Богдхан уулын Бага тэнгэрийн аманд газар авахаар их хэмжээний хахууль өгсөн байж болзошгүй гэх сэжүүрээр тэдний хэргийг нэгтгэн шалгахаар болжээ.

     Т.Бадамжунай нийслэл хотыг таван жил удирдахдаа Зайсан толгойн урдах газрыг УИХ-ын гишүүн асан Д.Өнөрболорт, Маршалын гүүрний ардах газрын "Чингис хаан" банкны эзэн Д.Батаа зэрэг дотнын, харилцаа, хамаарал бүхий хүмүүстээ баруун, солгойгүй тараасан гэдэг. УИХ-ын гишүүн асан Ц.Анандбазар ч мөн л эл жагсаалтад багтсан. Ц.Анандбазарыг Бага тэнгэрийн аманд тансаг зэрэглэлийн хаус, хороололтой болгосон эх үүсвэрүүдийнх нь нэг Т.Бадамжунай байж болзошгүй гэж хамаатуулан шалгаж байгаа гэсэн үг л дээ. Гэхдээ тэрбээр өдгөө Бага тэнгэрийн аманд 160 айлын тансаг зэрэглэлийн хаус, 172 айлын орон сууц барьж, түүнийгээ хэдийнэ борлуулчихсан.

Үнэндээ, Т.Бадамжунайгийн хэрэг Ц.Анандбазартаа ч байгаа юм биш. Шувууг шүүх хүлээж авахгүй байгаад л учир байна.