С.ЦЭЦЭГМАА: "Хүмүүн бичиг" сонинд ажиллаж байхдаа "Монголын сайхан бичигтэн" уралдааныг санаачилсан

2022-11-01, 1960

МОНЦАМЭ агентлагаас үндэсний монгол бичгээр эрхлэн гаргадаг “Хүмүүн бичиг” сонины 30, “Монголын сайхан бичигтэн” улсын уралдааны 25 жилийн ой энэ жил тохиож байгаа аж. Ойн хүрээнд “Монголын сайхан бичигтэн” улсын уралдааны үе үеийн аварга, ахмад багш, судлаачдын уулзалт тус агентлагийн байранд өчигдөр болжээ. Ингэхдээ “Монголын сайхан бичигтэн” улсын уралдааны үе үеийн аваргуудад батламж, энгэрийн тэмдэг гардуулсан байна.

"Хүмүүн бичиг" сонин нь 1308 дугаараа уншигчдад хүргэсэн байна. Харин энэ хугацаанд “Монголын сайхан бичигтэн” уралдаанд давхардсан тоогоор 25 мянган хүн оролцсоноос 196 хүн аварга болсон бол 12 дугаар анги төгссөн нийт 84 хүн түрүүлж МУИС, МУБИС-д урилгаар элсэн суралцсан байгаа аж.

"Хүмүүн бичиг" сонины 30 жилийн ойн баярын уулзалтын үеэр "Монголын сайхан бичигтэн" улсын уралдааны санаачлагч С.Цэцэгмаа “Анх 1996 онд “Хүмүүн бичиг” сонинд ажиллаж байх үедээ “Монголын сайхан бичгийн уралдаан” гэж санаачилж байсан. Ардчиллаас хойш монгол бичгийн анхны болоод хамгийн эхэнд гарсан энэхүү сонинд ажиллах хувь тохиосон юм. Тэгэхдээ олон түмнийг хэрхэн монгол бичигтэн болгох вэ, сониноо хэрхэн сурталчлах вэ хэмээн энэхүү уралдааныг санаачилсан. Тухайн үед “Хүмүүн бичиг” сонины эрхлэгч, МУСГЗ Т.Галдан уралдааны болзлыг дэмжсэн. Түүнээс хойш 25 жилийн хугацаанд уралдааны цар хүрээ монголд төдийгүй гадагшаа дэлгэрсэн байна. Уралдааныг жил бүр хүмүүс хүсэн хүлээдэг, монгол бичгийнхээ чиглэлээр “од” болсон уралдаан юм. Бүх насныхан оролцож буй энэхүү уралдаан хамгийн өгөөжтэй, үр дүнтэй, хүнд хүрсэн ажил болсонд нь бахархаж, омогшиж явдаг” гэв.

С.ЦЭЦЭГМАА: "Хүмүүн бичиг" сонинд ажиллаж байхдаа "Монголын сайхан бичигтэн" уралдааныг санаачилсан

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.