ХУВИЙН СУРГУУЛИУДЫН СУРГАЛТЫН ТӨЛБӨР ОРОН СУУЦНЫ ҮНЭТЭЙ ТЭНЦЭЖ БАЙНА 

 Сүүлийн үед эцэг, эхчүүд ихэвчлэн хувийн сургуулиудыг сонгож хүүхдээ сургадаг болсон. Ингэхдээ багш нар нь хүүхэд бүртэй тулж ажилладаг, гадаад хэлээр хичээл ордог сургуулиудыг сонгодог болсонтой холбоотойгоор хувийн сургуулийн эрэлт нэмэгдэж, түүний хэрээр төлбөр нь жилээс жилд нэмэгддэг байна. Тухайлбал, Улаанбаатар дахь Олон улсын дунд сургууль буюу "International school of Ulaanbaatar" сургуулийн ахлах ангийн сургалтын төлбөр өнгөрсөн жилээс 100 сая төгрөг хүртэл нэмэгдсэн байна. Хувийн дунд сургуулиудын нэгдсэн холбоонд 80 гаруй сургууль бүртгэлтэй байдаг ч сургуулиудын сургалтын төлбөрөө нэмэх эсэхэд хяналт тавих боломжгүй байдаг аж. Манай улсад өнөөдрийн байдлаар  дунджаар 180 орчим хувийн бага, дунд сургууль үйл ажиллагаагаа явуулдаг. Ингээд зарим хувийн сургуулиудын сургалтын төлбөр ямар үнэтэй байгааг хүргэе.

ШИНЭ МОНГОЛ БҮРЭН ДУНД СУРГУУЛЬ

ТӨЛБӨР

• Бага- 4.500.000 
• Дунд- 4.600.000 
• Ахлах- 4.700.000 

ОНЦЛОГ, ДАВУУ ТАЛ

• Сурагч бүр хоёр төрлийн хичээл нэмж сонгон суралцдаг.
• Сурагчид зургадугаар ангиасаа эхлэн япон хэл үздэг бөгөөд төгсөгчдийн 30 хувь нь гадаадын шилдэг их, дээд сургуульд 100 хувийн тэтгэлгээр суралцдаг.
• Суралцагсдын авьяасыг хөгжүүлэх зорилгоор бүх сурагчдыг дугуйлан, секцэнд хамрагдахыг шаарддаг.
• Монгол ёс заншлаа суралцахаас гадна японы ёс заншил, тэдгээрийн онцлогийг сурагчдад таниулж өдөр тутамд хэвшүүлэхэд анхаардаг.

ОЮУНЛАГ БҮРЭН ДУНД СУРГУУЛЬ

ТӨЛБӨР

• Бүх анги- 4.980.000

ОНЦЛОГ, ДАВУУ ТАЛ

• Математик, гадаад хэл, мэдээлэл зүйн гүнзгийрүүлсэн сургалттай.
• Сургалтдаа оюуны сошиал сайт болох “Амжилт 2.0” сургуулийн системийг нэвтрүүлснээр зайны сургалтад  дэвшил хийж чадсан.
• Төгсөгчид ЭЕШ-д тогтмол дээгүүр байрт ордог бөгөөд дотоодын болон гадаадын их, дээд сургуульд 100 хувь элсэн суралцаж, тэтгэлэг авч чаддаг.

ГЛОБАЛ ОЛОН УЛСЫН СУРГУУЛЬ

ТӨЛБӨР

• Бүх анги – 10.000.000 

ОНЦЛОГ, ДАВУУ ТАЛ

• Кембрижийн олон улсын бүрэн дунд боловсролын Cambridge Advanced (AS) хөтөлбөрийг үндэсний цөм хөтөлбөртэй хослууулан хэрэгжүүлдэг.
• Гадаад орны ахлах сургуулиудтай хамтран ажиллах, уралдаан, тэмцээнд оролцох, STUDY TOUR  зохион байгуулах зэргээр харилцан суралцах боломжтой.
• “Сайн үйлийн эзэн” хөтөлбөрөөр хичээллэж, бусдын сайн сайханд хувь нэмрээ оруулдаг, санаачилгатай, бүтээлч сайн үйлийн эзэн болж төлөвшинө.
• SAT, IELTS, TOFEL, HSK (хятад), NOR (япон) шалгалтад бэлтгэх хөтөлбөр хэрэгжүүлдэг.

ЖАРГАЛАН КЕМБРИЖИЙН ОЛОН УЛСЫН СУРГУУЛЬ

ТӨЛБӨР

• 4.500.000 

ОНЦЛОГ, ДАВУУ ТАЛ

• Англи, Австрали, Шинэ Зеланд, Швейцарь, Энэтхэг, Япон, Солонгос, АНУ-д 80-100 хувийн тэтгэлэгтэйгээр сургана.
• Сурагч солилцоо явуулдаг.
• Орчин үеийн стандартад нийцсэн үзүүлэлт бүхий компьютер бүхий Мэдээлэл зүйн кабинеттай.
• 4000 гаруй ном товхимолтой Номын сантай.

ГЁТЕ БҮРЭН ДУНД СУРГУУЛЬ
 

ТӨЛБӨР

• Бага- 5.800.000 
• Дунд- 6.300.000 
• Ахлах- 6.800.000 

ОНЦЛОГ, ДАВУУ ТАЛ

• Нэгдүгээр ангиасаа герман, англи хэлний аль нэгийг сонгож, дөрөвдүгээр ангиасаа хоёр хэлээр зэрэг суралцах боломжтой.
• Англи хэл болон герман хэлний зуны вакумжуулсан сургалтад тухайн улсад зуны амралтаараа хамрагдах боломжтой.
• Герман хэлний АI, AII, BI төвшний шалгалт өгч, гэрчилгээ авна.
• ХБНГУ-ын болон БНХАУ-ын Германы Элчин сайдын яамны дэргэдэх гимназид сурагч солилцооны хөтөлбөрт хамрагдах боломжтой.

ОЛОНЛОГ БҮРЭН ДУНД СУРГУУЛЬ

ТӨЛБӨР

• Бүх анги- 10.500.000 

ОНЦЛОГ, ДАВУУ ТАЛ

• Математик, англи хэл, байгаль, хүмүүнлэгийн ухааны гүнзгийрүүлсэн сургалттай.
• 1-12 дугаар ангиудад математик, англи хэлний эрчимжүүлсэн сургалтыг өөрийн туршлага, мэргэжлийн багийн чадварт түшиглэн явуулна.
• Математик сэтгэлгээг хөгжүүлэх гүнзгийрүүлсэн сургалтын хөтөлбөртэй.
• Гадаад хэлний дүрэм ярианы гүнзгийрүүлсэн түвшний хөтөлбөртэй.

ЛОГАРИФМ БҮРЭН ДУНД СУРГУУЛЬ

ТӨЛБӨР

• 7.000.000 

ОНЦЛОГ, ДАВУУ ТАЛ

• Дэлхийн 20-иод орны 400-гаад сургуулиудын дунд хэрэгжигч олон улсын Grapeseed хөтөлбөрийг Монголд хэрэгжүүлж эхэлсэн анхны сургууль.
• STEM буюу Science, Engineering, Technology, Art хичээлүүдийн нэгдсэн хөтөлбөртэй бөгөөд дөрөвдүгээр ангиас эхлэн инженерингийн суурь хичээлүүдийг, ахлах ангиас роботикийн хичээлүүдийг судалдаг.
• Монгол ёс заншлын өргөөтэй.

ШИНЭ МОНГОЛ ХАРУМАФҮЖИ СУРГУУЛЬ

ТӨЛБӨР

• Бага анги – 6.900.000 
• Дунд анги – 7.000.000 
• Ахлах анги – 7.900.000 

ОНЦЛОГ, ДАВУУ ТАЛ

• Нэг багшид оногдох хүүхдийн тоог боловсролын стандартад нийцсэнээс илүү гаргадаггүй.
• Япон хэв шинжийг сургалтандаа нэвтрүүлсэн, олон улсын стандарт хөтөлбөрт нийцсэн, байгаль, нийгмийн ухаанаар төрөлжсөн сургалтай.  Англи хэлний “Grape seed” хөтөлбөр хэрэгжүүлдэг.
• Хөгжлийн бэрхшээлтэй хүүхдүүдэд үүд хаалга нээлттэй сургуультай.

INTERNATIONAL SCHOOL OF ULAANBAATAR

ТӨЛБӨР

• Бага- 77.000.000
• Дунд- 94.000.000
• Ахлах- 100.000.000

ОНЦЛОГ, ДАВУУ ТАЛ

• Олон улсын бакалаврын хөтөлбөртэй сургууль. Бүх хичээл англи хэлээр явагддаг.
• Сурагчдийнх нь 60 хувь нь гадаад хүүхдүүд. Монгол хүүхдүүд 150 ам.доллар төлж хүлээлгэнд бүртгүүлнэ.

САНТ ДУНД СУРГУУЛЬ

ТӨЛБӨР

• Бүх анги – 10.000.000 

ОНЦЛОГ, ДАВУУ ТАЛ

• Оксфордын англи хэлний хөтөлбөр болон АНУ-ын “AP” хөтөлбөрөөр сургалт явуулдаг.
• Гар утасны аппликейшн бүтээх хичээл үздэг.
• Эрүүл, тохилог, шаардлага нийцсэн сургалтын орчинтой.

САКУРА ДУНД СУРГУУЛЬ

ТӨЛБӨР

• Бага анги – 8.500.000
• Дунд анги – 9.500.000
• Ахлах анги – 10.500.000

ОНЦЛОГ, ДАВУУ ТАЛ

• Тэргүүлэх зэргийн багш, сурган хүмүүжүүлэгчтэй.
• Хэлний мэдлэгийн түвшингээр нь хичээллэдэг.
• Ерөнхий эрдмийг стандартаас дээгүүр эзэмшүүлдэг.
• 20 төрлийн дугуйлантай (Төлбөргүй).

ОРЧЛОН ДУНД СУРГУУЛЬ

ТӨЛБӨР: Бүх анги- 27.000.000 

ОНЦЛОГ, ДАВУУ ТАЛ

• Олон улсын хөтөлбөртэй хосолсон /Cambridge / үндэсний боловсролын хөтөлбөртэй.
• Мэргэжлийн гадаад багш нартай.
• Үндэсний чадварлаг багш нар, тэднийг олон улсын сургалтанд бэлдэх Кембрижийн мэргэжил дээшлүүлэх хөтөлбөр хэрэгжүүлдэг.
• Хоёр дахь гадаад хэл болох хятад хэл нь олон улсын хөтөлбөрийн зайлшгүй судлах хичээл орно.

THE ENGLISH SCHOOL OF MONGOLIA
 

ТӨЛБӨР

• Бүх анги- 11.000.000 

ОНЦЛОГ, ДАВУУ ТАЛ

• Английн үндэсний хөтөлбөрт суурилсан Кэмбрижийн болон IB /International Baccalaureate/ ОУ-ын Боловсролын хөтөлбөр, үндэсний хөтөлбөр хослуулан хичээллэдэг
• 30 гаруй төрлийн секц дугуйлантай.
• Мэргэжлийн гадаад багш нар хичээл заадаг

ХОББИ ДУНД СУРГУУЛЬ
 

ТӨЛБӨР

• Бүх анги- 19.000.000 

ОНЦЛОГ, ДАВУУ ТАЛ

• Нэгдүгээр ангиасаа англи хэлний гүнзгийрүүлсэн хичээл үзнэ.
• Олон улсын IPC, IMYC, AP хөтөлбөрөөр хичээллэдэг.
• Сургалтын эрүүл цэвэр орчинтой.

Г.В.ПЛЕХАНОВЫН НЭРЭМЖИТ ОРОС СУРГУУЛЬ

ТӨЛБӨР

• Бүх анги- 4.400.000

ОНЦЛОГ, ДАВУУ ТАЛ

• I-XII анги хүртэл бүх хичээл орос хэл дээр орно.
• Орос багш, сурган хүмүүжүүлэгчид, Орос сургалтын арга барилаар хичээлээ заана
• Хоёрдугаар ангиас Англи, Монгол хэл орно

ХУВИЙН СУРГУУЛИУДЫН СУРГАЛТЫН ТӨЛБӨР СҮҮЛИЙН ЖИЛҮҮДЭД 2.3-20 САЯ ТӨГРӨГӨӨР НЭМЭГДЖЭЭ​

       Манай улсад хамгийн эрэлттэй байдаг дээрх сургуулиудын сургалтын төлбөр сүүлийн жилүүдэд 2.3- 20 сая хүртэл нэмэгдсэн байна. Тухайлбал, Орчлон сургуулийн сургалтын төлбөр 10.4-15.6 сая төгрөг, “American school of Ulaanbaatar” сургуулийн төлбөр 14.3 сая, Олонлог бүрэн дунд сургуулийн төлбөр 7-10 сая, Хобби сургуулийн төлбөр 8.3 сая, Сант сургуулийн төлбөр 6.5 сая, Шинэ Монгол болон Логарифм сургуулийн төлбөр 4.7 сая төгрөгийн төлбөртэй байжээ. Эцэг, эхчүүд хувийн сургуулийн сургалтын төлбөр нэмэгдсэн нь улсын сургуулиудын багш нарын заах арга барил, сургалтын систем муудсантай холбоотой хэмээн үздэг.

ЭЦЭГ, ЭХЧҮҮД: НАСААРАА ХӨДӨЛМӨРЛӨӨД Ч ХУВИЙН СУРГУУЛИЙН ТӨЛБӨРИЙГ ТӨЛЖ ДИЙЛЭХГҮЙ ЮМ БИЛЭЭ

     Хэдийгээр хүүхдүүдийнхээ ирээдүйг бодож чанартай боловсрол олгохын тулд хувийн сургуулиадад сургадаг ч зарим эцэг, эх сургуулийн төлбөр нэмэгдэх бүрд санхүүгийн дарамтад ордог байна. Мөн анги ахих тусам сургалтын төлбөр нэмэгддэг учир зарим эцэг, эх хүүхдүүдийнхээ сургалтын төлбөрийг төлж дийлэхгүйд хүрч хүүхдүүдээ бага төлбөртэй болон хувийн сургуулиуд руу шилжүүлдэг. Хувийн сургуулиудын сурагчдын эцэг, эхийн цахим группэд "Хүүхдээ улсын сургууль руу шилжүүлэх гэсэн юм. Хоцрогдол хэр байх бол" гэх мэт сэтгэгдлүүд их байлаа. Хувийн сургуулиудын төлбөрын талаар эцэг, эхчүүдээс тодруулахад "Насаараа хөдөлмөрлөөд ч хувийн сургуулийн төлбөрийг төлж чадахгүй юм билээ. Жил бүр төлбөр нь нэмэгдэж байдаг бололтой. Манай хүүхэд улсын сургуульд сурдаг. Багштайгаа ойлголцоод өөрөө мэрийвэл бусдаас хоцрогдоод байх зүйлгүй. Гэхдээ аав, ээж бүр л хүүхдээ гадаад хэлтэй боломжийн сургуульд сургахыг боддог. Гэтэл хувийн сургуулиудын сургалтын төлбөр тэнгэрт хадсан байна. 5-10 жилийн дараа хэд болж нэмэгдсэн байх бол. Хэдэн өрөө байрны үнэтэй тэнцэх байх" гэсэн юм.