...Говийн хүү УИХ-д гараад хагас жил өнгөрлөө. Хаврын хуйсагнуур өдөр “Говь нутгийн хүүгийн хувьд би говийг заавал устай болгоно” гэж хэлээд Төрийн ордонд заларсан Р.Сэддорж гишүүнд хаяглаж байна.  

            Р.Сэддорж гишүүнд говийн иргэдийг устай болгох боломж байсан уу гэвэл байсан. Тэр өнгөрсөн жилүүдэд Өмнөговийн “хаан” шиг л байж, УИХ-д сонгогдсон. Засаг даргын сэнтийд байхдаа бодож төлөвлөсөн ажлаа гүйцээнэ гээд гишүүн болж байгаа нь энэ. Гэхдээ тэр одоог хүртэл чимээ аниргүй, усанд хаясан чулуу шиг алга болчихлоо. Иргэд хэрэглээнийхээ усыг худалдаж аваад сууж л байгаа. Хэзээ устай болохоо ч мэдэхгүй хүлээж л байна. Говийн иргэдийг устай болгоно гэж амласан хугацаанаас нь хагас жил өнгөрч, хавар болох нь ээ. Одоо л эхлүүлэхгүй бол оройтно шүү, Р.Сэддорж гишүүн ээ.

            Говийн тойргоос олон хүн сонгогдсон, хамтдаа нэг уриан лоозон шахуу болсон усаа говь руу татах нь зүйн ёсны хэрэг. Гэхдээ говийн унаган иргэн, хүү нь гэж өөрийгөө тодотгож, олон нийтэд таниулсан Р.Сэддорж гишүүнд эхлээд сануулах нь зүйтэй болов уу. Дөрвөн жил хаа ч байсан юм гэж байтал нэг зун нь өнгөрчихлөө. Тэр магад мартчихсан байж болох юм. Эцэс сүүлд нь, хэдэн авдар, тонн ус Улаанбаатараас говь руу зөөгөөд ч нэмэргүй болох вий гэж сэрэмжлүүлж байгаа хэрэг л дээ.

            Хавар боллоо. Ан амьтан, хүн, малгүй харангасаад эхлэх нь. Хэрлэн-Тоонот, Орхон-Онги ус дамжуулах төслийг шахах хэрэгтэй байна. Шамдуулах нь ч зүйтэй байна. Сонгогдохдоо амласан амлалтаа манлайлж биелүүлж, сонгогчдынхоо магнайг тэнийлгэж, баярлуулаач, Р.Сэддорж гишүүн ээ.

УИХ-ын гишүүн Р.Сэддорж нас, намтрынхаа талд нь “Ажнай” Д.Бат-Эрдэнийн туслах, нөгөө талд нь “Ажнай” Д.Бат-Эрдэнийн өмч болчихсон шахуу “Тавантолгой” ХК-ийн гүйцэтгэх захирлаар ажилласан нэгэн. Тиймдээ ч 2022 оны арванхоёрдугаар сард АТГ-аас “Ажнай” хочит Д.Бат-Эрдэнэ, түүний туслах асан, Р.Сэддорж нарыг “нүүрсний хулгай”-н хэргээр шалгаж буйгаа зарласан. Улмаар “Ажнай” Д.Бат-Эрдэнэ УИХ-ын гишүүнээсээ чөлөөлөгдсөн. Харин Р.Сэддорж “Тавантолгой” ХК-аас 350 сая төгрөгийн урамшуулал авсан гэгдээд “нүүрсний хулгай”-н хэргээс мултарч дөнгөсөн байдаг. Үүгээр ч зогсохгүй “Ажнай” Д.Бат-Эрдэнийн оронд УИХ-д заларчихаад сууж байна.

        126 гишүүний дунд тоон дотор үсэг гэгчээр Төрийн ордонд “төөрч” яваа гишүүн олон бий. Түүний нэг нь Р.Сэддорж. Одоо танилцах дадлага нь дууссан бол даацтай хөдлөх цаг нь болжээ. Энэ удаагийн парламентад сонгогдсон гишүүдийн 70 хувь нь өмнө нь Их хуралд сонгогдож байгаагүй, цоо шинээр орж ирсэн гэх судалгаа бий. Анхдугаар чуулганы хуралдаан хуралдаанаас хойш ээлжит бус чуулган хуралдаж, намрын чуулганы хуралдаан дундаа орж байна. Угтаа бол шинэ гишүүд хуулийн  төслүүдийн зах цухаас гадарлахтайгаа болж, ард түмнийг төлөөлөх үүргээ гүйцэтгэж, үзэл бодлоо чуулганы хуралдаанд илэрхийлэх цаг хугацаа болчихсон гэсэн үг. Гэтэл өнөөдөр кнопныхоо учрыг ч олохгүй сууна.

            Одоогийн байдлаар Р.Сэддорж гишүүн УИХ-ын Эдийн засгийн байнгын хорооны хуралдаанаар Байнгын хорооны даргаар сонгогдож, Ардчиллын тэргүүн дээд "Чингисийн одон"-гоор шагнуулж, хэд хэдэн удаа нутагтаа, тойрогтоо оччихоод байна. Өөрөөр гавьсан зүйл алга даа.