Баянзүрх дүүргийн хоёрдугаар хороо Б.Доржийн гудамж, 1б хэсэгт байрлах цагдаагийн “Сүлд” чуулгынхан удаа дараа иргэдийн эрх ашгийг зөрчсөн ноцтой үйлдэл гаргаж байгааг оршин суугчид мэдээллээ. Тодруулбал, өчигдөр тус чуулгын жижүүр эрэгтэй байгууллагынхаа эзэмшлийн талбайн цасыг цэвэрлэж, иргэдийн зорчдог автозам руу хаяжээ. Шаардлага тавьсан иргэдэд “Чамд хамаагүй, зайл” гэх зэргээр ёс бус харьцжээ.

Өөрөөр хэлбэл, цагдаагийн “Сүлд” чуулгын удирдлагууд жижүүрийн бүрэлдэхүүндээ “Чуулгын урд талын талбайн цасаа цэвэрлэж, нийтийн эзэмшлийн талбай, иргэдийн зорчдог автозам руу хая” гэж тушаасан бололтой.

ЦАГДААГИЙН "СҮЛД" ЧУУЛГЫН ЖИЖҮҮР ЦАСАА ЦЭВЭРЛЭЖ БАЙГАА НЬ. 2022.11.01

       Мөн үүнээс гадна тус байгууллагын удирдлагууд эрх мэдлээрээ, цагдаагийн байгууллагын сүр хүчээрээ далайлган нийтийн эзэмшлийн талбайг хашаалж, хаалт хийснээс болж оршин суугчид автомашины зогсоолгүй болжээ. Үүгээр ч зогсохгүй зэргэлдээх орон сууцнууд халаалтгүй, цахилгаангүй болж шугам сүлжээ засварлах шаардлага тулгарахад “Сүлд” чуулгын дарга Г.Эрдэнэбаатар “Өөрийн эзэмшлийн талбайгаа ухуулахгүй. Манай байгууллагын эзэмшлийн талбайгаар дулааны шугам сүлжээ явдаг эсэх нь хамаагүй” гэх зэргээр хэдэрлэж байсан талаар оршин суугчид ярьж байна.

Бид тус байгууллагынхан иргэдийг хэрхэн хохироож байгаа талаар эргэн сурвалжлах болно.